Bhadrachalam 5 Gram Panchayats Merger | భద్రాచలం మన ఊపిరి.. మా నేల మాకే: 5 గ్రామాల విలీనంపై గర్జించిన టీజీవో అధ్యక్షుడు ఏలూరి

Bhadrachalam 5 Gram Panchayats Merger | త్రినేత్ర.న్యూస్ : భద్రాచలంలోని ఐదు గ్రామ పంచాయతీల విలీనం అంశం మరోసారి తీవ్ర దుమారం రేపుతోంది. ఈ విలీన ప్రతిపాదనలను తీవ్రంగా వ్యతిరేకిస్తూ స్థానిక నాయకులు, ప్రజలు ఆందోళన వ్యక్తం చేస్తున్నారు. తాజాగా భద్రాచలంలో సోమవారం జరిగిన కీలక అఖిలపక్ష సమావేశంలో టీజీవో (TGO) అధ్యక్షుడు ఏలూరి శ్రీనివాస్ విలీన ప్రక్రియపై ఘాటుగా స్పందించారు. భద్రాచలం సమగ్రత కోసం, ప్రజల హక్కుల కోసం ఎంతటి పోరాటానికైనా సిద్ధమేనని ఆయన ప్రకటించారు.

న్యాయం జరిగే వరకు అలుపెరుగని పోరాటం

"ఆ ఐదు గ్రామాలను ఎట్టి పరిస్థితుల్లోనూ కలపొద్దు" అంటూ ఏలూరి శ్రీనివాస్ స్పష్టమైన సందేశాన్ని ఇచ్చారు. స్థానిక ప్రజల మనోభావాలను, హక్కులను కాలరాస్తే చూస్తూ ఊరుకోబోమని హెచ్చరించారు. గతంలో భద్రాచలం మనుగడ కోసం తాను చేసిన ఆమరణ నిరాహార దీక్షను ఈ సందర్భంగా ఆయన గుర్తుచేశారు. అప్పట్లో ఎలాగైతే ప్రాణాలకు తెగించి పోరాడామో, ఇప్పుడు ఈ ఐదు గ్రామాల సమస్యపై కూడా అదే స్థాయిలో ఉద్యమం కొనసాగుతుందని ఆయన స్పష్టం చేశారు.

"అకుంఠిత దీక్ష.. అలుపెరుగని పోరాటం.. మన గ్రామ పంచాయతీలే మన లక్ష్యం" అంటూ నినాదాలు చేశారు.

భద్రాచలం మన ఊపిరి అని, ఆ ఐదు గ్రామ పంచాయతీలే తమ హక్కు అని ఆయన ఉద్ఘాటించారు. న్యాయం జరిగే వరకు ఈ పోరాటం ఆగదని తేల్చి చెప్పారు.

భద్రాద్రి సాక్షిగా ప్రజా ఉద్యమం

ముక్కలైన ఊర్లను కాపాడుకోవడానికి ఇప్పుడు బలమైన నాయకత్వం, ఐక్యత ఎంతో అవసరమని ఏలూరి శ్రీనివాస్ అన్నారు. ప్రజలే తమ అసలైన బలమని, భద్రాద్రి రామయ్య సాక్షిగా ప్రజా సంకల్పంతో ఈ ఉద్యమాన్ని బలంగా ముందుకు తీసుకెళ్తామని ఆయన తెలిపారు. "మా నేల మాకే.. మా గ్రామ పంచాయతీలు మాకే" అనే నినాదంతో భద్రాచలం సమగ్రత కోసం ప్రతి ఒక్కరూ గొంతెత్తాలని, ప్రజలంతా ఏకతాటిపైకి రావాలని ఆయన పిలుపునిచ్చారు.

ఈ అఖిలపక్ష సమావేశంతో ఐదు గ్రామాల విలీనంపై వ్యతిరేక స్వరం మరింత బలపడిందని, ప్రభుత్వాలు స్పందించకపోతే రాబోయే రోజుల్లో ఈ ఉద్యమాన్ని మరింత ఉధృతం చేస్తామని ఏలూరి శ్రీనివాస్ రావు హెచ్చరించారు. భద్రాచలం ప్రజల అస్తిత్వాన్ని కాపాడే ఈ పోరాటానికి అందరూ మద్దతుగా నిలవాలని ఆయన కోరారు.