Mahabubnagar Journalists Boycott | మహబూబ్‌నగర్‌లో సీఎం రేవంత్ పర్యటనలో హైడ్రామా.. అధికారుల తీరుపై జర్నలిస్టుల మూకుమ్మడి బహిష్కరణ

Mahabubnagar Journalists Boycott | త్రినేత్ర.న్యూస్ : మహబూబ్ నగర్ జిల్లాలో బుధవారం ముఖ్యమంత్రి రేవంత్ రెడ్డి పర్యటనలో ఊహించని పరిణామం చోటుచేసుకుంది. దివిటిపల్లిలో ప్రతిష్టాత్మక అమర రాజా ప్లాంట్ ప్రారంభోత్సవానికి వెళ్లిన సీఎం టూర్‌ను ఉమ్మడి జిల్లా జర్నలిస్టులు మూకుమ్మడిగా బహిష్కరించారు. అధికారుల తీవ్ర నిర్లక్ష్యం, మీడియా ప్రతినిధుల పట్ల వారు ప్రదర్శించిన అవమానకర తీరుకు నిరసనగా ఈ నిర్ణయం తీసుకున్నారు.

మంచినీళ్లు కూడా ఇవ్వని అధికారులు

సీఎం కార్యక్రమాన్ని కవర్ చేయడానికి వచ్చిన మీడియా ప్రతినిధులను అధికారులు ఏమాత్రం పట్టించుకోలేదు. ముఖ్యంగా DPRO (జిల్లా పౌర సంబంధాల అధికారి) నిర్లక్ష్యం కారణంగా జర్నలిస్టులకు వేదిక వద్ద కనీస ప్రాతినిధ్యం దక్కలేదు. సుమారు రెండు గంటల పాటు వారిని కనీసం మంచినీళ్లు కూడా ఇవ్వకుండా నిరీక్షించేలా చేశారు. ఈ దారుణమైన తీరుతో విసిగిపోయిన మీడియా ప్రతినిధులు అందరూ ఏకతాటిపైకి వచ్చి తీవ్ర నిరసన వ్యక్తం చేశారు.

ఏకమైన ప్రింట్, ఎలక్ట్రానిక్ మీడియా

అధికారుల వైఖరిని ఖండిస్తూ ఉమ్మడి జిల్లాలోని ప్రింట్, ఎలక్ట్రానిక్ మీడియా (Print and Electronic media) ప్రతినిధులు సంచలన నిర్ణయం తీసుకున్నారు. సీఎం కార్యక్రమాన్ని బాయ్‌కాట్ (Boycott) చేస్తున్నట్లు ప్రకటించారు. ఈ బహిష్కరణలో మీడియా బ్యూరోలు, స్టాఫర్లు, వీడియో జర్నలిస్టులు, ఫోటో జర్నలిస్టులతో పాటు ఇండిపెండెంట్ జర్నలిస్టులు కూడా పాల్గొన్నారు.

అమర రాజా ప్లాంట్ ప్రారంభం

ఒకవైపు జర్నలిస్టుల నిరసన కొనసాగుతుండగానే.. మహబూబ్ నగర్ జిల్లా దివిటిపల్లిలోని అమర రాజా గిగా కారిడార్‌లో (Giga Corridor) కస్టమర్ క్వాలిఫికేషన్ ప్లాంట్ (Customer Qualification Plant - CQP) తయారీ యూనిట్‌ను ముఖ్యమంత్రి రేవంత్ రెడ్డి లాంఛనంగా ప్రారంభించారు. ఈ కార్యక్రమంలో మంత్రులు డి. శ్రీధర్ బాబు, జూపల్లి కృష్ణారావు, వాకిటి శ్రీహరితో పాటు అమర రాజా గ్రూప్ చైర్మన్ గల్లా జయదేవ్, ప్రభుత్వ విప్ యన్నం శ్రీనివాస్ రెడ్డి, ఉమ్మడి జిల్లా ఎమ్మెల్యేలు, ప్రభుత్వ ప్రధాన కార్యదర్శి (CS) సంజయ్ జాజు పాల్గొన్నారు. మీడియా బహిష్కరణ వ్యవహారం ఇప్పుడు స్థానికంగా తీవ్ర చర్చనీయాంశంగా మారింది.