Harish Rao BRS | రేవంత్ సర్కార్ జల ద్రోహం.. ‘గోదావరి’కి గండికొట్టి ఆంధ్రాకు నీళ్లా? హరీశ్ రావు ఫైర్!

Harish Rao BRS | త్రినేత్ర.న్యూస్ : తెలంగాణ జల హక్కుల విషయంలో రేవంత్ రెడ్డి నేతృత్వంలోని కాంగ్రెస్ ప్రభుత్వం చారిత్రక తప్పిదం చేస్తోందని మాజీ మంత్రి, బీఆర్ఎస్ (BRS) డిప్యూటీ ఫ్లోర్ లీడర్ హరీశ్ రావు తీవ్ర స్థాయిలో విరుచుకుపడ్డారు. తెలంగాణ భవన్‌లో ఏర్పాటు చేసిన మీడియా సమావేశంలో ఆయన మాట్లాడుతూ.. గోదావరి-కావేరి నదుల అనుసంధానం ముసుగులో తెలంగాణకు జరుగుతున్న అన్యాయాన్ని, అందులో రాష్ట్ర ప్రభుత్వ వైఫల్యాన్ని, సీక్రెట్ మీటింగ్స్ వెనుక ఉన్న కుట్రలను ఆధారాలతో సహా ఎండగట్టారు. ట్రిబ్యునల్ ద్వారా సాధించుకున్న నీటి హక్కులపై రాజీ పడటం ఎత్తుగడ కాదని, గురువు గారికి (చంద్రబాబుకు) తొత్తుగా మారి తెలంగాణకు చేస్తున్న ద్రోహమని ఆయన మండిపడ్డారు.

పాత కుట్రలే.. కొత్త ముసుగులో (River Linking Conspiracy)

ఉమ్మడి రాష్ట్రంలో కృష్ణా నీళ్ల విషయంలో జరిగిన ద్రోహమే, ఇప్పుడు గోదావరి జలాల విషయంలో రిపీట్ అవుతోందని హరీశ్ రావు గుర్తుచేశారు. కాంగ్రెస్ నాయకులు 'డూడూ బసవన్నల్లాగా' తలలు ఊపుతున్నారని ఎద్దేవా చేశారు.

గతంలో గోదావరి నీళ్లను కృష్ణా బేసిన్‌కు తరలిస్తే, ట్రిబ్యునల్ (GWDT) ప్రకారం తెలంగాణకు 14, 21, 45 టీఎంసీల చొప్పున నీటి హక్కులు ఉంటాయని బీఆర్ఎస్ పోరాడి సాధించింది. ఆ పోరాటం వల్లే బనకచర్ల పేరును నల్లమల సాగర్‌గా మార్చారు.

కానీ ఇప్పుడు నదుల అనుసంధానం (River Linking) పేరుతో పాత ప్లాన్‌ను మార్చేశారు. అసలు ప్లాన్ ప్రకారం.. తెలంగాణలోని సమ్మక్క సాగర్ లేదా ఇచ్చంపల్లి నుంచి నాగార్జున సాగర్, ఆ తర్వాత సోమశిల మీదుగా కావేరికి నీళ్లు వెళ్లాలి.

కానీ ఇప్పుడు ఏపీ కుట్ర చేసి, తెలంగాణ భూభాగమే టచ్ కాకుండా పోలవరం నుంచి నల్లమల సాగర్ మీదుగా గ్రాండ్ ఆనకట్టకు లింక్ చేయాలని చూస్తోంది. ఇది నేషనల్ ప్రాజెక్ట్ కావడంతో ఏపీకి ఒక్క రూపాయి ఖర్చు లేకుండా గోదావరి నీళ్లు నేరుగా వెళ్లిపోతాయి. ఇందులో తెలంగాణకు ఎలాంటి లాభం లేదు.

తెలంగాణకు 211 టీఎంసీల బొక్క

ఈ కొత్త ప్రపోజల్ వల్ల తెలంగాణకు చుక్క నీరు రాకపోగా, ఉన్న నీళ్లు పోతున్నాయని హరీశ్ రావు ఆవేదన వ్యక్తం చేశారు.

సమ్మక్క సాగర్ నుంచి మనం 47 టీఎంసీలు వదులుకోవాల్సి వస్తోంది.

కేసీఆర్ పదేళ్ల పాటు పోరాడి గోదావరిలో 968 టీఎంసీల హక్కులను కాపాడారు. సీతమ్మ సాగర్ అనుమతిలో కూడా ఈ విషయం స్పష్టంగా ఉంది. 828 టీఎంసీలకు క్లియరెన్స్ రాగా, మరో 139 టీఎంసీల అనుమతులు (సమ్మక్క సాగర్, 20 టీఎంసీల వార్ధా, 40 టీఎంసీల ఎల్లంపల్లి, 9 టీఎంసీల ఆదిలాబాద్ మైనర్ ఇరిగేషన్, 5 టీఎంసీల లోయర్ పెన్ గంగా) పెండింగ్‌లో ఉన్నాయి.

పోలవరం-కావేరి లింక్ పూర్తయితే ఈ ప్రాజెక్టులకు అనుమతులు వస్తాయా? అని ఆయన ప్రశ్నించారు. ఈ 139 టీఎంసీలు, ఇంటర్ లింకింగ్ ద్వారా రావాల్సిన సగం వాటా (74 టీఎంసీలు) కలిపి మొత్తం 211 టీఎంసీల భారీ నష్టం తెలంగాణకు వాటిల్లుతోందని వివరించారు.

148 టీఎంసీలు వాడుకోని ఛత్తీస్‌గఢ్ నీళ్లలో మనకు సగం వాటా ఉంటుంది. కానీ ఈ డైవర్షన్ వల్ల అవి ఏపీకి వెళ్లిపోతాయి.

పాలమూరును ముంచుతున్న సీఎం రేవంత్

ఒకవేళ బనకచర్లకు అనుమతి ఇస్తే, తెలంగాణలోని పాలమూరుకు NOC (No Objection Certificate) ఇవ్వాలని సీఎం రేవంత్ రెడ్డి అడగడం ఆయన అవగాహనలేమికి నిదర్శనమన్నారు.

పాలమూరుకు కేటాయించిన 90 టీఎంసీలు మనవే. గతంలో ట్రిబ్యునల్ ద్వారా వచ్చిన పాతవి 811, కొత్తగా బ్రిజేష్ ట్రిబ్యునల్ ఇచ్చిన 194 కలిపి (మొత్తం 1005 టీఎంసీలు) పునర్ పంపిణీపై విచారణ జరుగుతోంది. ఇందులో కనీసం 700 టీఎంసీలు మనకు రాబోతున్నాయి.

ముఖ్యమంత్రి మాత్రం కేవలం 90 టీఎంసీలకు NOC అడిగి, మిగతా నీళ్లు విడిచిపెట్టుకుంటాం అనడం దారుణం. 90 టీఎంసీల NOC తెచ్చుకుంటే, ఏపీకి హక్కులు వస్తే, ఆ కోత తెలంగాణకే పడుతుందని హెచ్చరించారు.

ఖర్చు ఎక్కువ.. లాభం ఆంధ్రాకే!

ఇంజినీరింగ్ పరంగా చూసినా ఈ ప్రాజెక్టు ఏపీకే లాభం చేకూరుస్తుందని వివరించారు.

తెలంగాణ (సమ్మక్క సాగర్ 83 మీటర్లు) మీదుగా వెళ్తే కేవలం 97 మీటర్ల లిఫ్ట్ (Lift) అవసరం. ఖర్చు రూ. 48 వేల కోట్లు.

అదే ఏపీ ప్రపోజ్ చేసిన పోలవరం (ప్రకాశం బ్యారేజీ 12 మీటర్లు) నుంచి బనకచర్ల (263 మీటర్లు) కు వెళ్లాలంటే దాదాపు 250 మీటర్ల లిఫ్ట్ కావాలి. ఖర్చు ఏకంగా రూ. 82 వేల కోట్లు అవుతుంది.

ఎక్కువ ఖర్చు, నిర్వహణ భారం ఉన్నా కేంద్రం ఎందుకు ఆలోచించడం లేదు? కేవలం ఏపీ ఎంపీల చేతుల్లో కేంద్రం ఉండటం వల్లే కేఎల్ రావు గారు (ఇచ్చంపల్లి నుంచి లింక్ చేయాలని చెప్పిన నిపుణుడు) చెప్పిన మాటలు పెడచెవిన పెడుతున్నారని విమర్శించారు.

ఢిల్లీలో సీక్రెట్ మీటింగ్స్.. బాబు కోసమేనా?

ఈ నదుల అనుసంధానంపై అత్యంత రహస్యంగా తతంగం నడుస్తోందని హరీశ్ రావు సంచలన ఆరోపణలు చేశారు.

2026 మార్చి 26న హైదరాబాద్‌లో ఏపీ సెక్రటరీ, యూనియన్ సెక్రటరీ కాంతారావు ఆధ్వర్యంలో జరిగిన మీటింగ్‌లో సీఎం రేవంత్ పాల్గొన్నారు.

ఆ తర్వాత 2026 ఏప్రిల్ 27, మే 1, 8, 11, 23 తేదీల్లో మరియు మొన్న శుక్రవారం కూడా ఢిల్లీలో మీటింగ్స్ జరిగాయి. ఇన్ని మీటింగ్స్ జరిగితే మినట్స్ (Meeting Minutes) ఎందుకు బయటపెట్టడం లేదని ప్రశ్నించారు.

ఇందులో తెలంగాణ తరపున వెళ్తున్నది.. తెలంగాణ ప్రాజెక్టులకు వ్యతిరేకంగా పనిచేసి జైలుకు వెళ్లిన, చంద్రబాబుకు నమ్మినబంటు అయిన 'ఆదిత్యానాథ్ దాస్'. తెలంగాణ ఇంజినీర్లను పక్కనపెట్టి ఆయన్ను పంపడం వెనుక ఆంతర్యం ఏమిటని నిలదీశారు. చంద్రబాబు కళ్లలో ఆనందం చూడటానికే రేవంత్ రాష్ట్ర ప్రయోజనాలు తాకట్టు పెడుతున్నారని ఆరోపించారు.

167 టీఎంసీలతో ఏపీ భారీ స్కెచ్

కర్ణాటక తమ వాటా 16 టీఎంసీలను పైన వాడుకుని, గోదావరిలో తీసుకుంటామని చెబుతోంది. కర్ణాటకవి 16, ఏపీవి 45, ఏపీ క్లెయిమ్ చేస్తున్న 15, మన సమ్మక్కవి 45, తమిళనాడుకు ఇస్తామన్న 44... మొత్తంగా 167 టీఎంసీలతో పోలవరం బనకచర్ల కట్టాలని ఏపీ చూస్తోందని వివరించారు. కర్ణాటక పైన 16 టీఎంసీలు వాడుకుంటే జూరాలకు తీవ్ర నష్టం వాటిల్లుతుందని, ఇప్పటికే క్రాప్ హాలిడే ప్రకటిస్తున్నారని గుర్తుచేశారు.

బీజేపీ ఎంపీలు ఏం చేస్తున్నారు?

ఇంత అన్యాయం జరుగుతుంటే.. రాష్ట్ర ప్రయోజనాలు కాపాడాల్సిన కేంద్ర మంత్రులు కిషన్ రెడ్డి, బండి సంజయ్, 8 మంది ఎంపీలు ఎందుకు మౌనంగా ఉన్నారని హరీశ్ రావు ప్రశ్నించారు. "పెద్దన్న పాత్ర పోషించాల్సిన బీజేపీ.. కేవలం ఏపీ ప్రయోజనాల కోసమే పనిచేస్తూ తెలంగాణ ద్రోహులుగా మిగులుతారా?" అని నిలదీశారు. కృష్ణా జలాల్లో ఇప్పటికే ఏపీ 75% వాడుకుంటుంటే, కేఆర్ఎంబీ (KRMB) మౌనంగా ఉందన్నారు.

బీఆర్ఎస్ పోరాటానికి సిద్ధం.. డిమాండ్లు ఇవే

రేవంత్ సర్కార్ ఇకనైనా మేల్కొనాలని, గురుదక్షిణ చెల్లించుకోవడానికి వేరే మార్గాలు చూసుకోవాలని హరీశ్ రావు హితవు పలికారు.

వెంటనే అఖిలపక్ష సమావేశం ఏర్పాటు చేయాలి.

అసెంబ్లీ ప్రత్యేకంగా సమావేశపరిచి, పోలవరం-కావేరి లింకుకు వ్యతిరేకంగా తీర్మానం చేయాలి.

ఢిల్లీ వెళ్లి కేంద్రంపై ధర్నాలు చేయాలి.

ప్రభుత్వం స్పందించకపోతే ప్రజలను ఏకం చేసి భారీ పోరాటానికి బీఆర్ఎస్ (BRS) సిద్ధమవుతుందని హెచ్చరించారు. 'సుజలాం, సఫలాం' అని పత్రికలు రాస్తున్నా.. ఏపీకి సుజలం, తెలంగాణకు మాత్రం నిష్ఫలం అని హరీశ్ రావు స్పష్టం చేశారు.