Telangana Political Survey 2026 | కాంగ్రెస్ 1000 రోజుల పాలనపై సర్వే: షాకింగ్ రిపోర్ట్

• తెలంగాణ రాజకీయాల్లో మార్పులు
• కాంగ్రెస్ 1000 రోజుల పాలనపై 'చాణక్య స్ట్రాటజీస్' తాజా సర్వే

Telangana Political Survey 2026 | త్రినేత్ర.న్యూస్ : తెలంగాణలో కాంగ్రెస్ ప్రభుత్వం అధికారంలోకి వచ్చి 1000 రోజులు పూర్తయిన సందర్భంగా ప్రఖ్యాత పొలిటికల్ సర్వే సంస్థ 'చాణక్య స్ట్రాటజీస్' (Chanakya Strategies) సెప్టెంబర్ 1, 2026న మంగళవారం ఒక ఆసక్తికరమైన రిపోర్ట్‌ను విడుదల చేసింది. గత రెండు నెలలుగా రాష్ట్రవ్యాప్తంగా క్షేత్రస్థాయిలో ప్రజల నాడి, సంక్షేమ పథకాల అమలు, ప్రతిపక్షాల తీరు, నిరుద్యోగుల సమస్యలపై ఈ సంస్థ సమగ్రంగా సర్వే నిర్వహించింది. రాబోయే ఎన్నికల్లో ప్రజల తీర్పు ఎలా ఉండబోతుందనే దానిపై ఈ రిపోర్ట్ కీలక విషయాలను వెల్లడించింది.

సర్వేలో తేలిన ఓటింగ్ శాతం, ట్రెండ్స్

రాబోయే ఎన్నికల్లో ఏ పార్టీకి ఓటు వేస్తారని ప్రజలను ప్రశ్నించగా, బీఆర్ఎస్ (BRS) పార్టీ కాంగ్రెస్ కంటే కొంత ముందంజలో ఉన్నట్లు సర్వే గణాంకాలు స్పష్టం చేస్తున్నాయి. ఓటింగ్ శాతం వివరాలు ఇలా ఉన్నాయి.

• బీఆర్ఎస్ (BRS): 40.7%
• కాంగ్రెస్ (INC): 37.1%
• బీజేపీ (BJP): 14.1%
• ఏదీ కాదు (NONE): 8.1%

సర్వే నివేదిక ప్రకారం, బీఆర్ఎస్ పార్టీ గ్రాఫ్ కాంగ్రెస్ కంటే పెరిగింది. అయితే, ప్రభుత్వ ఇమేజ్ తగ్గినా దానిని తమకు అనుకూలంగా మార్చుకోవడంలో బీఆర్ఎస్ పూర్తి స్థాయిలో సక్సెస్ కాలేదని విశ్లేషణలు చెబుతున్నాయి. మరోవైపు, బీజేపీకి ఓటు బ్యాంకు ఉన్నప్పటికీ రోజురోజుకూ గ్రాఫ్ పడిపోతోందని, ముఖ్యంగా జీహెచ్ఎంసీ (GHMC) పరిధిలో ఆ పార్టీ పరిస్థితి గతంతో పోలిస్తే చాలా బలహీనంగా ఉందని తేలింది.

ఓటర్ల నాడిని వయసు, ఆర్థిక స్థితిగతుల ఆధారంగా పరిశీలిస్తే, 50 ఏళ్లకు పైబడిన వారు బీఆర్ఎస్ వైపు మొగ్గు చూపుతున్నారు. ఇక యువత (Zen-Z) ప్రస్తుతానికి స్తబ్దంగా ఉన్నప్పటికీ, వారు ఒక బలమైన ప్రత్యామ్నాయం కోసం ఎదురుచూస్తున్నట్లు రిపోర్ట్ వెల్లడించింది. గ్రామీణ ప్రాంతాల్లో దారిద్య్ర రేఖకు దిగువన ఉన్న (BPL) ఓటర్లు కాంగ్రెస్ పార్టీకి అండగా నిలవగా, దారిద్య్ర రేఖకు ఎగువన ఉన్న (APL) వర్గాల్లో మాత్రం ఒక రకమైన స్తబ్దత వాతావరణం నెలకొంది.

కాంగ్రెస్ ప్రభుత్వానికి కలిసొచ్చిన అంశాలు (Pros)

ప్రభుత్వం అమలు చేస్తున్న పలు సంక్షేమ పథకాలు క్షేత్రస్థాయిలో ప్రజల ఆదరణ పొందాయని చాణక్య స్ట్రాటజీస్ తెలిపింది. వాటిలో ప్రధానమైనవి

• మహిళలకు అందిస్తున్న ఉచిత బస్సు ప్రయాణ సదుపాయం
• కొత్త రేషన్ కార్డుల పంపిణీ కార్యక్రమం
• అర్హులైన పేదలందరికీ ఇందిరమ్మ ఇళ్లు మంజూరు చేయడం
• గృహాలకు 200 యూనిట్ల ఉచిత విద్యుత్ అందించడం
• కొంతమేరకు యువతకు ఉద్యోగ అవకాశాలు కల్పించడం
• రైతుల పంటలకు బోనస్ అందించడం
• గ్రామీణ ప్రాంతాల్లో రైతు రుణమాఫీ అమలుతో రైతాంగంలో వ్యక్తమవుతున్న సంతోషం
• మహిళల స్వయం ఉపాధి కోసం ప్రభుత్వం తీసుకున్న ప్రత్యేక చర్యలు

ప్రభుత్వంపై ఉన్న ప్రధాన వ్యతిరేకతలు (Cons)

అదే సమయంలో, ప్రభుత్వ పనితీరుపై కొన్ని వర్గాల్లో తీవ్ర అసంతృప్తి కూడా వ్యక్తమవుతోంది. ఈ నెగిటివ్ పాయింట్స్ రాబోయే రోజుల్లో కాంగ్రెస్ కు సవాలుగా మారే అవకాశం ఉంది.

• ఎన్నికల ముందు ఇచ్చిన హామీలను పూర్తి స్థాయిలో అమలు చేయకపోవడం పట్ల ప్రజల్లో ఉన్న అసంతృప్తి.
• నిరుద్యోగ భృతిపై ప్రభుత్వం ఇప్పటికీ ఎలాంటి స్పష్టత ఇవ్వకపోవడం.
• రైతుబంధు, రైతు బీమా పథకాల విషయంలో రైతాంగంలో నెలకొన్న గందరగోళం, అసంతృప్తి.
• రియల్ ఎస్టేట్ వ్యాపారం పూర్తిగా స్తంభించిపోవడం, హైడ్రా (HYDRA) ప్రభావం వల్ల ప్రజల్లో పెరిగిన భయాందోళనలు.
• గ్రామీణ ప్రాంతాల్లో చెప్పుకోదగ్గ స్థాయిలో మౌలిక అభివృద్ధి కార్యక్రమాలు జరగకపోవడం.
• స్థానిక ఎమ్మెల్యేలు (MLAs) యువతను ఆకర్షించే విధంగా పనిచేయడం లేదనే భావన ప్రజల్లో బలంగా ఉండటం.
• మహిళలకు వాగ్దానం చేసిన రూ. 2500, తులం బంగారం, స్కూటీ వంటివి ఇంకా ఇవ్వకపోవడంతో వారిలో పెరుగుతున్న వ్యతిరేకత.
• ప్రభుత్వం చేస్తున్న మంచి పనులను ప్రజల్లోకి బలంగా తీసుకువెళ్లడంలో సోషల్ మీడియాను సరిగ్గా వాడుకోలేకపోవడం.
• '22a' భూముల సమస్య వల్ల సామాన్య ప్రజల్లో ఏర్పడిన తీవ్ర ఆందోళన.

కాంగ్రెస్ ప్రభుత్వం ఈ 1000 రోజుల్లో సంక్షేమం పరంగా కొన్ని వర్గాలను ఆకట్టుకున్నప్పటికీ.. యువత, పట్టణ ఓటర్ల ఆకాంక్షలను అందుకోవడంలో ఇంకా శ్రమించాల్సి ఉందని ఈ సర్వే స్పష్టం చేస్తోంది. ముఖ్యంగా జెన్-జీ ఓటర్లు, రియల్ ఎస్టేట్ రంగం సవాళ్లను ప్రభుత్వం రాబోయే రోజుల్లో ఎలా డీల్ చేస్తుందనేది.. తెలంగాణ రాజకీయ ముఖచిత్రాన్ని మార్చే అవకాశం ఉంది.