Revanth Reddy Slams BJP | రాహుల్ పోరాటానికి కేంద్రం గజగజ.. సీఈసీ రాజీనామా చేసేవరకు విశ్రమించం

• సీఎం రేవంత్ రెడ్డి తీవ్ర హెచ్చరిక

Revanth Reddy Slams BJP | త్రినేత్ర న్యూస్ : ప్రజాస్వామ్య పరిరక్షణ కోసం లోక్‌సభ ప్రతిపక్ష నేత రాహుల్ గాంధీ చేపట్టిన అలుపెరగని ఉద్యమాన్ని చూసి కేంద్రంలోని బీజేపీ ప్రభుత్వం భయంతో వణికిపోతోందని రాష్ట్ర ముఖ్యమంత్రి ఎ. రేవంత్ రెడ్డి స్పష్టం చేశారు. వివాదాస్పదంగా మారిన ఓటర్ల జాబితా ప్రత్యేక సవరణ (SIR - సర్)ను రద్దు చేయడంతో పాటు, చీఫ్ ఎలక్షన్ కమిషనర్ (CEC) జ్ఞానేష్ కుమార్ తన పదవికి రాజీనామా చేసేంత వరకు కాంగ్రెస్ పార్టీ పోరాటం ఆగదని ఆయన తేల్చిచెప్పారు.

రాహుల్, ప్రియాంక అరెస్టుపై తీవ్ర ఆగ్రహం

దేశ ప్రజాస్వామ్య వ్యవస్థకు ముప్పుగా మారిన 'సర్' విధానానికి వ్యతిరేకంగా కాంగ్రెస్ పార్టీ 'ఓటు బచావో... దేశ్ బచావో' (ఓటును రక్షిద్దాం.. దేశాన్ని రక్షిద్దాం) పేరిట చేపట్టిన నిరసనపై పోలీసులు వ్యవహరించిన తీరును సీఎం ఖండించారు. ఢిల్లీ వీధుల్లో అహింసాయుతంగా ఆందోళన చేస్తున్న రాహుల్ గాంధీ, ఏఐసీసీ ప్రధాన కార్యదర్శి కేసీ వేణుగోపాల్, ఎంపీ ప్రియాంకా గాంధీతో పాటు ఇండియా కూటమి ఎంపీలను బలవంతంగా అదుపులోకి తీసుకోవడం ప్రజాస్వామ్య విరుద్ధమని ఆగ్రహం వ్యక్తం చేశారు. కేంద్ర ప్రభుత్వ నిరంకుశ వైఖరికి, నియంతృత్వ పోకడలకు ఈ అరెస్టులే నిదర్శనమన్నారు.

ఇదీ చదవండి | ఎర్రవల్లిలో 45 ఎకరాల భూమి మాయం.. సీఎం సీరియస్.. కేసీఆర్ కుటుంబానికి నోటీసులు

"బ్రిటిష్ జనతా పార్టీలా బీజేపీ తీరు"

నాడు స్వాతంత్య్ర సంగ్రామ సమయంలో చిన్నచిన్న కారణాలకే మహాత్మా గాంధీ, జవహర్‌లాల్ నెహ్రూ, సుభాష్ చంద్రబోస్, సర్దార్ వల్లభ్‌భాయ్ పటేల్ వంటి మహనీయులను బ్రిటిష్ వలస పాలకులు నిర్బంధించారని రేవంత్ గుర్తుచేశారు. నేడు 'బ్రిటిష్ జనతా పార్టీ'గా వ్యవహరిస్తున్న బీజేపీ ప్రభుత్వం కూడా అదే బాటలో నడుస్తూ రాహుల్ గాంధీ గొంతు నొక్కే ప్రయత్నం చేస్తోందని ఎద్దేవా చేశారు. జైళ్లు, అక్రమ కేసులు కాంగ్రెస్ పార్టీకి కొత్తేమీ కాదని స్పష్టం చేశారు.

Also Read | మీకు సిగ్గులేదా? మా రేవంత్ రెడ్డి గారు..తీవ్ర మానసిక క్షోభను అనుభవిస్తున్నారు..

దేశ ప్రజలు రాహుల్ వెంటే ఉన్నారు

"ప్రతి పౌరుడి పవిత్రమైన ఓటు హక్కును, దేశ భవిష్యత్తును కాపాడుకునేందుకు యువత, సాధారణ ప్రజలు స్వచ్ఛందంగా రాహుల్ గాంధీ పోరాటంలో అడుగులు వేస్తున్నారు. ఈ నిజాన్ని ప్రధాని నరేంద్ర మోదీ, హోంమంత్రి అమిత్ షా గుర్తించాలి. లాఠీచార్జీలు, నిర్బంధాలతో ఉద్యమాలను అణచివేయలేరు. అవి మా సంకల్పాన్ని మరింత ఉక్కులా మారుస్తాయి" అని రేవంత్ హెచ్చరించారు. స్వాతంత్య్రం కోసం శతాబ్దానికి పైగా రక్తమోడ్చిన చరిత్ర కాంగ్రెస్‌కు ఉందని, రాజ్యాంగాన్ని కాపాడుకోవడానికి రాహుల్ నాయకత్వంలో చివరి క్షణం వరకు రాజీలేని పోరాటం చేస్తామని ముఖ్యమంత్రి స్పష్టం చేశారు.

Also Read | రాహుల్‌! ఈవీఎంలు తెచ్చిందే మీ నాయిన