Congress Party | అస‌లు కుట్ర‌దారుల‌పై అత్యంత క‌ఠిన శిక్ష‌లు విధించేలా చ‌ర్య‌లు తీసుకోండి

• బీఆర్‌ఎస్‌ దళిత వ్యతిరేక వైఖరిపై గవర్నర్‌కు కాంగ్రెస్ మంత్రుల వినతిపత్రం

Congress Party | త్రినేత్ర‌.న్యూస్ : తెలంగాణ రాష్ట్ర శాసనసభ, శాసనమండలిలోని భారత జాతీయ కాంగ్రెస్ సభ్యులు తెలంగాణ రాష్ట్ర గవర్నర్ శివ ప్రతాప్ శుక్లాను కలిసి వినతిపత్రం సమర్పించారు. రాష్ట్రంలో రాజ్యాంగ పరిరక్షకుడిగా అత్యున్నత హోదాలో ఉన్న గవర్నర్ జోక్యం చేసుకుని, శాసనసభ ప్రాంగణంలోనూ, వెలుపలనూ దళితులు, మహిళల గౌరవం, భద్రత, ఆత్మగౌరవాన్ని కాపాడాలని వారు కోరారు. 2026 సెప్టెంబర్ 8న జరిగిన ఘటనలు మన చరిత్రలో చీకటి రోజుగా మిగిలిపోతాయి. బీఆర్‌ఎస్‌ శాసనమండలి సభ్యులు తాతా మధు, నవీన్ రెడ్డి ప్రత్యేకంగా, ఉద్దేశపూర్వకంగా తెలంగాణ శాసనసభ గౌరవ స్పీకర్‌ను లక్ష్యంగా చేసుకుని అవమానకర వ్యాఖ్యలు చేశారు. ఆయన మరణించిన తల్లిని ఉద్దేశించి అనుచిత పదజాలం ఉపయోగించడం ద్వారా స్పీకర్‌ను తీవ్రంగా బాధించడమే కాకుండా, మొత్తం దళిత సమాజాన్ని, రాష్ట్రంతో పాటు దేశంలోని మహిళలందరినీ అవమానించినట్లైంది.

శాసనసభ ప్రధాన ద్వారం వెలుపల మీడియా కెమెరాల సమక్షంలో బీఆర్‌ఎస్‌ ఎమ్మెల్యే టి. హరీశ్‌రావు తొలుత తన చొక్కాను విప్పి, అనంతరం పలువురు ఇతరులు కూడా అదే విధంగా చేసి పోలీసు సిబ్బందిపై చొక్కాలను విసిరారు. అంతటితో ఆగకుండా విధుల్లో ఉన్న మహిళా పోలీసు సిబ్బంది వైపు దూసుకెళ్లి, వారికి తాకుతూ, అత్యంత అభ్యంతరకరంగా దగ్గరగా వెళ్లారు. ఎమ్మెల్యే కేటీఆర్‌ నేతృత్వంలో పలువురు బీఆర్‌ఎస్‌ నాయకులు పోలీసు సిబ్బందిపై, మహిళా పోలీసు అధికారులపైనా భౌతికంగా దాడి చేశారని కాంగ్రెస్ నాయకులు వినతిపత్రంలో పేర్కొన్నారు.

దళిత సమాజానికి చెందిన సభ్యులు శాంతియుతంగా, చట్టబద్ధంగా ఎర్రవల్లి వైపు ర్యాలీగా వెళ్లి, బీఆర్‌ఎస్‌ అధినేత కె. చంద్రశేఖర్‌రావు క్షమాపణ చెప్పాలని మాత్రమే కోరిన నేపథ్యంలో కూడా బీఆర్‌ఎస్‌ అత్యంత దారుణమైన చర్యలకు పాల్పడిందని వారు ఆరోపించారు. దళిత సోదరులు, సోదరీమణులు నడిచిన రహదారులను పసుపు నీరు, పాలు చల్లి ‘శుద్ధి’ చేయడం ద్వారా నిషేధిత, చట్టవిరుద్ధమైన, అమానవీయమైన, అనైతికమైన అంటరానితన ఆచరణను బీఆర్‌ఎస్‌ ప్రదర్శించిందని పేర్కొన్నారు. ఈ మధ్యయుగ, భూస్వామ్య మనస్తత్వాన్ని ప్రతిబింబించే చర్యలకు సంబంధించిన ఫొటోలు, వీడియోలను సైతం బీఆర్‌ఎస్‌ నేతలు గర్వంగా ప్రచారం చేశారని వినతిపత్రంలో పేర్కొన్నారు.

“జర్మన్ నాజీ పార్టీ లేదా అమెరికన్ కూ క్లక్స్ క్లాన్ నుంచి తమ నైతిక విలువలను పొందుతున్న బీఆర్‌ఎస్‌.. అంటరానితనం సాధారణంగా ఉన్న చీకటి యుగంలోకి తెలంగాణతో పాటు భారతదేశాన్ని కూడా తిరిగి తీసుకెళ్లేందుకు ప్రయత్నిస్తోంది” అని వినతిపత్రంలో పేర్కొన్నారు.

దళిత సమాజానికి బీఆర్‌ఎస్‌ పదేళ్ల పాలనలో చేసిన ద్రోహాన్ని కాంగ్రెస్ నాయకులు వినతిపత్రంలో వివరించారు. దళిత ముఖ్యమంత్రిని చేస్తామన్న హామీని విస్మరించడం, దళిత సామాజిక వర్గానికి చెందిన ఉప ముఖ్యమంత్రి టి. రాజయ్యను అనూహ్యంగా పదవి నుంచి తొలగించడం, మాదిగలకు తగిన ప్రాతినిధ్యం కల్పించకపోవడం, ప్రతి దళిత కుటుంబానికి మూడు ఎకరాల భూమి ఇస్తామన్న హామీని విస్మరించడం, దళిత బంధు పథకాన్ని ఎన్నికల స్టంట్‌గా మార్చడం, అలాగే ఎస్సీ సబ్‌ప్లాన్‌కు సంబంధించిన రూ.1,296 కోట్ల నిధులను ఖర్చు చేయకుండా మిగిల్చడం వంటి అంశాలను వారు ప్రస్తావించారు.

ఈ ఘటనలకు ప్రత్యక్షంగా పాల్పడిన వారిపైనే కాకుండా, బీఆర్‌ఎస్‌ అగ్ర నాయకత్వంలో ఉన్న అసలు కుట్రదారులపై కూడా అత్యంత కఠినమైన శిక్షలు విధించేలా చర్యలు తీసుకోవాలని కాంగ్రెస్ నాయకులు గవర్నర్‌ను కోరారు.