Bihar Student Protests | పాట్నాలో రణరంగం: బారికేడ్లు బద్దలుకొట్టి సీఎం ఇంటికి విద్యార్థుల మార్చ్.. లాఠీలతో విరుచుకుపడ్డ పోలీసులు

Bihar Student Protests | త్రినేత్ర.న్యూస్ : బీహార్ రాజధాని పాట్నా (Patna) మంగళవారం తీవ్ర ఉద్రిక్తతలకు వేదికైంది. ప్రభుత్వ నియామకాల కోసం ప్రిపేర్ అవుతున్న వందలాది మంది అభ్యర్థులు, BPSC విద్యార్థులు ఒక్కసారిగా భగ్గుమన్నారు. ముఖ్యమంత్రి సామ్రాట్ చౌదరి నివాసాన్ని ముట్టడించేందుకు వారు భారీ ర్యాలీగా బయలుదేరగా.. దారిలో పోలీసులతో తీవ్ర స్థాయిలో ఘర్షణ జరిగింది. 70వ బీహార్ పబ్లిక్ సర్వీస్ కమిషన్ (BPSC) పరీక్షలో అవకతవకలు జరిగాయని, వెంటనే ఆ పరీక్షను రద్దు చేయాలన్నది వారి ప్రధాన డిమాండ్.

బారికేడ్లు ధ్వంసం.. లాఠీచార్జ్, వాటర్ క్యానన్స్

ముఖ్యమంత్రి ఇంటి వైపు వెళ్తున్న విద్యార్థులను అడ్డుకునేందుకు పోలీసులు దారి పొడవునా బారికేడ్లు (Barricades) ఏర్పాటు చేశారు. అయితే, ఆగ్రహంతో ఉన్న ఆందోళనకారులు ఆ బారికేడ్లను ధ్వంసం చేసుకుంటూ ముందుకు దూసుకెళ్లారు. దీంతో వారిని నిలువరించేందుకు పోలీసులు పలుచోట్ల లాఠీచార్జ్ (Lathicharge) చేయడంతో పాటు వాటర్ క్యానన్లను (Water cannons) ప్రయోగించారు. అయినప్పటికీ వెనక్కి తగ్గని విద్యార్థులు సీఎం నివాసం వైపు అడుగులు వేయడంతో, పరిస్థితిని అదుపు చేయడానికి పోలీసులు పలువురిని అదుపులోకి తీసుకున్నారు.

రైతుల మద్దతు.. దిగిన సీఆర్పీఎఫ్

ఈ ర్యాలీ ఉదయం 10 గంటల ప్రాంతంలో గాంధీ మైదాన్ నుంచి నినాదాల మధ్య ప్రారంభమైంది. పాట్నాలోని గార్డానిబాగ్ ఏరియాలో వీరు కొన్ని వారాలుగా ఆందోళనలు చేస్తున్నారు. BPSC-TRE 4లో సింగిల్-టైర్ ఎగ్జామ్ పెట్టాలని, బీహార్ స్టాఫ్ సెలక్షన్ కమిషన్ (BSSC) నియామకాల్లో పారదర్శకత ఉండాలని, హిందీ మీడియం అభ్యర్థులకు సమాన అవకాశాలు కల్పించాలని వారు కోరుతున్నారు. ఈ విద్యార్థుల ఆందోళనకు భూసమస్యలపై పోరాడుతున్న ఓ రైతు సంఘం కూడా నల్లజెండాలతో మద్దతు పలకడంతో.. ముందస్తు జాగ్రత్తగా ఆందోళనా స్థలంలో సీఆర్పీఎఫ్ (CRPF) బలగాలను మోహరించారు.

సీఎం లేదా మంత్రితోనే చర్చిస్తాం

సోమవారం ప్రభుత్వ అధికారులతో విద్యార్థి సంఘాల ప్రతినిధులు చర్చలు జరిపారు. ఆ చర్చలు సానుకూలంగానే జరిగినా.. తమ డిమాండ్లు నెరవేరే వరకు ఆందోళన ఆపబోమని విద్యార్థి నేత సౌరవ్ కుమార్ స్పష్టం చేశారు.

"ప్రభుత్వం ఎప్పుడూ జూనియర్ అధికారులతో చర్చలు జరిపించి చేతులు దులుపుకుంటోంది. మాకు ముఖ్యమంత్రి సామ్రాట్ చౌదరిని కలిసే అవకాశం ఇవ్వాలి. లేదా కనీసం విద్యాశాఖ మంత్రితో అయినా చర్చలు జరపాలి. ఒక అధికారిక ప్రకటన వస్తేనే మా ఆందోళన విరమిస్తాం" అని విద్యార్థి నేతలు తెగేసి చెబుతున్నారు.

ప్రభుత్వ దిద్దుబాటు చర్యలు: 'విద్యార్థి సహయోగ్ శిబిర్'

ఈ ఆందోళనల నేపథ్యంలో బీహార్ ప్రభుత్వం మంగళవారం కీలక ప్రకటన చేసింది. విద్యార్థుల సమస్యలను ఎప్పటికప్పుడు పరిష్కరించేందుకు ప్రతినెలా 'విద్యార్థి సహయోగ్ శిబిర్' (Student Support Camp) నిర్వహిస్తున్నట్లు ముఖ్యమంత్రి సామ్రాట్ చౌదరి సోషల్ మీడియా వేదికగా తెలిపారు.

ప్రతి నెలా నాలుగో మంగళవారం విద్యాసంస్థల్లో ఈ క్యాంపులు జరుగుతాయని, విద్యార్థులు నేరుగా సంబంధిత అధికారుల దృష్టికి తమ సమస్యలను తీసుకెళ్లవచ్చని ఆయన చెప్పారు. అలాగే ఆన్‌లైన్‌లో కంప్లైంట్ ఇవ్వడానికి ఒక ప్రత్యేక పోర్టల్‌తో పాటు '1100' టోల్ ఫ్రీ హెల్ప్‌లైన్ నెంబర్‌ను (Helpline number) కూడా ప్రభుత్వం అందుబాటులోకి తీసుకొచ్చింది.