TGSRTC Dasara Special Buses | దసరాకు ఊరెళ్లేవారికి ఆర్టీసీ శుభవార్త: 7 వేల స్పెషల్ బస్సులు.. మహిళలకు ఉచిత ప్రయాణంపై కీలక ప్రకటన

TGSRTC Dasara Special Buses | త్రినేత్ర న్యూస్ : దసరా (విజయదశమి) పండుగ వేళ సొంతూళ్లకు వెళ్లే ప్రయాణికుల కోసం తెలంగాణ రాష్ట్ర రోడ్డు రవాణా సంస్థ (TGSRTC) భారీ ఏర్పాట్లు పూర్తి చేసింది. ప్రయాణికుల రద్దీకి తగినట్లుగా రాష్ట్రవ్యాప్తంగా ఏకంగా 7,000 ప్రత్యేక బస్సులను నడపాలని యాజమాన్యం నిర్ణయించింది. హైదరాబాద్‌తో పాటు వివిధ జిల్లాల నుంచి ప్రయాణికులు క్షేమంగా తమ గమ్యస్థానాలకు చేరుకునేలా జోన్లవారీగా రూట్ మ్యాప్ సిద్ధం చేసింది.

జోన్ల వారీగా ప్రత్యేక బస్సుల వివరాలు

కరీంనగర్ జోన్ (మొత్తం 3,533 బస్సులు): ఆదిలాబాద్ - 431, నిజామాబాద్ - 719, కరీంనగర్ - 1,175, వరంగల్ - 530, ఖమ్మం - 678.

హైదరాబాద్ జోన్ (మొత్తం 2,155 బస్సులు): మహబూబ్ నగర్ - 645, మెదక్ - 255, నల్గొండ - 815, రంగారెడ్డి - 440.

గ్రేటర్ హైదరాబాద్ జోన్: నగరంలో స్థానిక రద్దీని దృష్టిలో ఉంచుకుని 1,312 ప్రత్యేక సర్వీసులను కేటాయించారు.

కీలక తేదీలివే.. నగరంలో ప్రత్యేక పాయింట్లు

ఈ నెల 9, 10, 16, 17 తేదీల్లో ఊర్లకు వెళ్లేవారి రద్దీ ఎక్కువగా ఉండనుండగా.. పండుగ ముగిశాక తిరుగు ప్రయాణం కోసం ఈ నెల 25, 26 తేదీల్లో భారీ రద్దీని అంచనా వేస్తున్నారు. ఈ తేదీల్లో రద్దీకి తగినన్ని అదనపు బస్సులను అందుబాటులో ఉంచనున్నారు. హైదరాబాద్‌లోని మహాత్మా గాంధీ బస్ స్టేషన్ (MGBS), జూబ్లీ బస్ స్టేషన్ (JBS), ఉప్పల్ (నల్ల చెరువు), ఆరాంఘర్, ఎల్బీనగర్ క్రాస్ రోడ్స్, కేపీహెచ్‌బీ (KPHB), బోయిన్‌పల్లి, గచ్చిబౌలి ప్రాంతాల నుంచి బస్సులు బయలుదేరుతాయి. ప్రయాణికుల సౌకర్యార్థం ఆయా పాయింట్ల వద్ద షామియానాలు, కుర్చీలు, తాగునీరు, పబ్లిక్ అడ్రస్ సిస్టమ్, మొబైల్ టాయిలెట్ల సదుపాయం కల్పిస్తున్నారు.

స్పెషల్ బస్సు ఛార్జీల పెంపు.. రెగ్యులర్ సర్వీసులకు వర్తించదు

తిరుగు ప్రయాణంలో స్పెషల్ బస్సులు పూర్తిగా ఖాళీగా రావాల్సి ఉంటుందని.. డీజిల్, ఇతర నిర్వహణ ఖర్చుల దృష్ట్యా 2003 నాటి జీవో నంబర్ 16 ప్రకారం పండుగ స్పెషల్ బస్సులలో మాత్రమే 1.5 రెట్ల వరకు ఛార్జీలను సవరించినట్లు టీజీఎస్ఆర్టీసీ స్పష్టం చేసింది. ఈ సవరించిన ఛార్జీలు కేవలం రద్దీ రోజుల్లో (ఈ నెల 9, 10, 16, 17, 25, 26) నడిచే స్పెషల్ బస్సులకు మాత్రమే వర్తిస్తాయి. సాధారణ రెగ్యులర్ బస్సుల్లో ప్రయాణించే వారికి సాధారణ ఛార్జీలే అమల్లో ఉంటాయని అధికారులు తెలిపారు.

మహాలక్ష్మి పథకం యథాతథం: ఎండీ వై.నాగిరెడ్డి

మహిళా ప్రయాణికులకు రాష్ట్ర ప్రభుత్వం అందిస్తున్న 'మహాలక్ష్మి' ఉచిత బస్సు ప్రయాణ సదుపాయం పండుగ వేళ కూడా పూర్తిస్థాయిలో అమలవుతుందని టీజీఎస్ఆర్టీసీ ఎండీ వై.నాగిరెడ్డి స్పష్టం చేశారు. పల్లె వెలుగు, ఎక్స్‌ప్రెస్, సిటీ ఆర్డినరీ, మెట్రో ఎక్స్‌ప్రెస్ సర్వీసులలో రెగ్యులర్ బస్సులతో పాటు ప్రత్యేకంగా నడిపే స్పెషల్ బస్సుల్లోనూ మహిళలు జీరో టికెట్‌తో ఉచితంగా ప్రయాణించవచ్చని ఆయన స్పష్టం చేశారు.

రిజర్వేషన్ & సమాచారం కోసం

ప్రయాణికులు తమ ప్రయాణాన్ని సులభతరం చేసుకునేందుకు అధికారిక పోర్టల్ www.tgsrtcbus.in ద్వారా ముందస్తు రిజర్వేషన్ చేసుకోవచ్చు. ప్రత్యేక బస్సుల సమాచారం, టైమింగ్స్ తదితర వివరాల కోసం ఆర్టీసీ కాల్ సెంటర్ నంబర్లు 040-69440000, 040-23450033 లలో సంప్రదించవచ్చని యాజమాన్యం సూచించింది.

Also Read | ఊపందుకున్న యంగ్ ఇండియా స్కూళ్ల నిర్మాణాలు