Crop Bonus Telangana | సన్నాల బోనస్‌కు కోతలు.. రైతన్నకు వాతలు! రేవంత్ సర్కార్ వ్యవసాయ సమీక్షపై హరీశ్ రావు ధ్వజం

Crop Bonus Telangana | త్రినేత్ర.న్యూస్ : కాంగ్రెస్ ప్రభుత్వం (Congress Government) రైతుల పట్ల అనుసరిస్తున్న తీరుపై మాజీ మంత్రి, బీఆర్ఎస్ (BRS) సీనియర్ నేత హరీశ్ రావు తీవ్ర స్థాయిలో విరుచుకుపడ్డారు. ముఖ్యమంత్రి రేవంత్ రెడ్డి (Revanth Reddy) తాజాగా నిర్వహించిన వ్యవసాయ శాఖ (Agriculture Department) సమీక్ష కేవలం మొక్కుబడిగా జరిగిందని, పంట బోనస్ ఎగ్గొట్టేందుకే ప్రభుత్వం కుట్రలు చేస్తోందని ఆయన ఆరోపించారు. రైతుల సంక్షేమాన్ని గాలికి వదిలేసి, వారిపై నిబంధనల పేరుతో ఉక్కుపాదం మోపుతున్నారని మండిపడ్డారు.

మేనిఫెస్టోలో ఒకలా.. ఆచరణలో మరోలా

ఎన్నికల సమయంలో మేనిఫెస్టో (Manifesto) లో ఏ రకం ధాన్యం పండించినా సరే క్వింటాల్‌కు రూ.500 బోనస్ ఇస్తామని కాంగ్రెస్ హామీ ఇచ్చిందని హరీశ్ రావు గుర్తుచేశారు. కానీ అధికారంలోకి వచ్చాక దాన్ని 33 రకాల సన్నాలకు (Sannalu) పరిమితం చేశారని, ఇప్పుడు ఏకంగా కేవలం 7 రకాల సన్నాలకే బోనస్ ఇస్తామనడం సిగ్గుచేటన్నారు. "ఏ రకం ధాన్యం వేయాలో సర్కారే నిర్ణయించడం అంటే రైతన్న మెడపై కత్తి పెట్టడమే. ఇప్పటికే నారు పోసుకున్న రైతుల పరిస్థితి ఏంటి? ఇంత నిర్బంధంగా, కఠినంగా రైతుల పట్ల వ్యవహరించాల్సిన అవసరం ఏముంది?" అని ఆయన ప్రభుత్వాన్ని నిలదీశారు.

రైతు భరోసా ఏమాయె? బీమా ముచ్చటే లేదు

ఈ సమీక్షా సమావేశంలో సీఎం రేవంత్ రెడ్డి ఎక్కడా రైతు బంధు (Rythu Bandhu), పంటల బీమా, రైతు బీమా గురించి మాట్లాడకపోవడం బాధాకరమన్నారు. గత మూడు సీజన్లుగా రైతు భరోసా ఎగ్గొట్టిన ప్రభుత్వం, గత యాసంగిలో కేవలం రెండు ఎకరాలకు మాత్రమే ఇచ్చి చేతులు దులుపుకుందని విమర్శించారు. సిద్దిపేట వేదికగా 45 రోజుల్లో రైతు భరోసా ఇస్తామని చెప్పిన సీఎం, 85 రోజులు దాటినా పట్టించుకోవడం లేదన్నారు. మరోవైపు, గత ఐదు నెలల నుంచి ప్రభుత్వం రైతు బీమా కిస్తీ (Premium) కట్టకపోవడంతో, కేసీఆర్ రైతు కుటుంబాలకు ఇచ్చిన భద్రతను కాంగ్రెస్ ప్రభుత్వం లేకుండా చేసిందని ఆవేదన వ్యక్తం చేశారు.

పంట మార్పిడి పేరుతో గందరగోళం

సీఎం మాటలు నమ్మి గత సీజన్‌లో పంట మార్పిడి (Crop rotation) చేసి మొక్కజొన్న, సోయా, పొద్దు తిరుగుడు, వేరుశనగ సాగు చేసిన రైతులు రోడ్డున పడ్డారని హరీశ్ రావు ఆరోపించారు. ఆ పంటలను కనీస మద్దతు ధరకు (MSP) కొంటామని ప్రభుత్వం గ్యారెంటీ ఇస్తుందా? అని ప్రశ్నించారు. ఎరువుల పంపిణీ కోసం తెచ్చిన యాప్ (App) ఫెయిల్ అయ్యిందని, ఇప్పుడు రైతు వేదికల ద్వారా ఇస్తామంటూ సీజన్‌కో రకంగా గందరగోళం సృష్టిస్తున్నారని మండిపడ్డారు.

వెంటనే పెండింగ్ బోనస్ విడుదల చేయాలి

గత మూడు వేసవి కాలాల్లో వడగళ్ళు, అకాల వర్షాల వల్ల నష్టపోయిన రైతులకు ఇస్తామన్న ఇన్‌పుట్ సబ్సిడీని (Input Subsidy) ఇప్పటికీ ఇవ్వలేదని హరీశ్ రావు గుర్తు చేశారు. ఇప్పటికైనా ప్రభుత్వం ప్రచార యావ తగ్గించుకుని, చిత్తశుద్ధితో రైతు సంక్షేమంపై దృష్టి పెట్టాలని సూచించారు. 7 రకాల సన్నాలకే బోనస్ అనే నిర్ణయాన్ని వెంటనే వెనక్కి తీసుకోవాలని, మేనిఫెస్టోలో చెప్పినట్లు అన్ని రకాల పంటలకు బోనస్ చెల్లించాలని బీఆర్ఎస్ పక్షాన డిమాండ్ చేశారు. గత యాసంగికి సంబంధించిన పెండింగ్ బోనస్ డబ్బులను వెంటనే రైతుల అకౌంట్లలో జమ చేయాలని ఆయన ప్రభుత్వాన్ని కోరారు.