Minister Uttam Kumar Reddy | హైద‌రాబాద్‌లో అందుబాటులోకి అంత‌ర్జాతీయ న్యాయ నిపుణులు

• కావేటి ఇంటర్నేషనల్ ఏఐ ఫర్మ్‌ను ప్రారంభించిన మంత్రి ఉత్తమ్ కుమార్ రెడ్డి

Minister Uttam Kumar Reddy | త్రినేత్ర‌.న్యూస్ : అంతర్జాతీయ న్యాయ నైపుణ్యాలను ఆర్టిఫిషియల్ ఇంటెలిజెన్స్ (ఏఐ) ఆధారిత సేవలతో అనుసంధానిస్తూ ఏర్పాటు చేసిన కావేటి ఇంటర్నేషనల్ ఏఐ ఫర్మ్ హైదరాబాద్ కార్యాలయాన్ని సోమవారం నీటిపారుదల శాఖ మంత్రి ఉత్తమ్ కుమార్ రెడ్డి ప్రారంభించారు.

ఈ సందర్భంగా మంత్రి మాట్లాడుతూ.. వివిధ వృత్తిపరమైన రంగాల్లో ఏఐ వినియోగం వేగంగా పెరుగుతోందని, దీనివల్ల అపారమైన అవకాశాలతో పాటు సాంకేతికతను బాధ్యతాయుతంగా, నైతికంగా, పారదర్శకంగా వినియోగించాల్సిన అవసరం కూడా ఏర్పడుతోందని అన్నారు. బలమైన టెక్నాలజీ వ్యవస్థ, నైపుణ్యం కలిగిన మానవ వనరులు, అంతర్జాతీయ అనుసంధానం వంటి ప్రత్యేకతలు హైదరాబాద్‌కు ఉన్నాయని తెలిపారు. వీటి ఆధారంగా ఏఐ ఆధారిత ప్రొఫెషనల్, న్యాయ సేవలకు హైదరాబాద్‌ను కీలక కేంద్రంగా అభివృద్ధి చేసే అవకాశం ఉందన్నారు. తెలంగాణను అంతర్జాతీయ నిపుణులతో అనుసంధానించే ఇలాంటి కార్యక్రమాలు రాష్ట్రానికి ప్రపంచస్థాయిలో మరింత గుర్తింపు తీసుకువస్తాయని పేర్కొన్నారు.

కావేటి లా ఫర్మ్, న్యూయార్క్ వ్యవస్థాపకుడు, మేనేజింగ్ అటార్నీ, అలాగే కావేటి ఇంటర్నేషనల్ ఏఐ ఫర్మ్ వ్యవస్థాపకుడు డాక్టర్ శ్రీనివాస్ రావు కావేటిని మంత్రి అభినందించారు. తెలంగాణకు చెందిన డాక్టర్ కావేటి 35 సంవత్సరాలకు పైగా అంతర్జాతీయ న్యాయ రంగంలో సేవలందిస్తూ భారత్, అమెరికా, బ్రిటన్, ఆస్ట్రేలియా, కెనడా, యూఏఈ తదితర దేశాల్లో సరిహద్దు దాటి జరిగే న్యాయ వ్యవహారాల్లో అనుభవం కలిగి ఉన్నారని తెలిపారు.
హైదరాబాద్‌లో ఏర్పాటు చేసిన ఈ కొత్త కేంద్రం ఇంటర్నేషనల్ లీగల్ యాక్సెస్ హ‌బ్‌గా పనిచేయనుంది. దీని ద్వారా వ్యక్తులు, వ్యాపార సంస్థలు, ఎన్నారైలు, పెట్టుబడిదారులు వివిధ దేశాల్లో న్యాయ సేవలు అందించే న్యాయవాదులు, న్యాయ నిపుణులతో అనుసంధానం కావచ్చు. అంతర్జాతీయ న్యాయ నిపుణులు హైదరాబాద్‌కు వచ్చి క్లయింట్లతో సంప్రదింపులు, వ్యూహాత్మక సమావేశాలు నిర్వహించే అవకాశాన్ని కూడా ఈ కేంద్రం కల్పించనుంది.

అమెరికాలో ఇమ్మిగ్రేషన్, కుటుంబ న్యాయం, సివిల్ లిటిగేషన్, అంతర్జాతీయ విడాకులు, కార్పొరేట్, క్రిమినల్ లా తదితర సేవలతో పాటు బ్రిటన్‌లో ఇమ్మిగ్రేషన్, కుటుంబ న్యాయం, సివిల్ లిటిగేషన్ సేవలను ఫర్మ్ అందించనుంది. యూఏఈలో వర్కర్స్ కాంపెన్సేషన్, ఉద్యోగ సంబంధిత అంశాలు, ఒప్పంద వివాదాలకు సంబంధించిన సేవలు అందుబాటులో ఉంటాయి. భారత్‌లో కంపెనీ, ట్రేడ్‌మార్క్ చట్టాలు, సివిల్, క్రిమినల్, కార్మిక చట్టాలు, రిట్ పిటిషన్లు, రుణ వసూలు, వినియోగదారుల వ్యవహారాలు, స్పెషల్ లీవ్ పిటిషన్లు, రియల్ ఎస్టేట్ తదితర అంశాల్లో న్యాయ సేవలు అందించనున్నట్లు సంస్థ తెలిపింది.

హైదరాబాద్ కేంద్రంలో న్యాయ సేవల్లో ఏఐను బాధ్యతాయుతంగా వినియోగించడంపై ప్రధానంగా దృష్టి సారించనున్నారు. న్యాయ పరిశోధన, సమాచార సేకరణ, పత్రాల విశ్లేషణ, డిస్కవరీ, క్లిష్టమైన అంతర్జాతీయ కేసుల ప్రాథమిక మ్యాపింగ్ వంటి పనుల్లో ఏఐను సహాయక సాధనంగా వినియోగించనున్నారు. అయితే ఏఐను న్యాయవాదులకు ప్రత్యామ్నాయంగా కాకుండా సహాయక సాధనంగా మాత్రమే ఉపయోగిస్తామని సంస్థ స్పష్టం చేసింది. న్యాయ సలహాలు, ప్రాతినిధ్యం వంటి సేవలను సంబంధిత చట్టాలు, వృత్తిపరమైన నైతిక ప్రమాణాలకు అనుగుణంగా అర్హత కలిగిన న్యాయ నిపుణులే అందిస్తారని పేర్కొంది. సాంకేతికత ద్వారా సేవలకు ఉన్న అడ్డంకులను తగ్గించి, సామర్థ్యాన్ని పెంచి, ప్రత్యేక నైపుణ్యం కలిగిన సేవలను మరింత విస్తృత వర్గాలకు అందుబాటులోకి తీసుకురావాలని ఉత్తమ్ కుమార్ రెడ్డి అన్నారు. హైదరాబాద్‌లోని టెక్నాలజీ సామర్థ్యాలను అంతర్జాతీయ ప్రొఫెషనల్ నెట్‌వర్క్‌లతో అనుసంధానించే ఇలాంటి కార్యక్రమాలు తెలంగాణను ఆవిష్కరణలు, జ్ఞానాధారిత సేవలకు అంతర్జాతీయ గమ్యస్థానంగా తీర్చిదిద్దడంలో దోహదపడతాయని ఆయన విశ్వాసం వ్యక్తం చేశారు.