Dog Bite Cases Telangana | తెలంగాణలో ఐదేళ్లలో 14.88 లక్షల మందిపై కుక్కల దాడి: ఆర్టీఐ నివేదికలో సంచలన నిజాలు

Dog Bite Cases Telangana | త్రినేత్ర.న్యూస్ : తెలంగాణ రాష్ట్రంలో కుక్కకాటు, పాము కాటు బాధితుల వివరాలపై కీలక సమాచారం వెలుగులోకి వచ్చింది. 'యూత్ ఫర్ యాంటీ కరప్షన్' సంస్థ ఫౌండర్ రాజేంద్ర పల్నాటి సమాచార హక్కు చట్టం (RTI) ద్వారా కోరిన వివరాలకు రాష్ట్ర ఆరోగ్య, కుటుంబ సంక్షేమ శాఖ సమాధానమిచ్చింది.

కుక్కకాటు బాధితుల గణాంకాలు

ప్రభుత్వ నివేదిక ప్రకారం, 2020 నుంచి జూలై 2025 వరకు తెలంగాణలోని ప్రభుత్వ ప్రాథమిక ఆరోగ్య కేంద్రాల (PHCs) పరిధిలో మొత్తం 14,88,781 మంది కుక్కకాటుకు గురయ్యారు. వీరి చికిత్స కోసం ప్రభుత్వం మొత్తం 36,07,989 ఆంటీ రాబిస్ వ్యాక్సిన్ (ARV) డోసులను పంపిణీ చేసినట్లు వెల్లడించింది.

పాముకాటు కేసులు

అదే కాలంలో (2020 - జూలై 2025) రాష్ట్రవ్యాప్తంగా 21,466 మంది పాముకాటుకు గురయ్యారు. వీరికి 53,942 పాము కాటు నిరోధక మందు (ASV) డోసులను అందజేసినట్లు ప్రభుత్వం పేర్కొంది.

అన్ని సెంటర్లలో టీకాలు అందుబాటులో..

రాష్ట్రంలోని మొత్తం 636 ప్రాథమిక ఆరోగ్య కేంద్రాల్లో పాము కాటు, కుక్క కాటు నిరోధక టీకాలు తగినన్ని అందుబాటులో ఉన్నాయని, ఎక్కడా కొరత లేదని ఆరోగ్య శాఖ తన నివేదికలో స్పష్టం చేసింది.

వీధి కుక్కల నియంత్రణ అవసరం: రాజేంద్ర పల్నాటి

ఈ గణాంకాలపై 'యూత్ ఫర్ యాంటీ కరప్షన్' ఫౌండర్ రాజేంద్ర స్పందిస్తూ.. పల్లె నుంచి పట్నం వరకు కుక్కకాటు బాధితుల సంఖ్య రోజురోజుకూ పెరుగుతుండటం ఆందోళనకరమన్నారు. కేవలం చికిత్స అందించడమే కాకుండా, వీధి కుక్కల నియంత్రణకు ప్రభుత్వం జంతు జనన నియంత్రణ (ABC) కార్యక్రమాలను వేగవంతం చేయాలని కోరారు. అలాగే, వీధి కుక్కలను దత్తత తీసుకునేలా ప్రజల్లో అవగాహన కల్పించాలని ఆయన ప్రభుత్వానికి సూచించారు.