Police 30 Act | ఈ నెల 30 వరకు మెదక్ జిల్లాలో సెక్షన్ 30, 30(ఎ) అమలు

Police 30 Act | త్రినేత్ర‌.న్యూస్‌: శాంతి భద్రతలను దృష్టిలో ఉంచుకుని మెద‌క్ జిల్లా (Medak) వ్యాప్తంగా సెక్షన్ 30, 30(ఎ) పోలీస్ యాక్ట్ 1861 (Police 30 Act) అమలులో ఉంటుందని జిల్లా ఎస్పీ డీవీ శ్రీనివాస రావు తెలిపారు. ఈ ఆక్ష‌లు జూన్ 30 వ‌ర‌కు అమ‌లులో ఉంటాయ‌ని చెప్పారు. పోలీసుల ముందస్తు అనుమతి లేకుండా జిల్లాలో ధర్నాలు, రాస్తారోకోలు, నిరసన కార్యక్రమాలు, ర్యాలీలు, పబ్లిక్ మీటింగులు, సభలు, సమావేశాలు నిర్వహించడం నిషేధమన్నారు. అలాగే ప్ర‌జల లేదా ప్రభుత్వ ఆస్తులకు నష్టం కలిగించే చట్టవ్యతిరేక చర్యలు, శాంతిభద్రతలకు విఘాతం కలిగించే కార్య‌క్ర‌మాలు చేప‌ట్ట‌కూడ‌ద‌ని హెచ్చ‌రించారు. ఇలాంటి కార్య‌క్ర‌మాల‌ను ఎట్టి పరిస్థితుల్లోనూ సహించబోమని స్పష్టం చేశారు.

కఠిన చర్యలు..

శాంతిభద్రతల నిర్వహణకు భంగం కలిగించే వ్యక్తులపై చట్టపరంగా కఠిన చర్యలు తీసుకుంటామని హెచ్చరించారు. జిల్లా ప్రజలు, ప్రజా ప్రతినిధులు, వివిధ సంఘాల నాయకులు పోలీసు శాఖ చేపడుతున్న శాంతిభద్రతల చర్యలకు సహకరించాలని జిల్లా ఎస్పీ విజ్ఞప్తి చేశారు.

నిర్మ‌ల్ జిల్లాలోనూ..

నిర్మల్ జిల్లాలో శాంతి భద్రతలను కాపాడడానికి జూన్ ఆఖరి వరకు సెక్ష‌న్ 30 పోలీస్ యాక్ట్ అమలులో ఉంటుందని ఎస్పీ జానకి షర్మిల తెలిపారు. పోలీసుల‌ అనుమతి లేకుండా సభలు, సమావేశాలు, ర్యాలీలు నిర్వహించరాదని, శాంతికి భంగం కల్గించడం, పబ్లిక్‌ స్థలాల్లో డీజేలు, మ్యూజిక్‌లు, ప్రసంగాలు నిషేధమని, చట్ట వ్యతిరేక కార్యక్రమాలు చేపట్టవద్దని ఆమె హెచ్చరించారు. అలాగే క‌త్తులు, చాకులు, దుడ్డు క‌ర్ర‌లు, జెండా క‌ర్ర‌లు, తుపాకులు, పేలుడు ప‌దార్థాలు త‌దిత‌ర నిషేధిత ఆయుధాలు తీసుకెళ్ల‌డం, వినియోగించ‌డం పూర్తిగా నిషేధ‌మ‌న్నారు. ప్రజలు, ప్రజాప్రతినిధులు, వివిధ సంఘాల నాయకులు గమనించి పోలీసులకు సహకరించాలని కోరారు.