త్రినేత్ర News Logo
DIGITAL-NEWS

KTR Tweet on CM Revanth Reddy | జై తెలంగాణ అనలేని ఉద్యమ ద్రోహివి నువ్వు.. అమరుల గురించి మాట్లాడే అర్హత నీకెక్కడది?

సిరిసిల్ల, సిద్ధిపేట సభల్లో సీఎం వ్యాఖ్యలపై బీఆర్ఎస్ నేత కేటీఆర్ తీవ్రంగా మండిపడ్డారు. ఎక్స్ వేదికగా ఆయన చేసిన విమర్శలు రాజకీయంగా కలకలం రేపుతున్నాయి.

J

Telangana | Published On Nov 19, 2026, 11.27 pm IST

KTR Tweet on CM Revanth Reddy | జై తెలంగాణ అనలేని ఉద్యమ ద్రోహివి నువ్వు.. అమరుల గురించి మాట్లాడే అర్హత నీకెక్కడది?

సంక్షిప్త సారాంశం

సిరిసిల్ల, సిద్ధిపేట సభల్లో ముఖ్యమంత్రి చేసిన వ్యాఖ్యలపై ఎక్స్ వేదికగా బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర స్థాయిలో విరుచుకుపడ్డారు. రాష్ట్రంలో కరువు, నీళ్ల దోపిడీతో రైతులు అల్లాడుతుంటే పట్టించుకోకుండా సీఎం అనుచిత భాష మాట్లాడుతున్నారని కేటీఆర్ విమర్శించారు. సంక్షేమ పథకాలకు పాతరేసి అవినీతికి పాల్పడుతున్న కాంగ్రెస్ ప్రభుత్వానికి రాబోయే ఎన్నికల్లో ప్రజలే బుద్ధి చెబుతారని ఆయన హెచ్చరించారు. ఉద్యమ నేత కేసీఆర్ ఒక కల్పవృక్షం అయితే, ప్రస్తుత ముఖ్యమంత్రి ఒక కలుపు మొక్క అంటూ కేటీఆర్ ఘాటుగా వ్యాఖ్యానించారు.

Advertisement
  • సీఎం వ్యాఖ్యలపై కేటీఆర్ ఫైర్
  • కేసీఆర్ ఒక కల్పవృక్షం, నువ్వొక కలుపు మొక్క
  • ఘాటు ట్వీట్

KTR Tweet on CM Revanth Reddy | త్రినేత్ర న్యూస్ : తెలంగాణ రాజకీయాల్లో మాటల తూటాలు పేలుతున్నాయి. సిరిసిల్ల, సిద్ధిపేట పర్యటనల సందర్భంగా బీఆర్ఎస్ అధినేత కేసీఆర్ లక్ష్యంగా ముఖ్యమంత్రి రేవంత్ రెడ్డి చేసిన వ్యాఖ్యలపై బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ తీవ్ర స్థాయిలో స్పందించారు. సోషల్ మీడియా వేదిక 'ఎక్స్' ద్వారా ఆయన ముఖ్యమంత్రిపై ఘాటు విమర్శలు గుప్పించారు.

రాష్ట్రంలో కరువు పరిస్థితులు, నీళ్ల దోపిడీతో రైతులు, సామాన్య ప్రజలు కన్నీళ్లతో అల్లాడుతుంటే ప్రభుత్వం పట్టించుకోవడం లేదని కేటీఆర్ ఆరోపించారు. ప్రజల కష్టాలను గాలికొదిలేసి, ముఖ్యమంత్రి స్థాయి వ్యక్తి ఇలాంటి భాష మాట్లాడటం ఏంటని ఆయన ప్రశ్నించారు. బాధ్యతగల ముఖ్యమంత్రి ఎవరైనా నాలుగు మంచి పనులు చేసి, ప్రజలకు భరోసా ఇచ్చేలా మాట్లాడాలి తప్ప ఇలా చిల్లర మాటలతో చిందులు తొక్కడం సరికాదని హితవు పలికారు.

నిన్న సిరిసిల్లలో, నేడు సిద్ధిపేటలో ముఖ్యమంత్రి చేసిన వ్యాఖ్యలు అర్థరహితమని కేటీఆర్ మండిపడ్డారు. నిజాలు మాట్లాడే వారిపై నిందలు మోపుతూ, నీళ్ల దోపిడీపై నిద్ర నటిస్తున్నారని విమర్శించారు. గతంలో కనీసం 'జై తెలంగాణ' అని కూడా అనలేని వారికి, తెలంగాణ అమరుల గురించి మాట్లాడే నైతిక అర్హత ఎక్కడిదని ఆయన నిలదీశారు.

కాంగ్రెస్ పాలనపై విమర్శలు ఎక్కుపెడుతూ, సంక్షేమ పథకాలకు పాతరేసి రాష్ట్రంలో అవినీతి జాతర చేస్తున్నారని కేటీఆర్ ఆరోపించారు. అబద్ధాలు, అరుపులతో ఇంకెన్నాళ్లు కాలం వెళ్లదీస్తారని ప్రశ్నించారు. ఈ ప్రభుత్వానికి కాలం దగ్గరపడిందని, ఎన్నికలు ఎప్పుడు వచ్చినా రాష్ట్రంలోని ప్రతి నియోజకవర్గం ఒక సిద్ధిపేట, సిరిసిల్లలా గర్జించి కాంగ్రెస్ పార్టీకి రాజకీయ సమాధి కట్టడం ఖాయమని ఆయన జోస్యం చెప్పారు.

ఉద్యమ శిఖరం కేసీఆర్‌ను దూషించడం ద్వారా కాంగ్రెస్ నేతలు పైశాచిక ఆనందం పొందుతున్నారని కేటీఆర్ ఆగ్రహం వ్యక్తం చేశారు. ఢిల్లీ పెద్దలకు బానిసలుగా మారిన వారికి ఆత్మగౌరవం లేదని విమర్శించారు. "కేసీఆర్ ఒక కల్పవృక్షం అయితే, నువ్వొక కలుపు మొక్క" అంటూ ముఖ్యమంత్రిని ఉద్దేశించి కేటీఆర్ చేసిన వ్యాఖ్యలు ప్రస్తుతం తెలంగాణ రాజకీయ వర్గాల్లో చర్చనీయాంశంగా మారాయి.

Advertisement
Advertisement