Sridhar Babu | 1100 కాల్ చేస్తే.. మీ ఇంటికే మీ సేవ స‌ర్టిఫికెట్‌లు

• కులం, నివాస, ఆదాయం, జనన, మరణ స‌ర్టిఫికెట్లతో పాటు ఆధార్ సేవ‌లు కూడా
• పోర్ట‌ల్ ఆవిష్క‌ర‌ణ‌లో మంత్రి దుద్దిళ్ల శ్రీ‌ధ‌ర్‌బాబు

Sridhar Babu | త్రినేత్ర న్యూస్‌: 1100 కాల్ చేస్తే ఇంటి వ‌ద్ద‌కే మీ సేవ (Mee Seva) ధ్ర‌వ‌ప‌త్రాలు వ‌స్తాయ‌ని రాష్ట్ర ఐటీ, ఎలక్ట్రానిక్స్ అండ్ కమ్యూనికేషన్స్ శాఖమంత్రి దుద్దిళ్ల శ్రీ‌ధ‌ర్‌బాబు (Sridhar Babu) తెలిపారు. కులం, నివాస‌, ఆదాయం, జ‌న‌న‌, మ‌ర‌ణ స‌ర్టిఫికెట్ల‌తో పాటు ఆధార్ సేవ‌లు కూడా పొంద‌వ‌చ్చ‌న్నారు. క్యూర్ ప‌రిధిలో ప్రారంభించిన నెల రోజుల్లోనే మంచి స్పంద‌న వ‌స్తోంద‌న్నారు. మీ సేవ డోర్‌స్టెప్ డెలివరీ కోసం నెల రోజుల్లోనే 3,885 కాల్స్ వ‌చ్చిన‌ట్లు వివ‌రించారు. శుక్ర‌వారం ఆర్టీసీ క‌ళ్యాణ మండ‌పంలో పోర్ట‌ల్‌ను ఆవిష్క‌రించిన అనంత‌రం ఆయ‌న మాట్లాడారు. రాబోయే రోజుల్లో అన్ని ప్రాంతాల్లో ఈ సేవ‌లు అందుబాటులోకి వ‌స్తాయ‌ని పేర్కొన్నారు.

ప్రజలు ఇకపై ఆదాయ, కుల, నివాస, జనన, మరణ ధ్రువీకరణ పత్రాలతో పాటు ఆధార్ నమోదు, ఆధార్ వివరాల అప్ డేట్ వంటి పలు సేవల కోసం మీ సేవా కేంద్రాలు లేదా ఆధార్ కేంద్రాలకు వెళ్లాల్సిన అవసరం లేదు. క్యూలలో వేచి ఉండకుండా మీ సేవా డోర్‌స్టెప్ డెలివరీ సేవ ద్వారా సేవలను పొంద‌వచ్చు. ప్రజలు టోల్‌ఫ్రీ నంబర్ 1100 కు కాల్ చేయడం, మీసేవ‌ పౌరుల పోర్టల్ ద్వారా అభ్యర్థన నమోదు చేయడం ద్వారా ఈ సేవలను పొందవచ్చు. ఆ తర్వాత మీ సేవ‌ ప్రతినిధి నిర్ణీత సమయంలో ఇంటికి వచ్చి అవసరమైన సేవల‌ను అందిస్తారు.

మొదటి నెలలోనే 3,885 కాల్స్

ప్రజలకు ప్రభుత్వ సేవలను మరింత చేరువ చేయడం, పారదర్శకమైన పాలనను అందించడం లక్ష్యంగా రాష్ట్ర ప్రభుత్వం చేపట్టిన దార్శనికతలో ఈ కార్యక్రమం ఒక భాగం. ప్రస్తుతం ఈ డోర్‌స్టెప్ సేవలు క్యూర్ (CURE) పరిధిలోని ప్రాంతాల్లో మాత్రమే అందుబాటులో ఉన్నాయి. బుక్ చేసుకున్న సర్వీస్ ప్రకారం వర్తించే సేవా రుసుములు చెల్లించాల్సి ఉంటుంది.

డోర్ స్టెప్ సేవలు ఇలా పొందొచ్చు

• టోల్‌ఫ్రీ నంబర్ 1100 కు కాల్ చేయండి లేదా మీ సేవ‌ పౌరుల పోర్టల్ ద్వారా అభ్యర్థన నమోదు చేయండి.
• అవసరమైన ధ్రువీకరణ పత్రం లేదా ఆధార్ సేవను ఎంచుకుని, కాల్ సెంటర్ ప్రతినిధికి అవసరమైన వివరాలను అందించండి.
• నిర్ణయించిన సమయంలో మీ సేవ‌ డోర్‌స్టెప్ ప్రతినిధి మీ ఇంటికి వచ్చి అవసరమైన సేవల‌ను అందిస్తారు.