CM Revanth Miryalaguda Visit | రేపు మిర్యాలగూడకు సీఎం రేవంత్.. రూ. 200 కోట్లతో ఇంటిగ్రేటెడ్ స్కూల్‌కు శంకుస్థాపన

CM Revanth Miryalaguda Visit | త్రినేత్ర.న్యూస్ : తెలంగాణ ముఖ్యమంత్రి రేవంత్ రెడ్డి బుధవారం నాడు ఫిబ్రవరి 4న నల్గొండ జిల్లా మిర్యాలగూడ నియోజకవర్గంలో పర్యటించనున్నారు. నియోజకవర్గ అభివృద్ధి పనులతో పాటు, ప్రతిష్టాత్మక విద్యా సంస్థల ఏర్పాటుకు ఆయన శ్రీకారం చుట్టనున్నారు. సీఎం పర్యటనకు సంబంధించి అధికార యంత్రాంగం ఇప్పటికే అన్ని ఏర్పాట్లు పూర్తి చేసింది.

యంగ్ ఇండియా స్కూల్‌కు శంకుస్థాపన

రాష్ట్ర ప్రభుత్వం అత్యంత ప్రతిష్టాత్మకంగా భావిస్తున్న ‘యంగ్ ఇండియా ఇంటిగ్రేటెడ్ రెసిడెన్షియల్ స్కూల్’ (Young India Integrated Residential School) నిర్మాణానికి సీఎం భూమిపూజ చేయనున్నారు. సుమారు రూ.200 కోట్ల భారీ వ్యయంతో ఈ పాఠశాలను ఏర్పాటు చేయనున్నారు. పేద విద్యార్థులకు కార్పొరేట్ స్థాయి విద్యను అందించడమే లక్ష్యంగా ఈ ప్రాజెక్టును చేపడుతున్నారు.

మహిళా సంఘాలకు ఆర్ధిక చేయూత: పర్యటనలో భాగంగా ముఖ్యమంత్రి మహిళా సాధికారతపై ప్రత్యేక దృష్టి సారించనున్నారు. నియోజకవర్గంలోని పొదుపు సంఘాల (డ్వాక్రా) మహిళలకు భారీ ఎత్తున చెక్కులను పంపిణీ చేయనున్నారు.

భారీ బహిరంగ సభ: అభివృద్ధి కార్యక్రమాల అనంతరం ఏర్పాటు చేసిన భారీ బహిరంగ సభలో సీఎం రేవంత్ రెడ్డి పాల్గొంటారు. ఈ వేదిక ద్వారా ప్రభుత్వ సంక్షేమ పథకాలు, భవిష్యత్ కార్యాచరణపై ప్రజలనుద్దేశించి ప్రసంగించనున్నారు.

ముఖ్యమంత్రి పర్యటన నేపథ్యంలో పోలీసులు కట్టుదిట్టమైన భద్రతా ఏర్పాట్లు చేశారు. కాంగ్రెస్ శ్రేణులు సీఎంకు ఘన స్వాగతం పలికేందుకు సిద్ధమవుతున్నాయి.