Attack on Komatireddy Office | మంత్రి కోమ‌టిరెడ్డి ఆఫీసుపై కోడిగుడ్లతో బీజేపీ దాడి.. ఆగ్ర‌హంతో కాంగ్రెస్ నేత‌ల ప్ర‌తిదాడి

Attack on Komatireddy Office |  త్రినేత్ర‌.న్యూస్‌: న‌ల్ల‌గొండ జిల్లా కేంద్రంలో బీజేపీ, కాంగ్రెస్ కార్య‌క‌ర్త‌ల దాడులు, ప్ర‌తిదాడుల‌తో తీవ్ర ఉద్రిక్త‌త వాతావ‌ర‌ణం నెల‌కొంది. మంత్రి కోమటి రెడ్డి వెంకటరెడ్డి ఆఫీసుపై బీజేపీ కార్యకర్తలు కోడిగుడ్లు, టమాటాలతో దాడి చేశారు. అనంతరం మంత్రి దొష్టిబొమ్మ‌తో పాటు అక్క‌డే ఉన్న కోమ‌టిరెడ్డి ఫ్లెక్సీని త‌గ‌ల‌బెట్టారు. తమ పార్టీ ఆఫీసుపైకి వస్తే ప్రతిఘటన తప్పదని బీజేపీ శ్రేణులు తీవ్ర హెచ్చరికలు జారీ చేశారు. దీనికి ప్రతిగా కాంగ్రెస్‌ నాయకులు నల్లగొండ బీజేపీ ఆఫీసుపై దాడికి తెగబడ్డారు. జిల్లా అధ్యక్షుడు నాగం వర్షిత్ రెడ్డి ఇంటిపై దాడి చేయ‌డంతో తీవ్ర ఉద్రిక్తత చోటుచేసుకుంది.

నాగం వర్షిత్ రెడ్డి ఇంటిపై కోమ‌టిరెడ్డి వ‌ర్గం దాడి చేయ‌గా ఇంట్లో ఉన్న ఫ‌ర్నీచ‌ర్ పూర్త‌గా ధ్వంస‌మైంది. ఈ క్ర‌మంలో ఒకానొక ద‌శ‌లో ఇరు పార్టీల కార్య‌క‌ర్త‌లు ఎదుప‌డి పరస్పరం రాళ్లు రువ్వుకున్నారు. దీంతో కాసేపు అక్క‌డ హైటెన్ష‌న్ వాతావ‌ర‌ణం నెల‌కొంది. స‌మాచారం అందుకున్న పోలీసులు వ‌చ్చి ఆందోళనకారులను చెదరగొట్టారు. దీంతో గొడ‌వ స‌ద్దుమ‌ణిగిన‌ట్ల‌యింది.

ఇదిలా ఉండగా సోమ‌వారం హైదరాబాద్‌లోని బీజేపీ కార్యాలయం ముట్టడికి యూత్‌ కాంగ్రెస్‌ కార్యకర్తలు ప్రయత్నించారు. అమిత్‌ షా దిష్టిబొమ్మను ద‌హ‌నం చేశారు. అనంత‌రం బీజేపీ ఆఫీస్‌ గేట్లకు నల్లరంగు పూయడంతో పరిస్థితి మరింత ఉద్రిక్తంగా మారింది. దీనికి ప్రతికారంగా గాంధీ భవన్‌ ముట్టడికి బీజేవైఎం నేతలు ప్రయత్నించారు. గాంధీ భవన్‌ వైపు వచ్చిన పలువురు బీజేవైఎం నేతలను పోలీసులు అదుపులోకి తీసుకుని అరెస్ట్‌ చేశారు. ఈ నేపథ్యంలో కోమటిరెడ్డి ఆఫీసుపై మరోసారి బీజేపీ శ్రేణులు దాడి చేశారు.

నల్లగొండలో మంత్రి కోమటిరెడ్డి వెంకట్ రెడ్డి క్యాంప్ ఆఫీసుపై కోడిగుడ్లు, టమాటాలతో దాడి చేసిన బీజేపీ నేతలు

మంత్రి కోమటిరెడ్డి దిష్టిబొమ్మను, క్యాంప్ ఆఫీసు దగ్గరున్న ఫ్లెక్సీని తగలబెట్టిన బీజేపీ జిల్లా అధ్యక్షుడు నాగం వర్షిత్ రెడ్డి

అనంతరం నాగం వర్షిత్ రెడ్డి ఇంటిపై దాడి చేసిన… pic.twitter.com/EDjpExPsSK

— Telugu Scribe (@TeluguScribe) August 31, 2026