Satavahana Express | జములాపురం ఉత్సవాలు.. వేళ శాతవాహన ఎక్స్‌ప్రెస్‌కు స్పెష‌ల్ హాల్ట్‌

Satavahana Express | జములాపురం వేంకటేశ్వరస్వామి వార్షిక ఉత్సవాలకు వచ్చే భక్తుల సౌకర్యార్థం విజయవాడ–సికింద్రాబాద్ మధ్య నడిచే శాతవాహన ఇంటర్‌సిటీ ఎక్స్‌ప్రెస్‌కు దక్షిణ కోస్తా రైల్వే తాత్కాలికంగా అదనపు హాల్ట్ కల్పించింది. ఇవాళ్టి నుంచి వరుసగా మూడు రోజుల పాటు ఈ ప్రత్యేక నిలుపుదల అమల్లో ఉండనుంది. విజయవాడ–సికింద్రాబాద్ రైలుమార్గంలో తెలంగాణలోని ఖమ్మం జిల్లా ఎర్రుపాలెం రైల్వే స్టేషన్‌కు సమీపంలో జములాపురం క్షేత్రం ఉంది.

ఉత్సవాల సందర్భంగా ఆంధ్రప్రదేశ్, తెలంగాణ రాష్ట్రాల నుంచి వేలాదిగా భక్తులు తరలివచ్చే అవకాశం ఉండటంతో వారి ప్రయాణాన్ని సులభతరం చేయాలనే ఉద్దేశంతో ఈ నిర్ణయం తీసుకున్నట్లు దక్షిణ కోస్తా రైల్వే వెల్లడించింది. ఉత్సవాల కాలంలో మాత్రమే ఈ ప్రత్యేక హాల్ట్ అందుబాటులో ఉంటుందని, ఈ నెల 4వ తేదీ నుంచి శాతవాహన ఇంటర్‌సిటీ ఎక్స్‌ప్రెస్ సాధారణ షెడ్యూల్ ప్రకారమే నడుస్తుందని అధికారులు స్పష్టం చేశారు. కాబట్టి ప్రయాణికులు తమ ప్రయాణ ప్రణాళికలను ఈ మార్పుకు అనుగుణంగా రూపొందించుకోవాలని సూచించారు. ప్రయాణికుల అవసరాలు, రద్దీ పరిస్థితులను దృష్టిలో ఉంచుకుని అవసరమైనప్పుడు రైళ్ల నిలుపుదల, ఇతర సౌకర్యాల విషయంలో మార్పులు చేపడుతున్నామని దక్షిణ కోస్తా రైల్వే అధికారులు పేర్కొన్నారు.