తండ్రి నీడ నుంచి… ‘అమ్మ’గా ఎవల్యూషన్: కవిత రాజకీయ వ్యూహాల కొత్త అధ్యాయం

                               ‘మూవ్ ఆన్’ నుంచి ‘మదర్’ నరేటివ్ దాకా: కవిత పాలిటిక్స్‌లో సంచలన మలుపు!

 

తెలంగాణ రాజకీయాల్లో కుటుంబ రాజకీయాల సరళి మారుతున్న వైనానికి తాజా పరిణామాలు అద్దం పడుతున్నాయి. దశాబ్దాలుగా భారత రాష్ట్ర సమితి (బీఆర్ఎస్) అధినేత కేసీఆర్ నీడలో, కుటుంబ వలయంలోనే సాగిన కల్వకుంట్ల కవిత ప్రయాణం ఇప్పుడు కొత్త మలుపు తీసుకుంది. పార్టీ నుంచి సస్పెన్షన్, గులాబీ సీనియర్ నేతలపై విమర్శలు, కొత్త పార్టీ ఏర్పాటు వంటి జరిగిపోయిన పరిణామాల నేపథ్యంలో  తాజాగా  ఇప్పుడు ఆమె వేస్తున్న అడుగులు కేవలం ఒక రాజకీయ పార్టీని వీడటానికే పరిమితం కాకుండా, స్వతంత్ర అస్తిత్వాన్ని చాటుకునే ప్రయత్నంగా కనిపిస్తున్నాయి. పార్టీ వీడిన నాటి నుండి ఆమె వేస్తోన్న పొలిటికల్ స్టెప్ట్స్ ను తీక్షణంగా గమనిస్తే మనకు కనిపించే అంశాలు ఇవే.. త్రినేత్ర న్యూస్ ఎక్స్ క్లూజీవ్ గా మీకు అందిస్తోన్న రాజకీయ కథనం ఇది...

ఫ్యామిలీ షెల్టర్ నుంచి సెల్ఫ్ ఐడెంటిటీ వైపు

లిక్కర్ కేసు తర్వాత కవిత స్థానం పార్టీలో మారినట్లు స్పష్టంగా కనిపిస్తోంది. పార్టీలో తనకు ప్రాధాన్యత తగ్గిపోతున్నట్లు, తనను పక్కన పెడుతున్నట్లు భావించి, ఆ ఒత్తిడి నుంచి బయటకు వచ్చి తన స్వతంత్ర అస్తిత్వాన్ని నిర్మించుకోవాలనే ఆలోచనతో కవిత ప్రయాణం మొదలైనట్లు మనం అర్థం చేసుకోవచ్చు. 2026 ఆగస్టు 15న ఒక TV ఇంటర్వ్యూలో కవిత చేసిన వ్యాఖ్యలు ఈ మార్పును స్పష్టం చేస్తున్నాయి. “కేటీఆర్ గారు నేను మూవ్ ఆన్ అయ్యాను అన్నారు. కానీ నేను మూవ్ ఆన్ అవ్వలేదు. నన్ను సస్పెండ్ చేసి మూవ్ ఆన్ అయ్యేలా చేశారు” అని ఆమె అన్నారు. ఈ మాటలు కేవలం కుటుంబ రాజకీయ విభేదాలను వ్యక్తం చేయడం కాదు. తనను తాను బలవంతంగా బయటకు నెట్టివేసిన పరిస్థితుల నుంచి, సొంత కాళ్లపై నిలబడాలనే ఆమె ఆలోచనా విధానంలో వచ్చిన మార్పును ఇవి సూచిస్తున్నాయి. తండ్రి నీడను, కుటుంబ రాజకీయ ఆధారాన్ని వదిలి స్వతంత్రంగా ముందుకు సాగాలనే నిర్ణయం ఇందులో కనిపిస్తోంది.

‘కవితక్క’ నుంచి ‘తెలంగాణ అమ్మ’గా రీబ్రాండింగ్

ఒక రాజకీయ వేదికను విడిచిపెట్టినప్పుడు ప్రజలతో కొత్త భావోద్వేగ అనుబంధాన్ని ఏర్పరచుకోవడం అవసరం. ఇప్పటివరకు పార్టీలో కేసీఆర్ కు కుమార్తెగా, కేటీఆర్ కు సోదరిగా ఉన్న ఇమేజ్‌ను పక్కన పెట్టి, ప్రజా సమస్యలపై గళం ఎత్తే నాయకురాలిగా ఆమె తనను తాను మలచుకుంటున్నారు. తెలంగాణ ఉద్యమ కాలం నాటి అనుభవాన్ని, ‘తెలంగాణ జాగృతి’ నేపథ్యాన్ని ప్రాతిపదికగా చేసుకుని కొత్త వేదిక వైపు అడుగులు వేయడం వెనుక బలమైన వ్యూహం ఉంది. కేవలం విమర్శకురాలిగా కాకుండా, ప్రజల సంక్షేమాన్ని కోరే ‘సంరక్షకురాలు’ లేదా ‘మదర్’ ఫిగర్‌గా తనను తాను ప్రొజెక్ట్ చేసుకోవడం ద్వారా కొత్త రాజకీయ స్థానాన్ని నిర్మించుకోవాలని చూస్తున్నారు.
ఈ రీబ్రాండింగ్ ప్రయత్నంలో భాగంగానే, కల్వకుంట్ల ఇంటిపేరును తొలగించి భర్త ఇంటిపేరు (దేవనపల్లి)తో తనను తాను ప్రొజెక్ట్ చేసుకోవాలనే చర్చలు కూడా ఇటీవలే విన వచ్చాయి. కుటుంబ నీడ నుంచి పూర్తిగా బయటకు రావాలనే ఆలోచనలో భాగంగా ఇలాంటి అంశాలు చర్చనీయాంశమయ్యాయి. అయితే ఇది ఎంతవరకు అమలు జరుగుతుందో ఇంకా వేచి చూడాల్సి ఉంది.

క్షేత్రస్థాయిలో ‘పాంచజన్యం’ అజెండా & సామాజిక న్యాయం

కేవలం విమర్శలకే పరిమితం కాకుండా, అధికార పార్టీ వైఫల్యాలను ఎండగడుతూనే సొంత అజెండాతో ముందుకు వెళ్లాలని భావిస్తున్నారు. రాష్ట్రవ్యాప్తంగా అట్టడుగు వర్గాలను, మహిళలను కలుపుకుపోయేలా సభలు నిర్వహించడం, విద్య, వైద్యం, బీసీ రిజర్వేషన్లు వంటి అంశాలను తెరపైకి తెచ్చి ప్రజల్లోకి వెళ్లడం ద్వారా తనకంటూ ఒక ప్రత్యేక స్థానాన్ని సంపాదించుకోవాలని చూస్తున్నారు. ఇటీవల ఆగస్టు 18న జరిగిన ప్రెస్ మీట్‌లో కవిత ‘భూలక్ష్మి’ పథకాన్ని ప్రకటించారు. భూమి లేని ప్రతి పేద కుటుంబానికి ఒక ఎకరం భూమి పంపిణీ చేస్తామని, ఇదే నిజమైన సామాజిక న్యాయమని చెప్పారు. అలాగే బీసీలకు శాసనసభల్లో 50 శాతం రిజర్వేషన్లు కల్పించాలని, కేంద్రం బిల్లు పాస్ చేయకపోతే ‘చలో ఢిల్లీ’ ఉద్యమం చేపడతామని కూడా హెచ్చరించారు. ఇలాంటి ప్రకటనలు, సంకల్ప సభలు ద్వారా ప్రజలను ఆకట్టుకునే ప్రయత్నాలు కొనసాగుతున్నాయి.

చరిత్రలో లేని ప్రయోగం… భవిష్యత్తు నిర్ణయించేది కాలం

ఇది కేవలం ఒక వ్యక్తిగత తిరుగుబాటుగా కాకుండా, ఒక ప్రాంతీయ పార్టీ మూలాలను ప్రభావితం చేసిన కుటుంబం నుంచి బయటకు వచ్చి సొంత రాజకీయ భవిష్యత్తును రాసుకునే ప్రయత్నంగా చూడవచ్చు. భారత రాజకీయాలను పరిశీలిస్తే, మహిళా నేతలు పార్టీలోనే ఉండి రెబల్స్ గా మారి, ఆ తర్వాత తమదైన చక్రం తిప్పి ఆ పార్టీకే అధినేతలుగా ఎదిగిన ఉదాహరణలు ఉన్నాయి (ఇందిరా గాంధీ, జయలలిత). పార్టీ తో పొసకగ, ఆ పార్టీని వీడి మరో కొత్త పార్టీ పెట్టి సక్సెస్ అయిన మమతా బెనర్జీ వంటి వారు కూడా ఉన్నారు. కానీ తండ్రి పెట్టిన రాజకీయ పార్టీ ఇంకా బలంగా ఉండగానే, ఆ పార్టీని వీడి సొంతంగా కొత్త పార్టీ పెట్టి పెద్ద స్థాయిలో సక్సెస్ సాధించిన మహిళా నేత చరిత్ర భారత రాజకీయాల్లో ఇప్పటి వరకు లేదు.  అయితే క్షేత్రస్థాయిలో బలమైన కేడర్ నిర్మాణం, ఇప్పటికే ఉన్నమూడు ప్రధాన పార్టీల నుంచి గట్టి పోటీ వంటి సవాళ్లు కవిత ముందున్నాయి. ఈ నేపథ్యంలో ఆమె ప్రయత్నం ఒక అరుదైన ప్రయోగంగా కనిపిస్తున్నా, దాని ఫలితాలు భవిష్యత్తులోనే తెలుస్తాయి.