Rythu Bharosa Fake Messages | రైతు భరోసా డబ్బులు జమయ్యాయా? ఆ మెసేజ్‌లను అస్సలు నమ్మకండి

• రైతు భరోసా డబ్బులు పడ్డాయా?
• ఆ SMSల వెనుక అసలు నిజం ఇది
• తెలంగాణ వ్యవసాయ శాఖ కీలక హెచ్చరిక

Rythu Bharosa Fake Messages | త్రినేత్ర న్యూస్ : రైతు భరోసా నిధులు విడుదలయ్యాయంటూ రాష్ట్రంలోని పలు జిల్లాల రైతుల ఫోన్లకు వచ్చిన మెసేజ్‌లపై తెలంగాణ వ్యవసాయ శాఖ తీవ్రంగా స్పందించింది. బుధవారం ఉదయం పెద్ద సంఖ్యలో రైతుల మొబైల్స్‌కు ఖాతాల్లో నగదు జమైనట్లు వచ్చిన ఆ సందేశాలు పూర్తిగా నిరాధారమైనవని, వాటిలో ఎలాంటి వాస్తవం లేదని వ్యవసాయ శాఖ సంచాలకులు డాక్టర్ బి. గోపి ఐఏఎస్ అధికారిక ప్రకటన ద్వారా స్పష్టం చేశారు.

సాంకేతిక సంస్థల పరిశీలనలో బయటపడ్డ నిజం

ఈ వ్యవహారం తమ దృష్టికి వచ్చిన వెంటనే అప్రమత్తమైన వ్యవసాయ శాఖ అధికారులు.. సాంకేతిక సహకారం అందించే సెంటర్ ఫర్ డెవలప్‌మెంట్ ఆఫ్ అడ్వాన్స్‌డ్ కంప్యూటింగ్ (C-DAC), నేషనల్ ఇన్ఫర్మేటిక్స్ సెంటర్ (NIC) సంస్థలతో అత్యవసరంగా సమీక్షించారు. అధికారిక సర్వర్ల నుంచి ప్రభుత్వం తరఫున ఎటువంటి నగదు జమ ప్రక్రియ గానీ, అధికారిక మెసేజ్‌లు గానీ జారీ కాలేదని ఈ పరిశీలనలో నిర్ధారించారు.

రంగంలోకి సైబర్ క్రైమ్ పోలీసులు

రైతులను గందరగోళానికి గురిచేసే లక్ష్యంతో ఈ ఫేక్ ఎస్సెమ్మెస్‌లను పంపించిన వారి వెనుక ఉన్న ముఠాలను గుర్తించేందుకు వ్యవసాయ శాఖ వెంటనే సైబర్ క్రైమ్ పోలీసులకు సమాచారం అందించింది. ఈ సందేశాల మూలాలను (టెక్నికల్ సోర్సెస్) కనిపెట్టి, కారణమైన వారిపై కఠిన చట్టపరమైన చర్యలు తీసుకోవాలని విజ్ఞప్తి చేసింది.

అనధికారిక మెసేజ్‌లను, సోషల్ మీడియా పుకార్లను రైతులు ఎట్టిపరిస్థితుల్లోనూ విశ్వసించవద్దని, ఏదైనా ప్రభుత్వ నిర్ణయం అమలైతే అధికారిక మార్గాల ద్వారానే పూర్తి వివరాలు అందుతాయని అధికారులు సూచించారు.