Urea price impact Telangana | రైతన్నలూ.. తక్కువ ధరకు దొరికే యూరియాను వాడకండి.. నేల ఆరోగ్యం దెబ్బతింటుంది

• అధిక యూరియా వాడకంతో నేల తల్లికి ముప్పు
• ఎరువుల ధరలను తగ్గించాలని కేంద్రానికి మంత్రి తుమ్మల డిమాండ్

Urea price impact Telangana | త్రినేత్ర.న్యూస్ : తెలంగాణలో రైతులు తమ పంటలకు మోతాదుకు మించి యూరియా (Urea) వాడుతున్నారని, దీనివల్ల భవిష్యత్తులో వ్యవసాయానికి తీవ్ర నష్టం వాటిల్లుతుందని రాష్ట్ర వ్యవసాయ శాఖ మంత్రి తుమ్మల నాగేశ్వరరావు ఆందోళన వ్యక్తం చేశారు. మార్కెట్లో ఎరువుల ధరల మధ్య ఉన్న భారీ వ్యత్యాసమే (Price disparity) ఈ పరిస్థితికి ప్రధాన కారణమని ఆయన స్పష్టం చేశారు. మంగళవారం ఆయన ఎరువుల వాడకం, నేల ఆరోగ్యంపై కీలక వ్యాఖ్యలు చేశారు.

కొంపముంచుతున్న ధరల వ్యత్యాసం

రాష్ట్ర వ్యవసాయ రంగంలో ఎరువుల వినియోగంలో భారీ అసమతుల్యత నెలకొంది. శాస్త్రవేత్తలు ఎన్‌పీకే (NPK) నిష్పత్తిని 4:2:1గా సిఫారసు చేస్తే, ప్రస్తుతం తెలంగాణలో అది 12.6:4.8:1 గా ఉంది. దీనికి ప్రధాన కారణం రేట్లే. ఒక 45 కిలోల యూరియా బస్తా రూ.240 నుంచి రూ.266కే దొరుకుతుండగా.. 50 కిలోల డీఏపీ (DAP) బస్తా కొనాలంటే రూ.1,350, కాంప్లెక్స్ ఎరువులకు రూ.1,750 వెచ్చించాల్సి వస్తోంది. దీంతో రైతులు ఆర్థిక భారం తగ్గించుకునేందుకు తక్కువ ధరలో లభించే యూరియాను ఎక్కువగా కొనుగోలు చేస్తున్నారు.

నేల నిస్సారం.. పెరుగుతున్న సాగు ఖర్చు

వరి, మొక్కజొన్న, పత్తి వంటి ప్రధాన పంటలకు రైతులు అవసరానికి మించి యూరియాను వాడుతున్నారు. మొక్కజొన్నకు 3 బస్తాలు వాడాల్సి ఉంటే.. ఏకంగా 5 నుంచి 10 బస్తాలు చల్లుతున్నారు. ఇలా చేయడం వల్ల నేలలో జింక్, బోరాన్ వంటి సూక్ష్మ పోషకాలు (Micro nutrients) నశించిపోతున్నాయి. నైట్రోజన్ లీచింగ్ పెరిగిపోయి భూగర్భ జలాలు కలుషితం అవుతున్నాయి. అంతేకాకుండా, పంటలకు చీడపీడల బెడద పెరిగి, పురుగుమందుల ఖర్చు తడిసి మోపెడవుతోందని మంత్రి వివరించారు. నాణ్యత లేని దిగుబడుల వల్ల అంతర్జాతీయ మార్కెట్లో (International market) మన పంటలకు గిరాకీ తగ్గుతోందని హెచ్చరించారు.

కేంద్రం వెంటనే స్పందించాలి

రైతులు అన్ని రకాల పోషకాలను సమతుల్యంగా వాడేలా చూడాలంటే.. కేంద్ర ప్రభుత్వం తక్షణమే ఎరువుల ధరలను రేషనలైజ్ (Rationalize) చేయాలని మంత్రి తుమ్మల డిమాండ్ చేశారు. ఒకవైపు సేంద్రీయ వ్యవసాయం (Organic farming) చేయాలని ప్రోత్సహిస్తున్న కేంద్రం.. మరోవైపు ఇలా రసాయన ఎరువుల ధరల్లో ఉన్న లోపాలను సరిదిద్దకపోవడం సరికాదన్నారు. రైతులు కూడా యూరియాకు బదులుగా నానో యూరియా (Nano Urea), నానో డీఏపీ, పచ్చిరొట్ట, వర్మీకంపోస్ట్ వంటి ప్రత్యామ్నాయాలను వాడాలని సూచించారు.

'FFS యాప్' ద్వారా పారదర్శక విక్రయాలు

రైతులను చైతన్యపరచడానికి ప్రభుత్వం 'రైతునేస్తం' కార్యక్రమం ద్వారా ఎప్పటికప్పుడు అవగాహన కల్పిస్తోందని మంత్రి తెలిపారు. అలాగే, ఎరువుల కొనుగోళ్లలో పారదర్శకత కోసం కేంద్రం తీసుకొచ్చిన ఫెర్టిలైజర్ సేల్ యాప్ (FFS App) సేవలను విస్తృతం చేస్తున్నట్లు చెప్పారు. ప్రస్తుతం 22 జిల్లాల్లో ఈ యాప్ ద్వారా ఎరువుల విక్రయాలు జరుగుతుండగా, ఆగస్టు 27 నాటికి రాష్ట్రవ్యాప్తంగా మిగిలిన అన్ని జిల్లాల్లోనూ ఈ సేవలు అందుబాటులోకి రానున్నాయని అధికారులు తెలిపారు.