Satyavathi Rathod | వ్యవసాయ వర్సిటీలో వీసీ ఆగడాలు: బాధితురాలికే బదిలీ శిక్షా?

• రేవంత్ సర్కార్‌పై సత్యవతి రాథోడ్ నిప్పులు

Satyavathi Rathod | త్రినేత్ర న్యూస్ : హైదరాబాద్‌లోని ప్రతిష్టాత్మక ప్రొఫెసర్ జయశంకర్ వ్యవసాయ విశ్వవిద్యాలయంలో మహిళా ప్రొఫెసర్‌పై సాక్షాత్తూ వైస్ ఛాన్సలర్ (వీసీ) లైంగిక వేధింపులకు పాల్పడ్డారన్న అంశం రాష్ట్రవ్యాప్తంగా తీవ్ర కలకలం రేపుతోంది. ఈ ఘటనపై తెలంగాణ భవన్‌లో జరిగిన ప్రెస్ మీట్‌లో మాజీ మంత్రి సత్యవతి రాథోడ్, బీఆర్ఎస్ లీగల్ సెల్ ప్రతినిధి లలితా రెడ్డి తీవ్రస్థాయిలో ధ్వజమెత్తారు. రాష్ట్రంలో మహిళా రక్షణ పూర్తిగా గాలికి కొట్టుకుపోయిందని, సీఎం రేవంత్ రెడ్డే హోం శాఖను పర్యవేక్షిస్తున్నప్పటికీ మహిళలకు రక్షణ కరువైందని వారు మండిపడ్డారు.

డీజీపీ, గవర్నర్‌కు 7 పేజీల లేఖ రాసినా నో ఎఫ్ఐఆర్

బాధిత మహిళా ప్రొఫెసర్ గవర్నర్‌తో పాటు డీజీపీకి ఏడు పేజీల వివరణాత్మక పిటిషన్ సమర్పించి పది రోజులు గడుస్తున్నా.. కనీసం జీరో ఎఫ్ఐఆర్ (Zero FIR) కూడా నమోదు చేయకపోవడం వెనుక ప్రభుత్వ పెద్దల ఒత్తిడి స్పష్టంగా కనిపిస్తోందని సత్యవతి రాథోడ్ ఆరోపించారు. ఉన్నత విద్యాసంస్థల్లో ప్రొఫెసర్ హోదాలో ఉన్న మహిళకే న్యాయం జరగకపోతే సామాన్య మహిళల పరిస్థితి ఏమిటని ఆమె నిలదీశారు.

ఆరోపణలు ఎదుర్కొంటున్న వ్యక్తిపై చర్యలు శూన్యం.. బాధితురాలికి బదిలీ శిక్ష

లైంగిక వేధింపులకు పాల్పడిన వీసీపై తక్షణ చర్యలు తీసుకోవాల్సింది పోయి, ధైర్యంగా ఫిర్యాదు చేసిన బాధితురాలినే వేరే ప్రాంతానికి ట్రాన్స్‌ఫర్ చేయడం దుర్మార్గమని బీఆర్ఎస్ నేతలు విమర్శించారు. వీసీ మనుషులు ఆ మహిళా ప్రొఫెసర్ కుటుంబాన్ని బెదిరింపులకు గురిచేస్తున్నారని, ఫిర్యాదును వెనక్కి తీసుకుంటే బదిలీని రద్దు చేస్తామంటూ రాజీ ప్రయత్నాలు చేస్తున్నారని సంచలన విషయాలను బయటపెట్టారు.

భూముల వ్యవహారమే రక్షణ కవచమా?

వర్సిటీ పరిధిలోని విలువైన వ్యవసాయ భూములను ప్రభుత్వం ఇతర అవసరాలకు కేటాయించే క్రమంలో సదరు వీసీ పూర్తిగా సహకరిస్తున్నారని, అందుకే కాంగ్రెస్ పెద్దలు అతడిని చట్టపరమైన చర్యల నుంచి కాపాడుతున్నారని సత్యవతి రాథోడ్ తీవ్ర ఆరోపణలు చేశారు. మహిళలను 'మహాలక్ష్ములు' చేస్తామని ప్రకటనలు ఇవ్వడం కాదని, కనీసం కార్యాలయాల్లో వారికి భద్రత కల్పిస్తే చాలని ఎద్దేవా చేశారు.

న్యాయపోరాటం చేస్తాం: బీఆర్ఎస్ లీగల్ సెల్

వర్కింగ్ ప్లేస్‌లో వేధింపులు జరిగినట్లు మహిళ ఫిర్యాదు చేసిన మరుక్షణమే కేసు నమోదు చేయాలని బీఆర్ఎస్ లీగల్ సెల్ ప్రతినిధి లలితా రెడ్డి డిమాండ్ చేశారు. సీఎం రేవంత్ రెడ్డి స్వయంగా ఈ కేసులో జోక్యం చేసుకుని ఉన్నత స్థాయి విచారణకు ఆదేశించాలని, లేనిపక్షంలో బాధితురాలి తరఫున కోర్టులను ఆశ్రయించి దోషులకు తగిన శిక్ష పడే వరకు పోరాడతామని స్పష్టం చేశారు. ఈ సమావేశంలో బీఆర్ఎస్వీ ఉపాధ్యక్షుడు తుంగ బాలు కూడా పాల్గొన్నారు.