Free Master Health Camp | ప్రెస్ క్లబ్ సభ్యులకు నిమ్జ్‌లో ఉచిత మాస్టర్ హెల్త్ చెకప్ క్యాంప్..!

Free Master Health Camp | తెలంగాణ రాష్ట్ర అవతరణ వారోత్సవాలను పురస్కరించుకుని హైదరాబాద్ ప్రెస్ క్లబ్ సభ్యులందరికీ నిమ్స్ ఆసుపత్రిలో ఉచిత మాస్టర్ హెల్త్ చెకప్ క్యాంప్ నిర్వహించేందుకు మంత్రి దామోదర్ రాజనర్సింహ సానుకూలంగా స్పందించారు. సోమాజిగూడలోని హైదరాబాద్ ప్రెస్ క్లబ్ అధ్యక్షుడు ఎస్ విజయ్ కుమార్ రెడ్డి, ప్రధాన కార్యదర్శి రమేశ్ వరికుప్పల, ఉపాధ్యక్షురాలు అరుణ అత్తలూరి మంగళవారం సచివాలయంలో మంత్రిని కలిసి వినతిపత్రం సమర్పించారు. జూన్ 2న ప్రెస్ క్లబ్ సభ్యుల కోసం నిమ్స్ ఆసుపత్రిలో ప్రత్యేక మాస్టర్ హెల్త్ చెకప్ క్యాంప్ నిర్వహించాలని కోరారు.

ఈ సందర్భంగా మంత్రి దామోదర్ రాజనర్సింహ మాట్లాడుతూ నిత్యం ప్రజలకు అందుబాటులో ఉంటూ బాధ్యతాయుతంగా విధులు నిర్వహించే జర్నలిస్టులు తమ ఆరోగ్యంపై ప్రత్యేక శ్రద్ధ పెట్టాల్సిన అవసరం ఉందన్నారు. మీడియా ప్రతినిధులు క్రమం తప్పకుండా ఆరోగ్య పరీక్షలు చేయించుకోవాలని సూచించారు. ప్రెస్ క్లబ్ సభ్యుల కోసం నిమ్స్‌లో ప్రత్యేక హెల్త్ చెకప్ నిర్వహణకు అవసరమైన ఏర్పాట్లు చేయాలని ప్రభుత్వ కార్యదర్శి క్రిస్టీనాకు మంత్రి ఆదేశాలు జారీ చేశారు. ప్రెస్ క్లబ్ సభ్యులకు మాస్టర్ హెల్త్ చెకప్ క్యాంప్ నిర్వహణకు సానుకూలంగా స్పందించిన మంత్రి దామోదర్ రాజనర్సింహకు, రాష్ట్ర ప్రభుత్వానికి హైదరాబాద్ ప్రెస్ క్లబ్ పాలక మండలి సభ్యులు కృతజ్ఞతలు తెలిపారు.