New Coal Exchange Policy | నాణ్యత పెంచి.. ఖర్చు తగ్గించండి: కొత్త బొగ్గు విధానంపై సింగరేణికి కేంద్ర మంత్రి కిషన్ రెడ్డి దిశానిర్దేశం

New Coal Exchange Policy | త్రినేత్ర.న్యూస్ : భారతదేశాన్ని ఇంధన రంగంలో స్వయం సమృద్ధి దిశగా ముందుకు తీసుకెళ్లే క్రమంలో ప్రభుత్వ రంగ బొగ్గు సంస్థలు తమ పనితీరును మరింత మెరుగుపరుచుకోవాలని కేంద్ర మంత్రి జి. కిషన్ రెడ్డి పిలుపునిచ్చారు. మంగళవారం ఆయన న్యూఢిల్లీ నుంచి దేశవ్యాప్త బొగ్గు కంపెనీల పనితీరుపై వీడియో కాన్ఫరెన్స్ ద్వారా ఉన్నతస్థాయి సమీక్ష నిర్వహించారు. ఈ సందర్భంగా సింగరేణి సంస్థ భవిష్యత్ కార్యాచరణ, నూతన విధానాలపై ఆయన కీలక సూచనలు చేశారు.

'కోల్ ఎక్స్ఛేంజ్' తో పెరుగుతున్న పోటీ

దేశంలోని బొగ్గు వినియోగదారులు తమకు నచ్చిన చోట, నచ్చిన గ్రేడు బొగ్గును కొనుగోలు చేసేందుకు వీలుగా కేంద్రం త్వరలో "నేషనల్ కోల్ ఎక్స్ఛేంజ్" (National Coal Exchange) ద్వారా కొత్త అమ్మకపు విధానాన్ని ప్రవేశపెడుతోందని కిషన్ రెడ్డి స్పష్టం చేశారు. ఈ నూతన విధానం వల్ల మార్కెట్లో తీవ్ర పోటీ నెలకొంటుందని, దాన్ని తట్టుకుని ప్రభుత్వ సంస్థలు సత్తా చాటాలంటే నాణ్యతా ప్రమాణాలను కచ్చితంగా పాటించాల్సిందేనని తేల్చి చెప్పారు. ఉత్పత్తి వ్యయాన్ని (Cost of Production) వీలైనంత వరకు తగ్గించుకుని, నాణ్యమైన బొగ్గును తక్కువ ధరకు విక్రయించడం ద్వారా మాత్రమే మార్కెట్లను కాపాడుకోగలమని ఆయన సింగరేణి అధికారులకు సూచించారు. కొత్త గనుల ఏర్పాటులో నిర్దేశించుకున్న లక్ష్యాలను వేగంగా చేరుకోవాలని ఆదేశించారు.

ఈ ఏడాది 5 కొత్త గనులు: సింగరేణి సీఎండీ

హైదరాబాద్‌లోని సింగరేణి భవన్ నుంచి ఈ వీడియో కాన్ఫరెన్స్‌లో పాల్గొన్న సంస్థ సీఎండీ డాక్టర్ బుద్దప్రకాష్ జ్యోతి పవర్ పాయింట్ ప్రజెంటేషన్ ద్వారా సంస్థ భవిష్యత్తు ప్రణాళికలను కేంద్ర మంత్రికి వివరించారు. ఈ ఏడాది ఐదు కొత్త ఓపెన్ కాస్ట్ గనులను ప్రారంభించేందుకు అవసరమైన అటవీ, పర్యావరణ అనుమతుల కోసం ముమ్మర ప్రయత్నాలు చేస్తున్నట్లు ఆయన తెలిపారు.

కొత్తగా ప్రారంభించనున్న గనులు ఇవే

• జేకే ఓపెన్ కాస్ట్ (ఇల్లందు)
• మణుగూరు ఓపెన్ కాస్ట్ ఎక్స్‌టెన్షన్
• రామగుండం ఓపెన్ కాస్ట్ 1 ఫేజ్ 3
• గోలేటి ఓపెన్ కాస్ట్
• ఆర్కే ఓపెన్ కాస్ట్

సీపీఎస్‌యూ (CPSU) హోదా ఇవ్వండి..

వినియోగదారులకు మరింత నాణ్యమైన బొగ్గును అందించేందుకు అన్ని చర్యలు తీసుకుంటున్నామని, ఎండాకాలం దృష్ట్యా బొగ్గు నిల్వలు లేకుండా ఎప్పటికప్పుడు రవాణా పెంచుతున్నట్లు సీఎండీ తెలిపారు. అయితే, కాంపెన్సేటరీ అఫారెస్టేషన్ (CA) కు అవసరమైన ప్రత్యామ్నాయ అటవీ భూమి అందుబాటులో లేనందున కొత్త గనుల ప్రారంభంలో జాప్యం జరుగుతోందని ఆయన మంత్రి దృష్టికి తెచ్చారు. ఈ సమస్యను అధిగమించి సింగరేణిలో కొత్త గనులను వీలైనంత త్వరగా ప్రారంభించేందుకు వీలుగా.. సింగరేణి సంస్థకు కేంద్ర ప్రభుత్వ రంగ సంస్థ (CPSU) హోదా కల్పించాల్సిన అవసరం ఎంతైనా ఉందని సీఎండీ డాక్టర్ బుద్దప్రకాష్ జ్యోతి విజ్ఞప్తి చేశారు.

ఈ సమీక్షా సమావేశంలో సింగరేణి భవన్ నుంచి సంస్థ డైరెక్టర్లు ఎల్వీ సూర్యనారాయణ (ఆపరేషన్స్), కె.వేంకటేశ్వర్లు (ప్లానింగ్ అండ్ ప్రాజెక్ట్స్), తిరుమలరావు (ఈ అండ్ ఎం), ఈడీ (కోల్ మూవ్మెంట్) బి.వెంకన్న, జీఎం (కో-ఆర్డినేషన్, మార్కెటింగ్) టి.శ్రీనివాస్ తదితరులు పాల్గొన్నారు.