Khammam Bethupalli Lake Accident | జాలర్లను కాపాడబోయి ఎస్డీఆర్‌ఎఫ్ బోట్లు బోల్తా.. 13 మంది సిబ్బంది గల్లంతు

Khammam Bethupalli Lake Accident | త్రినేత్ర న్యూస్ : ఖమ్మం జిల్లా సత్తుపల్లి మండల పరిధిలోని బేతుపల్లి పెద్ద చెరువు వద్ద గురువారం అత్యంత నాటకీయ, భయాందోళనకర పరిస్థితులు చోటుచేసుకున్నాయి. చెరువు మధ్యలో చిక్కుకుపోయిన ఎనిమిది మంది మత్స్యకారులను రక్షించేందుకు రంగంలోకి దిగిన రాష్ట్ర విపత్తు ప్రతిస్పందన దళం (SDRF) సిబ్బంది ఊహించని ప్రమాదానికి గురయ్యారు. వేగంగా ప్రవహిస్తున్న చెరువు అలుగు ప్రవాహంలో పడి సహాయక చర్యల్లో ఉన్న రెండు ఎస్డీఆర్‌ఎఫ్ రెస్క్యూ బోట్లు బోల్తా పడటంతో తీవ్ర కలకలం రేగింది.

ముగ్గురిని కాపాడిన కాసేపట్లోనే..

వివరాల్లోకి వెళ్తే.. బేతుపల్లి చెరువులోకి చేపల వేటకు వెళ్లిన ఎనిమిది మంది మత్స్యకారులు నీటిమట్టం ఒక్కసారిగా పెరగడంతో మధ్యలోనే చిక్కుకుపోయారు. సమాచారం అందుకున్న అధికారులు వెంటనే ఎస్డీఆర్‌ఎఫ్ రెస్క్యూ బృందాలను అక్కడికి పంపించారు. ప్రాణాలకు తెగించి రంగంలోకి దిగిన సిబ్బంది.. మొదట ఒక బోటు ద్వారా ముగ్గురు మత్స్యకారులను క్షేమంగా ఒడ్డుకు తీసుకువచ్చారు.

అలుగు ప్రవాహంలోకి కొట్టుకుపోయిన రెస్క్యూ బోట్లు

అయితే, మిగిలిన ఐదుగురు జాలర్లను కాపాడేందుకు రెండు బోట్లతో లోపలికి వెళ్లిన సమయంలో తీవ్ర విషాదం ఎదురైంది. చెరువు అలుగు వద్ద నీటి ఉధృతి విపరీతంగా ఉండటంతో నియంత్రణ కోల్పోయిన ఆ రెండు బోట్లు అలుగు కిందకు కొట్టుకుపోయి బోల్తా పడ్డాయి. ప్రమాదం జరిగిన సమయంలో ఆ రెండు బోట్లలో దాదాపు 13 మంది ఎస్డీఆర్‌ఎఫ్ సిబ్బంది ఉన్నట్లు సమాచారం.

మిగిలిన వారి కోసం ముమ్మర గాలింపు

బోట్లు తిరగబడిన వెంటనే అప్రమత్తమైన ఇతర రెస్క్యూ సిబ్బంది నలుగురిని వెంటనే కాపాడి ఒడ్డుకు చేర్చారు. ఆ తర్వాత మరో ముగ్గురిని రక్షించే ప్రయత్నం చేస్తుండగా నీటి ప్రవాహం మరింత అడ్డంకిగా మారింది. ప్రస్తుతం చెరువు అలుగు కింద నీటిలో గల్లంతైన మిగిలిన ఎస్డీఆర్‌ఎఫ్ సిబ్బందితో పాటు చెరువులో చిక్కుకున్న మత్స్యకారుల కోసం మరో ప్రత్యేక బోటు, నిపుణులైన గజ ఈతగాళ్లతో అధికారులు సహాయక చర్యలను ముమ్మరం చేశారు. ఘటనా స్థలానికి ఉన్నతాధికారులు చేరుకుని సహాయక చర్యలను ఎప్పటికప్పుడు పర్యవేక్షిస్తున్నారు.