Kavitha Slams CM Revanth Reddy | రాజకీయంగా ఎదుర్కోలేకే కులాల ప్రస్తావన.. సీఎం రేవంత్‌పై కవిత ఫైర్ – ఆ ఎమ్మెల్యే రాజీనామా చేయాల్సిందే అని డిమాండ్

Kavitha Slams CM Revanth Reddy | త్రినేత్ర.న్యూస్ : తెలంగాణ ముఖ్యమంత్రి రేవంత్ రెడ్డి తీరుపై, ఇటీవల చోటుచేసుకున్న రాజకీయ పరిణామాలపై తెలంగాణ జాగృతి అధ్యక్షురాలు కల్వకుంట్ల కవిత తీవ్రస్థాయిలో మండిపడ్డారు. సీఎం హోదాలో ఉన్న వ్యక్తి ఒక సామాజిక వర్గాన్ని లక్ష్యంగా చేసుకుని మాట్లాడటం సరికాదని హితవు పలికారు. అలాగే జగిత్యాల ఎమ్మెల్యే సంజయ్ కుమార్ వ్యవహారంలో స్పీకర్ నిర్ణయాన్ని ఆమె తప్పుబట్టారు.

రాజ్యాంగం మీద ప్రమాణం చేసి

"రాజకీయంగా మమ్మల్ని ఎదుర్కొనే దమ్ములేకనే రేవంత్ రెడ్డి వెలమ జాతిని టార్గెట్ చేస్తూ విషం చిమ్ముతున్నారు. సీఎంగా ప్రమాణ స్వీకారం చేసినప్పుడు కులమత బేధాలు లేకుండా అందరినీ గౌరవిస్తానని రాజ్యాంగం సాక్షిగా మాటిచ్చారు. కానీ ఇప్పుడు అవన్నీ మరిచిపోయి, మర్యాదలు అతిక్రమించి నోటికి వచ్చినట్లు మాట్లాడటం పద్ధతి కాదు," అని కవిత ఆవేదన వ్యక్తం చేశారు. సీఎం తన వైఖరిని వెంటనే మార్చుకోవాలని ఆమె సూచించారు.

గాంధీ భవన్ మెట్లు ఎక్కిన వ్యక్తికి క్లీన్ చిట్టా?

జగిత్యాల ఎమ్మెల్యే సంజయ్ కుమార్‌కు ఫిరాయింపుల విషయంలో స్పీకర్ క్లీన్ చిట్ ఇవ్వడంపై కవిత ఆగ్రహం వ్యక్తం చేశారు. "ఎమ్మెల్యే సంజయ్ బీఆర్ఎస్ నుంచి కాంగ్రెస్ లోకి మారిన విషయం ప్రజలందరికీ తెలుసు. స్వయంగా ముఖ్యమంత్రి సమక్షంలోనే ఆయన పార్టీ మారారు. గాంధీ భవన్‌లో అధికారిక మీటింగ్‌లకు హాజరయ్యారు. అంతేకాదు, జగిత్యాలలో 30 మంది మున్సిపల్ అభ్యర్థులకు కాంగ్రెస్ బీ-ఫామ్ (B-Forms) లు కూడా పంపిణీ చేశారు. ఇన్ని సాక్ష్యాలు ఉండగా ఆయనకు క్లీన్ చిట్ ఎలా ఇస్తారు?" అని ఆమె ప్రశ్నించారు.

నైతికత ఉంటే రాజీనామా చేయాలి

రాజ్యాంగబద్ధమైన హక్కులను ఒక్కొక్కటిగా తుంగలో తొక్కడం భవిష్యత్ తరాలకు మంచిది కాదని కవిత హెచ్చరించారు. "సంజయ్‌కి ఏమాత్రం నీతి, నిజాయితీ ఉన్నా వెంటనే తన ఎమ్మెల్యే పదవికి రాజీనామా చేయాలి. స్పీకర్ కూడా ఈ విషయంలో తన నిర్ణయాన్ని వెనక్కి తీసుకోవాలని డిమాండ్ చేస్తున్నా," అని కవిత స్పష్టం చేశారు.

[video width="832" height="464" mp4="https://axdxht1orlhu.compat.objectstorage.ap-hyderabad-1.oraclecloud.com/static.trinethra/wp-content/uploads/2026/02/WhatsApp-Video-2026-02-05-at-12.29.34.mp4"][/video]

[video width="832" height="464" mp4="https://axdxht1orlhu.compat.objectstorage.ap-hyderabad-1.oraclecloud.com/static.trinethra/wp-content/uploads/2026/02/WhatsApp-Video-2026-02-05-at-12.29.34-1.mp4"][/video]