CM Revanth Reddy | ట్యాంక్ బండ్ శివకు సీఎం రేవంత్ రెడ్డి చేయూత

CM Revanth Reddy | ట్యాంక్ బండ్ ప్రాంతంలో అనేక మంది ప్రాణాలను రక్షించి గుర్తింపు పొందిన శివకు రాష్ట్ర ప్రభుత్వం అండగా నిలిచింది. ముఖ్యమంత్రి రేవంత్‌రెడ్డి స్వయంగా స్పందించి శికు కుటుంబానికి ఆర్థిక సహాయం అందించారు. శివ కుటుంబానికి రూ.5 లక్షల ఆర్థికసాయం మంజూరు చేయడంతో పాటు, ఆయన కుమారుడు వేణుమాధవ్‌కు హోం గార్డు ఉద్యోగ నియామకపత్రాన్ని సీఎం అందజేశారు.

ట్యాంక్ బండ్‌పై అనేక మంది ప్రాణాలను కాపాడిన శివ ప్రస్తుతం ఉపాధి లేక కుటుంబ పోషణలో ఇబ్బందులు ఎదుర్కొంటున్న విషయం ఇటీవల సీఎం దృష్టికి వచ్చింది. ఈ నేపథ్యంలో శివకు అవసరమైన సహాయం అందించాలని కొద్ది రోజుల క్రితం అధికారులకు సీఎం ఆదేశాలు జారీ చేశారు. ఉపాధి కల్పనలో భాగంగా ట్యాంక్ బండ్ సమీపంలో స్విమ్మింగ్ పూల్ నిర్మించాలని శివ చేసిన విజ్ఞప్తిని కూడా పరిగణలోకి తీసుకుని, ఆ దిశగా చర్యలు చేపట్టాలని అధికారులను సీఎం ఆదేశించారు. అదేవిధంగా శివ కుటుంబానికి డబుల్ బెడ్రూం ఇల్లు మంజూరు చేయాలని కూడా ప్రభుత్వం నిర్ణయించింది. సీఎం చేతులమీదుగా సాయం అందుకోవడంపై శివ, ఆయన కుటుంబ సభ్యులు ఆనందం వ్యక్తం చేశారు.