Digital Census India | డిజిటల్ విధానంలో జనగణన నమోదు చాలా సులువు.. వెబ్‌సైట్ ద్వారా మీరే నమోదు చేసుకోండి: బండి సంజయ్

Digital Census India | త్రినేత్ర.న్యూస్ : దేశవ్యాప్తంగా ప్రతిష్టాత్మకంగా ప్రారంభమైన జనగణన (Census) ప్రక్రియ ఈసారి పూర్తిగా డిజిటల్ విధానంలో జరుగుతోందని, ప్రజలు అధికారుల కోసం ఎదురుచూడకుండా తమ వివరాలను వాళ్లే స్వయంగా నమోదు చేసుకునే సదుపాయం ఉందని కేంద్ర హోంశాఖ సహాయ మంత్రి బండి సంజయ్ కుమార్ తెలిపారు.

బుధవారం ఢిల్లీలోని తన నివాసంలో జాతీయ రిజిస్ట్రార్ జనరల్, జనాభా గణాంకాల కమిషనర్ మృత్యుంజయ్ కుమార్ నారాయణ్, జాయింట్ డైరెక్టర్ ధీరజ్ జైన్ తదితర అధికారుల సమక్షంలో బండి సంజయ్ తన ఇంటి వివరాలను డిజిటల్ విధానంలో స్వయంగా (Self-Enumeration) నమోదు చేసుకున్నారు.

తొలిదశలో ఏమేం నమోదు చేయాలి?

ఈ నెలలో ప్రారంభమైన జనగణనలో భాగంగా తొలిదశలో హౌజ్ లిస్టింగ్ (ఇంటి వివరాలు), హౌజింగ్ సెన్సెస్ (ఇంట్లోని సౌకర్యాలు) వివరాలను మాత్రమే నమోదు చేస్తున్నారు. లోకేషన్ డిటేల్స్, ఒక కుటుంబం ఉండే ఇల్లు, ఆఫీస్, ఇతర సౌకర్యాలు..  వివరాలను నమోదు చేయడానికి సెన్సెస్ అధికారుల ప్రమేయం అవసరం లేకుండా, ఎవరికి వారే ఇంటి నుండే తమ స్మార్ట్‌ఫోన్ లేదా కంప్యూటర్ ద్వారా నమోదు చేసుకునేందుకు కేంద్ర ప్రభుత్వం ప్రత్యేక పోర్టల్‌ను అందుబాటులోకి తెచ్చింది. ఆ వెబ్‌సైట్ లింక్: https://se.census.gov.in

వికసిత్ భారత్‌కు దోహదం

ఈ సందర్భంగా కేంద్ర మంత్రి బండి సంజయ్ మాట్లాడుతూ.. "ప్రధానమంత్రి నరేంద్ర మోదీ నాయకత్వంలో, హోంమంత్రి అమిత్ షా మార్గదర్శకత్వంలో కాగితాలతో పనిలేకుండా (పేపర్ లెస్) పూర్తిగా డిజిటల్ సాధనాలతో ఈ జాతీయ కార్యక్రమాన్ని నిర్వహిస్తుండటం శుభపరిణామం. ఇలాంటి ఆధునిక విధానాల వల్లే భారత అభివృద్ధి మరింత వేగవంతమై.. వికసిత్ భారత్ (Viksit Bharat) లక్ష్య సాధనకు దోహదపడుతుంది" అని అభిప్రాయపడ్డారు.

ప్రజల నుంచి మంచి స్పందన

పౌరులకు తమ వివరాలు తామే నమోదు చేసుకునే స్వీయ-ఎన్యుమరేషన్ అవకాశం కల్పించడం వల్ల ఈ ప్రక్రియ దిగ్విజయంగా పూర్తవుతుందన్న ఆశాభావాన్ని మంత్రి వ్యక్తం చేశారు. ఇప్పటికే దేశవ్యాప్తంగా పెద్ద సంఖ్యలో ప్రజలు ఈ ఆన్‌లైన్ పోర్టల్ ద్వారా తమ వివరాలను సమర్పించేందుకు ముందుకు వస్తుండటం సంతోషదాయకమని చెప్పారు.

ఇంకా నమోదు చేసుకోని వారు వెంటనే అధికారిక పోర్టల్ https://se.census.gov.in ను సందర్శించి సులభంగా తమ స్వీయ-ఎన్యూమరేషన్‌ను పూర్తి చేయాలని కేంద్ర మంత్రి బండి సంజయ్ దేశ ప్రజలకు పిలుపునిచ్చారు.