త్రినేత్ర News Logo
DIGITAL-NEWS

Khelo India Youth Games 2026 | తెలంగాణలో ‘ఖేలో ఇండియా’ క్రీడా జాతర: 6 నగరాల్లో 8 వేల మంది అథ్లెట్ల సందడి

డిసెంబర్ 11 నుంచి తెలంగాణలో ఖేలో ఇండియా యూత్ గేమ్స్–2026 జరగనున్నాయి. 6 నగరాల్లో 8 వేల మంది పాల్గొనే ఈ క్రీడా వేడుక ఏర్పాట్లపై సీఎస్ కీలక ఆదేశాలిచ్చారు.

J

Telangana | Published On Nov 16, 2026, 6.53 pm IST

Khelo India Youth Games 2026 | తెలంగాణలో ‘ఖేలో ఇండియా’ క్రీడా జాతర: 6 నగరాల్లో 8 వేల మంది అథ్లెట్ల సందడి

సంక్షిప్త సారాంశం

డిసెంబర్ 11 నుంచి 22 వరకు తెలంగాణ వేదికగా జాతీయ స్థాయి 'ఖేలో ఇండియా యూత్ గేమ్స్–2026' క్రీడా పోటీలు జరగనున్నాయి. హైదరాబాద్, హనుమకొండ, ఖమ్మం, కరీంనగర్, నిజామాబాద్, మహబూబ్‌నగర్ నగరాల్లో నిర్వహించే ఈ పోటీల్లో సుమారు 8,000 మంది క్రీడాకారులు పాల్గొంటారు. ఏర్పాట్లపై ప్రభుత్వ ప్రధాన కార్యదర్శి సంజయ్ జాజు, క్రీడా శాఖ మంత్రి వాకిటి శ్రీహరి.. జిల్లా కలెక్టర్లు, మున్సిపల్ కమిషనర్లతో సమీక్ష నిర్వహించారు. విమానాశ్రయాలు, రైల్వే స్టేషన్లలో భారీ ప్రచారంతో పాటు టార్చ్ ర్యాలీలు, మంత్రి అజారుద్దీన్ సహా ప్రముఖ క్రీడాకారులతో విద్యార్థులకు ప్రేరణ కార్యక్రమాలు చేపట్టాలని ఆదేశించారు.

Advertisement
  • ఏర్పాట్లపై సీఎస్ సంజయ్ జాజు కీలక ఆదేశాలు

Khelo India Youth Games 2026 | త్రినేత్ర న్యూస్ : తెలంగాణ మరో ప్రతిష్టాత్మక జాతీయ క్రీడా వేడుకకు ఆతిథ్యం ఇవ్వబోతోంది. డిసెంబర్ 11 నుంచి 22వ తేదీ వరకు రాష్ట్రంలో ‘ఖేలో ఇండియా యూత్ గేమ్స్–2026’ జాతీయ స్థాయి క్రీడా పోటీలు అట్టహాసంగా జరగనున్నాయి. ఈ నేపథ్యంలో పోటీలను విజయవంతంగా నిర్వహించేందుకు అన్ని జిల్లాల్లో సమన్వయంతో పటిష్టమైన ఏర్పాట్లు చేయాలని రాష్ట్ర ప్రభుత్వ ప్రధాన కార్యదర్శి (సీఎస్) సంజయ్ జాజు అధికారులను ఆదేశించారు. సోమవారం హైదరాబాద్ నుంచి జిల్లా కలెక్టర్లు, జీహెచ్‌ఎంసీ, మల్కాజిగిరి మున్సిపల్ కార్పొరేషన్ కమిషనర్లతో ఆయన వీడియో కాన్ఫరెన్స్ నిర్వహించి ఏర్పాట్లపై సమీక్షించారు. ఈ సమీక్షలో రాష్ట్ర క్రీడా శాఖ మంత్రి వాకిటి శ్రీహరి జూమ్ ద్వారా పాల్గొని అధికారులకు దిశానిర్దేశం చేశారు.

ఆరు నగరాల్లో క్రీడా సంబరం.. 8 వేల మంది రాక

ఈ జాతీయ క్రీడా పోటీలకు హైదరాబాద్‌తో పాటు హనుమకొండ, ఖమ్మం, కరీంనగర్, నిజామాబాద్, మహబూబ్‌నగర్ నగరాలు వేదిక కానున్నాయి. దేశవ్యాప్తంగా సుమారు 8,000 మంది క్రీడాకారులు, ఇతర ప్రతినిధులు ఈ పోటీల్లో పాల్గొననున్నారు. ఇంతటి భారీ స్థాయిలో జరిగే ఈ క్రీడా సంబరానికి రాష్ట్రవ్యాప్తంగా విస్తృత ప్రచారం కల్పించాలని.. విద్యార్థులు, యువత పెద్ద ఎత్తున భాగస్వాములయ్యేలా చర్యలు తీసుకోవాలని సీఎస్ సూచించారు.

ఎయిర్‌పోర్ట్, రైల్వే స్టేషన్లలో ప్రత్యేక ప్రచారం

ఖేలో ఇండియా గేమ్స్‌పై ప్రజల్లో ఆసక్తి పెంచేందుకు వినూత్న ప్రచార కార్యక్రమాలు చేపట్టాలని సంజయ్ జాజు ఆదేశించారు. ముఖ్యమైన కూడళ్లు, బహిరంగ ప్రదేశాల్లో క్రీడల మస్కట్, లోగోలతో కూడిన హోర్డింగులు, భారీ బెలూన్లు ఏర్పాటు చేయాలని సూచించారు. ముఖ్యంగా శంషాబాద్ అంతర్జాతీయ విమానాశ్రయంతో పాటు సికింద్రాబాద్, నాంపల్లి, కాచిగూడ, కాజీపేట రైల్వే స్టేషన్లు, నగరంలోని సెంట్రల్ బస్ స్టేషన్లలో ప్రత్యేక ప్రచార ఏర్పాట్లు చేయాలన్నారు. క్రీడల ప్రాముఖ్యతను చాటిచెప్పేలా రాష్ట్రవ్యాప్తంగా టార్చ్ ర్యాలీలు నిర్వహించాలని స్పష్టం చేశారు.

క్రీడాకారులకు నాణ్యమైన వసతి, రవాణా సదుపాయాలు

పోటీలకు అవసరమైన మౌలిక సదుపాయాలను (ఇన్‌ఫ్రాస్ట్రక్చర్) యుద్ధప్రాతిపదికన సిద్ధం చేయాలని సీఎస్ ఆదేశించారు. క్రీడాకారులకు ఎలాంటి అసౌకర్యం కలగకుండా నాణ్యమైన వసతి, ప్రత్యేక రవాణా ఏర్పాట్లు చేయాలన్నారు. అలాగే, పాఠశాలల విద్యార్థులు ప్రత్యక్షంగా పోటీలను తిలకించేందుకు వీలుగా.. స్కూళ్ల నుంచి క్రీడా వేదికలకు వారిని తీసుకొచ్చేందుకు ప్రత్యేక బస్సు సౌకర్యం కల్పించాలని సూచించారు.

అజారుద్దీన్ సహా ప్రముఖ క్రీడాకారులతో ప్రేరణ

యువతను క్రీడల వైపు ప్రోత్సహించేందుకు రాష్ట్ర మంత్రి, మాజీ క్రికెటర్ మహమ్మద్ అజారుద్దీన్ సహా ఇతర ప్రముఖ క్రీడాకారులు, విశిష్ట వ్యక్తులతో విద్యార్థులకు స్ఫూర్తినిచ్చే కార్యక్రమాలు నిర్వహించాలని సీఎస్ తెలిపారు. ప్రింట్, ఎలక్ట్రానిక్ మీడియా వేదికగా ప్రత్యేక ప్రచార కార్యక్రమాలు చేపట్టాలన్నారు. అన్ని శాఖల అధికారులు సమన్వయంతో పనిచేసి గడువులోగా ఏర్పాట్లు పూర్తి చేయాలని ఆదేశించారు. ఈ సమావేశంలో యువజన, క్రీడా శాఖ ప్రత్యేక ప్రధాన కార్యదర్శి వాణి ప్రసాద్, క్రీడా శాఖ ఎండీ సోనీ బాలా దేవి, సమాచార పౌర సంబంధాల శాఖ ప్రత్యేక కమిషనర్ ముకుంద రెడ్డి, డైరెక్టర్ (మీడియా అండ్ కమ్యూనికేషన్స్) శ్రీరామ్ కర్రి తదితర ఉన్నతాధికారులు పాల్గొన్నారు.

Advertisement
Advertisement