Petroleum Dealers Association | పెట్రోల్ డీలర్ల డిమాండ్లపై ఢిల్లీలో కీలక భేటీ: పార్లమెంటరీ ప్యానెల్ ఛైర్మన్‌తో అసోసియేషన్ చర్చలు

Petroleum Dealers Association | త్రినేత్ర.న్యూస్ : గత ఎనిమిదేళ్లుగా పెండింగ్‌లో ఉన్న తమ మార్జిన్ (డీలర్ కమీషన్) పెంపు, ఇతర ప్రధాన సమస్యలను వెంటనే పరిష్కరించాలని కోరుతూ పెట్రోల్ బంక్ డీలర్లు ఢిల్లీ వేదికగా తమ గళం వినిపించారు. యునైటెడ్ పెట్రోలియం డీలర్స్ అసోసియేషన్ ప్రతినిధుల బృందం, మంగళవారం సాయంత్రం పెట్రోలియం, సహజవాయువు పార్లమెంటరీ స్థాయి సంఘం (Parliamentary Standing Committee) ఛైర్మన్ సునీల్ దత్తాత్రే తట్కరేతో సమావేశమైంది.

బీఆర్ఎస్ ఎంపీ, ఎమ్మెల్సీల ఆధ్వర్యంలో..

బీఆర్ఎస్ పార్లమెంటరీ పార్టీ నేత, ఈ కమిటీ సభ్యుడు కూడా అయిన ఎంపీ వద్దిరాజు రవిచంద్ర, తెలంగాణ ఎమ్మెల్సీ తక్కళ్లపల్లి రవీందర్ రావుల ఆధ్వర్యంలో ఈ కీలక భేటీ జరిగింది. ఢిల్లీలోని ఛైర్మన్ సునీల్ తట్కరే నివాసంలో సుమారు గంటపాటు ఈ చర్చలు కొనసాగాయి. అసోసియేషన్ తెలంగాణ శాఖ అధ్యక్షుడు అమరేందర్ రెడ్డి, ప్రధాన కార్యదర్శి వినోద్ తదితరులు తమ సమస్యలను ఛైర్మన్‌కు సుదీర్ఘంగా వివరించారు.

8 ఏళ్లుగా పెరగని మార్జిన్..

పెట్రోల్, డీజిల్ ధరలు పెరుగుతున్నా, నిర్వహణ ఖర్చులు తడిసి మోపెడవుతున్నా.. గత 8 ఏళ్లుగా డీలర్లకు ఇచ్చే 'డీలర్ మార్జిన్' (Dealer Margin) లో మాత్రం ఎలాంటి పెంపు లేదని అసోసియేషన్ సభ్యులు ఆవేదన వ్యక్తం చేశారు. వ్యాపారం నడపడం కష్టంగా మారిందని, తక్షణమే డీలర్ల మార్జిన్ పెంచేలా ఆయిల్ కంపెనీలకు సిఫారసు చేయాలని కోరుతూ ఛైర్మన్‌కు ఒక వినతిపత్రం (Memorandum) అందజేశారు.

ఈ ప్రతినిధి బృందంలో కేవలం తెలంగాణ నుంచే కాకుండా గుజరాత్, పశ్చిమ బెంగాల్, కేరళ, బీహార్, తమిళనాడు, హర్యానా, ఢిల్లీ తదితర రాష్ట్రాలకు చెందిన పెట్రోల్ డీలర్స్ అసోసియేషన్ నాయకులు కూడా పాల్గొనడం గమనార్హం. డీలర్ల న్యాయమైన డిమాండ్లపై పార్లమెంటరీ కమిటీ సానుకూలంగా స్పందిస్తుందని వారు ఆశిస్తున్నారు.