Affordable Organ Transplants in Telangana | సామాన్యులకు అందుబాటులో అవయవ మార్పిడి: ప్రైవేట్ ఆసుపత్రులకు మంత్రి దామోదర్ రాజనర్సింహ కీలక ఆదేశాలు

Affordable Organ Transplants in Telangana | రాష్ట్రంలో వైద్య సేవలను సామాన్యులకు మరింత చేరువ చేసే దిశగా తెలంగాణ ప్రభుత్వం కీలక అడుగులు వేస్తోంది. ముఖ్యంగా ప్రైవేటు ఆసుపత్రుల్లో లక్షల రూపాయలు ఖర్చయ్యే అవయవ మార్పిడి (Organ Transplantation) చికిత్సలపై ప్రభుత్వం దృష్టి సారించింది. రాష్ట్ర వైద్య, ఆరోగ్య శాఖ మంత్రి దామోదర్ రాజనర్సింహ సచివాలయంలో ప్రైవేటు ఆసుపత్రుల యాజమాన్యాలతో ఉన్నత స్థాయి సమీక్షా సమావేశం నిర్వహించారు. ట్రాన్స్ ప్లాంటేషన్ ఆఫ్ హ్యూమన్ ఆర్గాన్స్ అండ్ టిష్యూస్ ఆక్ట్ (THOTA) పాలసీ రూపకల్పన, క్లినికల్ ఎస్టాబ్లిష్మెంట్ యాక్ట్ అమలు తదితర అంశాలపై సుదీర్ఘంగా చర్చించారు.

ధరల నియంత్రణపై మంత్రి సీరియస్

ప్రైవేటు ఆసుపత్రుల్లో అవయవ మార్పిడికి వసూలు చేస్తున్న భారీ ధరలపై మంత్రి ఆగ్రహం వ్యక్తం చేశారు. సామాన్య ప్రజలు సైతం ఈ చికిత్సల ఖర్చును భరించే విధంగా ధరల నియంత్రణ (Tariff Control) ఉండాలని యాజమాన్యాలకు తేల్చి చెప్పారు. మంత్రి సూచనలకు ప్రైవేట్ ఆసుపత్రుల ప్రతినిధులు సానుకూలంగా స్పందించారు.

అవయవ దానంలో తెలంగాణ ఆదర్శం కావాలి

అవయవ దానాలను మరింత ప్రోత్సహించేందుకు విధివిధానాలను సరళీకృతం చేయాలని అధికారులను మంత్రి ఆదేశించారు. దాతలు ఇచ్చిన అవయవాలు ఏమాత్రం వృథా కాకుండా ఆసుపత్రులు ప్రత్యేక చర్యలు చేపట్టాలన్నారు. అవయవ మార్పిడి చికిత్సల్లో తెలంగాణ రాష్ట్రం దేశానికే ఆదర్శంగా నిలిచేలా సమగ్ర కార్యాచరణను రూపొందించాలని సూచించారు.

విదేశీ రోగులకు నూతన విధివిధానాలు

ఇతర దేశాల నుండి ఆర్గాన్ ట్రాన్స్ ప్లాంటేషన్ కోసం తెలంగాణకు వచ్చే రోగుల కోసం నూతన, స్పష్టమైన విధివిధానాలను (Guidelines) రూపొందించాలని మంత్రి అధికారులను ఆదేశించారు. అలాగే, ప్రైవేట్ ఆసుపత్రులు ఎదుర్కొంటున్న సమస్యలను అడిగి తెలుసుకున్న ఆయన, అవయవ మార్పిడి చికిత్సలకు ప్రభుత్వం తరఫున పూర్తి సహకారం ఉంటుందని హామీ ఇచ్చారు. రాష్ట్రంలో చెయ్యి మార్పిడి (Hand Transplant) చికిత్స కోసం ఇప్పటికే 4 ఆసుపత్రులకు అనుమతులు ఇచ్చినట్లు వెల్లడించారు.

క్లినికల్ ఎస్టాబ్లిష్మెంట్ యాక్ట్ పకడ్బందీగా అమలు

రాష్ట్రవ్యాప్తంగా క్లినికల్ ఎస్టాబ్లిష్మెంట్ యాక్ట్‌ను పకడ్బందీగా, సమర్థవంతంగా అమలు చేయాలని అధికారులను మంత్రి ఆదేశించారు. ప్రైవేట్ ఆసుపత్రుల్లో చికిత్సలకు అయ్యే ఖర్చులపై నియంత్రణ ఉండేలా ఇప్పటికే కార్యాచరణకు శ్రీకారం చుట్టామన్నారు. వైద్య ఖర్చులు సామాన్యులకు భారం కాకుండా చూడాల్సిన బాధ్యత అందరిపైనా ఉందన్నారు.

ఈ సమావేశంలో హెల్త్ సెక్రటరీ డా.క్రిస్టినా జెడ్ చొంగ్తు, డైరెక్టర్ మెడికల్ ఎడ్యుకేషన్ డా.నరేంద్ర కుమార్, జీవన్ దాన్ డైరెక్టర్ డా.భూషణ్ రాజ్, తెలంగాణ వైద్య విధాన పరిషత్ కమిషనర్ డాక్టర్ అజయ్ కుమార్, వివిధ ప్రైవేట్ ఆస్పత్రుల యాజమాన్యాలు, ప్రతినిధులు పాల్గొన్నారు.