KTR | అసెంబ్లీ జరుగుతుంటే ఆటలేంటి? సభ నడపడం చేతకాకనే క్రీడల సాకు: కేటీఆర్ సెటైర్లు

KTR | త్రినేత్ర.న్యూస్ : రాష్ట్ర అసెంబ్లీ సమావేశాలు అత్యంత కీలక దశకు చేరుకున్న సమయంలో, ప్రజాప్రతినిధులకు క్రీడా పోటీలు నిర్వహించాలన్న ప్రభుత్వ నిర్ణయంపై ప్రధాన ప్రతిపక్షం బీఆర్ఎస్ (BRS) తీవ్ర అభ్యంతరం వ్యక్తం చేసింది. దీనిపై బీఆర్ఎస్ వర్కింగ్ ప్రెసిడెంట్ కేటీఆర్ (KTR) తీవ్ర విమర్శలు గుప్పించారు. గురువారం అసెంబ్లీ లాబీల్లో మీడియాతో ఇష్టాగోష్టిగా (చిట్ చాట్) మాట్లాడిన ఆయన.. ప్రభుత్వ తీరుపై సెటైర్లు వేశారు.

"అసెంబ్లీని హుందాగా నడపడం చేతకాదు కానీ.. ఎమ్మెల్యేలకు ఆటల పోటీలు మాత్రం కావాలి" అంటూ కేటీఆర్ ఎద్దేవా చేశారు. అసెంబ్లీ సమావేశాల కాలాన్ని ప్రజా ప్రయోజనాల కోసం ఉపయోగించకుండా, ఇలాంటి కార్యక్రమాలతో కాలయాపన చేయడం ఎంతవరకు సమంజసమని ఆయన ప్రశ్నించారు.

ప్రజలు ఏమనుకుంటారు?

రాష్ట్రంలో సాగునీరు (ఇరిగేషన్) వంటి అత్యంత ముఖ్యమైన సబ్జెక్టులపై సభలో ఇంకా లోతైన చర్చ జరగాల్సి ఉందని కేటీఆర్ గుర్తు చేశారు. "ఇంత సీరియస్‌గా సభ జరుగుతున్న సమయంలో క్రీడలకు ప్రాధాన్యత ఇవ్వడం ఏంటి? ప్రజా సమస్యలపై పోరాడాల్సిన సమయంలో ఎమ్మెల్యేలు మైదానాల్లో ఆటలు ఆడుతుంటే చూస్తున్న ప్రజలు ఏమనుకుంటారు?" అని ఆయన ప్రభుత్వాన్ని నిలదీశారు.

సమాధానం లేని మంత్రి శ్రీధర్ బాబు

కీలకమైన పద్దులపై చర్చను పక్కన పెట్టేందుకే ప్రభుత్వం ఉద్దేశపూర్వకంగా ఈ కొత్త ఎత్తుగడ వేసిందని కేటీఆర్ ఆరోపించారు. మార్చి 28, 29 తేదీల్లో ఈ క్రీడా పోటీలను నిర్వహించాలని నిర్ణయించడం వెనుక ప్రభుత్వానికి చిత్తశుద్ధి లేకపోవడమే కారణమన్నారు. ఇదే విషయాన్ని తాను రాష్ట్ర శాసనసభ వ్యవహారాల శాఖ మంత్రి శ్రీధర్ బాబు దృష్టికి తీసుకెళ్లానని, కానీ ఆయన వద్ద తన ప్రశ్నకు ఎలాంటి సమాధానం లేదని కేటీఆర్ వెల్లడించారు.

పారిపోవాలని చూస్తున్నారు..

ప్రభుత్వం ప్రజా సమస్యల పట్ల పూర్తి బాధ్యతారాహిత్యంగా వ్యవహరిస్తోందని బీఆర్ఎస్ వర్కింగ్ ప్రెసిడెంట్ మండిపడ్డారు. అసెంబ్లీలో ప్రతిపక్షాలు సంధించే ప్రశ్నలకు సమాధానం చెప్పలేక, పద్దులపై చర్చను ఏమాత్రం సమయం కేటాయించకుండా త్వరగా ముగించి పారిపోవాలనే ఉద్దేశ్యంతోనే కాంగ్రెస్ ప్రభుత్వం ఈ క్రీడా పోటీలను ఒక సాకుగా చూపిస్తోందని కేటీఆర్ తీవ్ర ఆరోపణలు చేశారు.