Gaddam Vamshi Krishna | యానిమేష‌న్‌, ఏఐలో శిక్ష‌ణ‌.. యువ‌త‌కు భారీగా ఉపాధి అవ‌కాశాలు: ఎంపీ గ‌డ్డం వంశీకృష్ణ‌

Gaddam Vamshi Krishna | త్రినేత్ర‌.న్యూస్‌: యానిమేషన్, విజువ‌ల్ ఎఫెక్ట్స్‌, గేమింగ్, కామిక్స్, కృత్రిమ మేధస్సు వంటి ఆధునిక రంగాల్లో శిక్షణ పొందితే యువతకు విస్తృత ఉపాధి అవకాశాలు ల‌భిస్తాయ‌ని పెద్ద‌ప‌ల్లి ఎంపీ గ‌డ్డం వంశీకృష్ణ (Gaddam Vamshi Krishna) అన్నారు. గ్రామీణ విద్యార్థులు కూడా ప్రపంచ స్థాయి సాంకేతిక పరిజ్ఞానాన్ని నేర్చుకునే వేదికగా ఈ కేంద్రాలు నిలుస్తాయని చెప్పారు. గ్రామీణ యువతకు ఆధునిక సాంకేతిక నైపుణ్యాలు అందించాలనే లక్ష్యంతో మంథనిలో టాస్క్–ఏవీజీసీ అండ్‌ కృత్రిమ మేధస్సు కేంద్రం, టాస్క్–సీట్రిఎల్ఎస్ ప్రతిభా కేంద్రాల‌ను మంత్రి శ్రీధ‌ర్ బాబుతో క‌లిసి ఎంపీ వంశీకృష్ణ ప్రారంభించారు. అనంత‌రం మాట్లాడుతూ.. తెలంగాణ అకాడ‌మీ ఫ‌ర్ స్కిల్ అండ్ నాలెడ్జ్ (TASK), CtrlS Datacenters Ltd సంయుక్తంగా ఏర్పాటు చేసిన ఈ ప్రతిభా కేంద్రంలో పరిశ్రమ అవసరాలకు అనుగుణంగా శిక్షణ అందుతుందన్నారు. డిజిటల్ ప్రపంచానికి గ్రామీణ యువతను దగ్గర చేయడమే ప్రధాన ఉద్దేశ‌మని చెప్పారు.

ఇప్పటివరకు కృత్రిమ మేధస్సు వంటి కోర్సుల కోసం హైదరాబాద్, బెంగళూరు వంటి దూర ప్రాంతాలకు వెళ్లాల్సిన పరిస్థితి ఉండేదని, ఇప్పుడు అలాంటి అవసరం లేకుండా మంథనిలోనే ఈ అవకాశాలు అందుబాటులోకి రావడం ఆనందమ‌ని చెప్పారు. మంత్రి శ్రీధర్ బాబు ఆలోచనతో ఈ కేంద్రాన్ని మంథనిలో ఏర్పాటు చేయడం ద్వారా ప్రాంత అభివృద్ధికి ఎంతో దోహదపడుతుందని వెల్ల‌డించారు. యువత, విద్యార్థులు ఈ టాస్క్ కేంద్రాన్ని విస్తృతంగా వినియోగించుకోవాలని కోరారు.