Green India Challenge | ఈ గౌరవం కేసీఆర్‌కు అంకితం: జోగినపల్లి సంతోష్ కుమార్

Green India Challenge | త్రినేత్ర.న్యూస్ : గ్రీన్ ఇండియా ఛాలెంజ్ ద్వారా దేశవ్యాప్తంగా పచ్చదనం పెంపునకు విశేష కృషి చేస్తున్న జోగినపల్లి సంతోష్ కుమార్‌ను అరుదైన గౌరవం వరించింది. పర్యావరణ పరిరక్షణలో ఆయన చేస్తున్న సేవలకు గానూ ప్రతిష్టాత్మక 'గ్లోబల్ గ్రీన్ ఐకాన్ అవార్డు' లభించింది. ఈ నేపథ్యంలో ఏర్పాటు చేసిన మీట్ అండ్ గ్రీట్ (ఆత్మీయ సమ్మేళనం) కార్యక్రమం కోలాహలంగా జరిగింది. సుమారు 500 మందికి పైగా పాల్గొన్న ఈ కార్యక్రమంలో పలువురు ప్రముఖులు సంతోష్ కుమార్‌కు శుభాకాంక్షలు తెలిపారు.

గ్రీన్ ఇండియా సైనికులకు కృతజ్ఞతలు

ఈ కార్యక్రమానికి విచ్చేసిన గ్రీన్ ఇండియా సైనికులకు, మహిళా ప్రముఖులకు, మాజీ చైర్మన్లకు, ఎమ్మెల్సీలు, ఎమ్మెల్యేలకు సంతోష్ కుమార్ హృదయపూర్వక కృతజ్ఞతలు తెలిపారు. "మీ అందరి ఆశీస్సులు, భాగస్వామ్యంతో ఈ కార్యక్రమం చిరస్థాయిగా నిలిచిపోతుంది. నాపై మీరు చూపిస్తున్న ప్రేమ, మద్దతు, ప్రోత్సాహానికి నేను ఎప్పటికీ రుణపడి ఉంటాను" అని ఆయన ఆనందం వ్యక్తం చేశారు.

ప్రకృతి ఉంటేనే మనం ఉంటాం

"ఈ గ్రీన్ ఇండియా ఉద్యమం నా ఒక్కడిది కాదు. మొక్కలు నాటే ప్రతి చేతికి, ప్రకృతి కోసం మాట్లాడే ప్రతి గొంతుకకు, 'ప్రకృతి ఉంటేనే మనం ఉంటాం' అని బలంగా నమ్మే ప్రతి హృదయానికి ఈ గౌరవం చెందుతుంది" అని సంతోష్ కుమార్ ఉద్ఘాటించారు. "సంఘే శక్తి కలౌ యుగే" అన్నట్లుగా.. ప్రజల సమిష్టి బలం (సంఘ శక్తి) ద్వారానే ఈ కలియుగంలో గొప్ప మార్పును సాధించగలమని మనం నిరూపిస్తున్నామన్నారు.

విశ్వవ్యాప్తంగా గ్రీన్ ఇండియా ఛాలెంజ్

భవిష్యత్ తరాల కోసం పర్యావరణ పరిరక్షణ దిశగా అందరం కలిసి నడుద్దామని ఆయన పిలుపునిచ్చారు. మొక్కలు నాటడమే కాకుండా, రాబోయే తరాలకు సుస్థిరమైన, పచ్చని భవిష్యత్తును అందించడమే మన లక్ష్యం కావాలన్నారు. గ్రీన్ ఇండియా ఛాలెంజ్ ఇప్పుడు గ్లోబల్ స్థాయికి చేరుకుందని, పర్యావరణ ప్రేమికులు తాము మొక్కలు నాటిన ఫోటోలను యాప్ ద్వారా అప్‌లోడ్ చేసి, సర్టిఫికెట్ పొందవచ్చని సూచించారు.