Rain Alert | తెలంగాణ‌కు వ‌ర్ష సూచ‌న‌..! 23 నుంచి మోస్త‌రు వ‌ర్షాలు..!!

Rain Alert | త్రినేత్ర‌.న్యూస్ : తెలంగాణలో ఈ నెల 23 నుంచి 29వ తేదీ వ‌ర‌కు మోస్త‌రు వ‌ర్షాలు( Moderate Rains ) కురిసే అవ‌కాశం ఉంద‌ని న్యూఢిల్లీలోని భార‌త వాతావ‌ర‌ణ శాఖ వెల్ల‌డించింది. క‌ర్ణాట‌క వ్యాప్తంగా విస్తారంగా వ‌ర్షాలు కురిసే అవ‌కాశం ఉన్న‌ప్ప‌టికీ.. తెలంగాణ‌( Telangana ), ఏపీ రీజియ‌న్ల‌లో మోస్త‌రు వ‌ర్షాలే కురియ‌నున్న‌ట్లు వాతావ‌ర‌ణ శాఖ స్ప‌ష్టం చేసింది.

జూలై 23 నుంచి 29 మ‌ధ్య రాష్ట్రంలో సాధార‌ణ కంటే త‌క్కువ‌గానే వ‌ర్ష‌పాతం న‌మోద‌య్యే అవ‌కాశం ఉంద‌ని తెలిపింది. భారీ వ‌ర్షాలు కురియ‌న‌ప్ప‌టికీ, వేడి గాలులు, ఉక్క‌పోత నుంచి ఉప‌శ‌మ‌నం క‌లిగే ఛాన్స్ ఉంద‌ని పేర్కొంది. రాబోయే రోజుల్లో సాధార‌ణ ఉష్ణోగ్ర‌త‌లు న‌మోద‌య్యే అవ‌కాశం ఉంది.

జూలై 24 వరకు బలమైన గాలులు వీస్తాయని హైద‌రాబాద్ వాతావ‌ర‌ణ కేంద్రం సోమవారం హెచ్చరించిన విష‌యం తెలిసిందే. తెలంగాణలోని మిగిలిన జిల్లాల్లోని కొన్ని ప్రాంతాలలో గంటకు 30-40 కిలోమీటర్ల వేగంతో బలమైన ఉపరితల గాలులు వీచే అవకాశం ఉంది అని ఐఎండీ హైదరాబాద్ పేర్కొంది.