Mulugu Sand Mafia | ములుగులో తల్లి ఇసుక దందా.. కొడుకు బెట్టింగ్ మాఫియా

• సీఎం రేవంత్ రెడ్డి పర్యటన వేళ కాంగ్రెస్ ప్రభుత్వంపై బీఆర్ఎస్ నేత వై.సతీష్ రెడ్డి సంచలన ఆరోపణలు
• ములుగులో ఎన్జీటీ (NGT) స్టే ఉన్నా మంత్రుల అండతో అక్రమ ఇసుక తవ్వకాలు జరుగుతున్నాయని విమర్శ
• మంత్రి సీతక్క అండతో ఇసుక దందా, ఆమె కుమారుడు సూర్య ఆధ్వర్యంలో పోలీస్ స్టేడియంలోనే బెట్టింగ్ మాఫియా
• హోం మంత్రి హోదాలో ఉన్న సీఎం రేవంత్ తక్షణమే స్టేడియం లీజును రద్దు చేసి చర్యలు తీసుకోవాలని డిమాండ్

Mulugu Sand Mafia | త్రినేత్ర.న్యూస్ : తెలంగాణ భవన్ (Telangana Bhavan) వేదికగా కాంగ్రెస్ ప్రభుత్వంపై, ముఖ్యంగా మంత్రులు సీతక్క, పొంగులేటి శ్రీనివాస్ రెడ్డిలపై బీఆర్ఎస్ నేత వై.సతీష్ రెడ్డి తీవ్ర ఆరోపణలు చేశారు. ముఖ్యమంత్రి రేవంత్ రెడ్డి (CM Revanth Reddy) ములుగు, హన్మకొండ జిల్లాల పర్యటన నేపథ్యంలో ముందస్తు అరెస్టులు చేయడాన్ని ఆయన తప్పుబట్టారు. యునెస్కో గుర్తింపు పొందిన రామప్ప, ఆసియాలోనే అతిపెద్ద మేడారం జాతరతో పేరుగాంచిన ములుగు.. ఇప్పుడు కాంగ్రెస్ పాలనలో అవినీతి, ఇసుక కబ్జాలు, బెట్టింగ్ మాఫియాలకు అడ్డాగా మారిందని మండిపడ్డారు.

మంత్రుల కనుసన్నల్లో ఇసుక మాఫియా

సీతమ్మ సాగర్ లో ఇసుక తవ్వకాలకు అనుమతులు రద్దు చేయాలని కోరినా ప్రభుత్వం పట్టించుకోవడం లేదన్నారు. ఎన్జీటీ (NGT) స్టే ఆర్డర్ ఇచ్చినా కూడా, ములుగు ఇన్‌ఛార్జి మంత్రి పొంగులేటి శ్రీనివాస్ రెడ్డి, స్థానిక మంత్రి సీతక్క అండదండలతోనే ఇక్కడ అక్రమ ఇసుక రవాణా సాగుతోందని ఆరోపించారు. గిరిజనులకు దక్కాల్సిన ఆదాయాన్ని మంత్రులే కొల్లగొడుతున్నారని, ఏకంగా డీఎఫ్ఓ (DFO) లెటర్ ను సైతం ఫోర్జరీ చేసి క్వారీలకు అనుమతులు తెచ్చుకున్నారని సతీష్ రెడ్డి ఆరోపించారు. భద్రాద్రి కొత్తగూడెంలో ఏకంగా 7 కోట్ల క్యూబిక్ మీటర్ల ఇసుక దోపిడీ జరుగుతోందని, ఈ అవినీతిలో మంత్రులకు వాటాలు లేకపోతే ఎందుకు చర్యలు తీసుకోవడం లేదని నిలదీశారు.

కొడుకు సూర్య ఆధ్వర్యంలో బెట్టింగ్ దందా

ఒకవైపు తల్లి సీతక్క ఇసుక మాఫియాతో సహజ వనరులను దోచుకుంటుంటే, మరోవైపు ఆమె కుమారుడు సూర్య ములుగు ప్రీమియర్ లీగ్ (Mulugu Premier League) పేరుతో యువత జేబులు కొల్లగొడుతున్నారని ఆయన విమర్శించారు. ఏకంగా పోలీస్ స్టేడియంలోనే (Police Stadium) దేవుళ్ల పేర్లతో క్రికెట్ టీమ్స్ పెట్టి బాల్ టూ బాల్ బెట్టింగ్ (Betting) నిర్వహిస్తున్నారని ఆరోపించారు. సాక్షాత్తూ ఎస్పీ చేతుల మీదుగానే ఈ క్రికెట్ పోటీలు ప్రారంభం కావడం గమనార్హమన్నారు. ఆన్‌లైన్ బెట్టింగ్ నిజమో కాదో అని గూగుల్ సెర్చ్ (Google search) చేస్తే ఆధారాలతో సహా దొరికిందని ఆయన వెల్లడించారు. కోట్ల రూపాయల్లో జరుగుతున్న ఈ దందా వల్ల యువత తీవ్రంగా నష్టపోతోందని ఆవేదన వ్యక్తం చేశారు.

సీఎం రేవంత్ చర్యలు తీసుకోవాలి

ముఖ్యమంత్రి రేవంత్ రెడ్డి.. ఈ క్రికెట్ మ్యాచ్ లు జరిగే ప్రదేశానికి కూతవేటు దూరంలోనే కొత్త కలెక్టర్ కార్యాలయాన్ని ప్రారంభిస్తున్నారని సతీష్ రెడ్డి గుర్తుచేశారు. హోం మంత్రిగా కూడా ఉన్న సీఎం తక్షణమే ఈ బెట్టింగ్ వ్యవహారంపై దృష్టి సారించాలని, యువతను పెడదారి పట్టిస్తున్న పోలీస్ స్టేడియం లీజును రద్దు చేసి బాధ్యులపై కఠిన చర్యలు తీసుకోవాలని ఆయన డిమాండ్ చేశారు.