లోడ్ అవుతోంది...
Pradeep Manthri
Sports | Jan 13, 2026, 7.55 pm IST
T20 World Cup | త్వరలో టీ20 ప్రపంచకప్ ప్రారంభం కానున్నది. భారత్-శ్రీలంక సంయుక్తంగా ఆతిథ్యం ఇవ్వనున్నాయి. టోర్నీలో బంగ్లాదేశ్ పలు మ్యాచులను భారత్లో ఆడాల్సి ఉంది. అయితే, ప్రస్తుతం ఆ దేశ బోర్డు భద్రతను సాకుగా చూపిస్తూ.. భారత్లో ఆడలేమని.. తమ మ్యాచులను శ్రీలంకకు మార్చాలని డిమాండ్ చేసింది. వేదికలను మార్చాల్సిందేనని పట్టుబడుతున్నది. ఇప్పటికే ఐసీసీ వేదికలను ఖరారు చేసిన నేపథ్యంలో.. షెడ్యూల్ను మార్చే విషయంలో సరేమిరా అంటున్నది. బంగ్లాదేశ్ బోర్డు మాత్రం వైఖరిని మార్చుకోవడంలో లేదు. సాధ్యమైన పరిష్కారం కోసం ప్రయత్నాలు చేస్తూనే ఉంటామని బోర్డు తెలిపింది. మెగా టోర్నీ షెడ్యూల్ ఖరారు చేసిన నేపథ్యంలో అన్ని జట్లు ఆ ప్రకారమే ఆడాల్సి ఉంటుందని ఐసీసీ వర్గాలను ఉటంకిస్తూ.. ప్రముఖ వార్తా సంస్థ ఏఎన్ఐ తెలిపింది. ఇదిలా ఉండగా.. ఐసీసీ భారత్లో భద్రతా ఏర్పాట్లపై సంతృప్తి వ్యక్తం చేసింది. ఐసీసీతో జరిగిన సమావేశంలో బీసీబీ మళ్లీ పాత వాదనలే తెరపైకి తీసుకువచ్చింది.
మంగళవారం మళ్లీ బీసీబీ వరల్డ్ కప్ మ్యాచులు ఆడకూడదన్న తమ డిమాండ్ను పునః పరిశీలించాలని ఐసీసీకి విజ్ఞప్తి చేసింది. బంగ్లాదేశ్ వెనక్కి తగ్గడానికి నిరాకరిస్తూ భద్రతపై ఆందోళనను లేవనెత్తింది. అయితే, టోర్నీ షెడ్యూల్ ఇప్పటికే ప్రకటించినట్లుగా ఐసీసీ తమకు తెలిపిందని, ఈ విషయాన్ని పరిశీలించాలని బీసీబీ కోరినట్లు తెలిపింది. బోర్డు వైఖరిలో ఎలాంటి మార్పులు లేవని, సాధ్యమైన పరిష్కారం కోసం చర్చలు కొనసాగించేందుకు ఇరుపక్షాలు అంగీకరించాయని బీసీబీ పేర్కొంది. ఐసీసీతో మంగళవారం జరిగిన వీడియో కాన్ఫరెన్స్లో బీసీబీ అధ్యక్షుడు అమీనుల్ ఇస్లాం, సీఈఓ నిజాముద్దీన్ చౌదరితో పాటు ఇతర సీనియర్ అధికారులు పాల్గొన్నారు. ఈ విషయాన్ని పరిష్కరించేందుకు ఐసీసీతో కలిసి పని చేస్తామని, తమ ఆటగాళ్లు, అధికారులు, సిబ్బంది భద్రతకు కట్టుబడి ఉన్నామని పేర్కొన్నారు. తమ ఆటగాళ్లు భారత్కు వెళ్లడం ఏమాత్రం సురిక్షతం కాదని బీసీబీ పేర్కొంటుండగా.. టోర్నీలో పాల్గొంటే ఏ జట్టుకైనా ప్రత్యక్షంగా ముప్పు ఉందని ఐసీసీ రిస్క్ అసెస్మెంట్ నివేదికలో పేర్కొనలేదు. అయినా, బీసీబీ మాత్రం భారత్కు వెళ్లబోమంటూ పట్టుబడుతుంది. లీగ్ దశలో బంగ్లాదేశ్ మూడు మ్యాచులు కోల్కతాలో, ఒకటి ముంబయిలో ఉండనున్నది.
జనవరి 13, 2026
జనవరి 13, 2026
జనవరి 13, 2026
Developed & Published by TRINETHRA MEDIA HOUSE PVT. LTD,
Sai Madhu Towers, Plot No. 17, Rohini Layout Rd, Jaihind Enclave, Madhapur, Hyderabad, Telangana 500081.
Copyright © 2025 . All rights reserved. - Powered by : Veegam