Heavy Rain Alert | తెలంగాణ తొమ్మిది జిల్లాల్లో భారీ వ‌ర్షాలు.. హెచ్చ‌రిక‌లు జారీ చేసిన ఐఎండీ..!

Heavy Rain Alert | రాగ‌ల రెండురోజులు తెలంగాణ‌లోని తొమ్మిది జిల్లాల్లో భారీ వ‌ర్షాలు కురిసే అవ‌కాశం ఉంద‌ని హైద‌రాబాద్ వాతావ‌ర‌ణ కేంద్రం హెచ్చ‌రిక‌లు జారీ చేసింది. ఈ మేర‌కు ఆయా జిల్లాల‌కు ఎల్లో అలెర్ట్‌ను జారీ చేసింది. గంటకు 30 నుంచి 40 కిలోమీటర్ల వేగంతో ఈదురుగాలులు వీస్తూ వాన‌లు ప‌డే సూచ‌న‌లున్నాయ‌ని తెలిపింది. ఆదిలాబాద్‌, కొమురంభీం ఆసిఫాబాద్‌, మంచిర్యాల, నిర్మల్‌, నిజామాబాద్‌, జయశంకర్‌ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాల్లో భారీ వ‌ర్షాలుంటాయ‌ని.. 64.5 మిల్లీ మీట‌ర్ల నుంచి నుంచి 115.5 మిల్లీమీట‌ర్ల వ‌ర‌కు వర్షపాతం నమోదయ్యే అవకాశం ఉందని వాతావరణ శాఖ తెలిపింది. మిగ‌తా జిల్లాల్లోనూ తేలిక‌పాటి నుంచి మోస్త‌రు వ‌ర్షాపాతం న‌మోద‌య్యే అవ‌కాశం ఉంద‌ని వెల్ల‌డించింది. ఈ వారం మొత్తం ఉపరితల గాలుల ప్రభావం కొనసాగుతుందని, గంటకు 30-40 కిలోమీటర్ల వేగంతో గాలులు వీచే అవకాశం ఉందని తెలిపింది. ఈ మేర‌కు ప్ర‌జ‌లు అప్ర‌మ‌త్తంగా ఉండాల‌ని సూచించింది.