Babli Project | బాబ్లీ ప్రాజెక్టు 14 గేట్లు ఎత్తివేత‌..

Babli Project | త్రినేత్ర‌.న్యూస్ : ఎప్ప‌టిలాగే ఈ ఏడాది కూడా జులై 1వ తేదీన బాబ్లీ ప్రాజెక్టు గేట్లు తెరుచుకున్నాయి. మ‌హారాష్ట్ర‌లోని బాబ్లీ ప్రాజెక్టు గేట్లను బుధ‌వారం ఉద‌యం ఎత్తేశారు. మహారాష్ట్ర, తెలంగాణ రాష్ట్రాల నీటిపారుదల శాఖ అధికారులు క‌లిసి 14 గేట్లు ఎత్తి ప్రాజెక్టులో నిల్వ ఉన్న నీటిని దిగువ‌కు విడుదల చేశారు. సుప్రీంకోర్టు ఆదేశాల మేరకు జులై ఒకటి నుంచి అక్టోబర్ 28 వరకు ఈ గేట్లను తెరిచి ఉంచుతారు.

గోదావరి నదిపై మహారాష్ట్ర ప్రభుత్వం ధర్మాబాద్‌ తాలూకా బాబ్లీ గ్రామం వద్ద 2.74 టీఎంసీల నీటి నిల్వ సామర్థ్యంతో నిర్మించిన ఈ ప్రాజెక్టు గేట్లు ఏటేటా జూలై 1న ఎత్తి నీటిని వదలాలని సుప్రీంకోర్టు సూచించిన సంగ‌తి తెలిసిందే.

వివాదాస్పద బాబ్లీ ప్రాజెక్టుకు వ్యతిరేకంగా ఎన్నో పోరాటాలు జరిగాయి. ఉమ్మడి ఆంధ్ర‌ప్ర‌దేశ్‌లోనూ బాబ్లీ ప్రాజెక్టుపై కోర్టులకు వెళ్లాయి. అప్పట్లో సుప్రీంకోర్టు ఏటా జూలై 1నుంచి అక్టోబర్‌ 28 వరకు 14గేట్లు తెరిచి ఉంచాలని ఆదేశించింది. వర్షాకాలంలో నది నీటి ప్రవాహానికి అడ్డు లేకుండా చూడాలని సూచించింది. దీంతో మ‌హారాష్ట్ర‌, తెలంగాణ నీటి పారుద‌ల శాఖ అధికారులు క‌లిసి ప్ర‌తి ఏడాది బాబ్లీ ప్రాజెక్టు గేట్ల‌ను ఎత్త‌నున్నారు.

ఎస్సారెస్పీలోకి బాబ్లీ నీరు

తెలంగాణ రాష్ట్ర సరిహద్దుకు 7 కిలోమీటర్ల దూరంలో బాబ్లీ ప్రాజెక్టు ఉంది. గేట్లు ఎత్తగానే బాబ్లీ ప్రాజెక్టు నీరు నిజామాబాద్‌ జిల్లాలోని ఎస్సారెస్పీలోకి వెళ్తుంది. బాబ్లీ ప్రాజెక్టు నుంచి ఎస్సారెస్పీ వరకు సుమారు 70 కిలోమీటర్ల దూరం ఉంది. అక్కడి వరకు నీరు చేరాలంటే కొంతసమయం పడుతుంది.