గాంధీ భవన్‌లో ‘పాత గురుతులు’.. పాలనలో ‘వలస వెలుగులు’: రేవంత్ మార్క్ కాంగ్రెస్‌లో అసలు కేడర్ ప్రశ్న!

అచ్చ కాంగ్రెస్ వర్సెస్ వలస కాంగ్రెస్: గాంధీ భవన్ పాతకాపులకు రేవంత్ చెక్.. వలస నేతలకు కేబినెట్ గిఫ్ట్!

 

తెలంగాణ కాంగ్రెస్ అధికారంలోకి వచ్చిన దాదాపు మూడేళ్ల తర్వాత (2023 డిసెంబర్ నుంచి 2026 సెప్టెంబర్ నాటికి), గాంధీ భవన్ రాజకీయం ఒక అత్యంత కీలకమైన, సున్నితమైన మలుపు తిరిగింది. ప్రభుత్వం ఇటీవల తీసుకున్న కొన్ని నిర్ణయాలు — కొండా సురేఖను కేబినెట్ నుంచి బర్తరఫ్  చేయడం, స్టేట్ ప్లానింగ్ బోర్డ్ వైస్ చైర్మన్ పదవి నుంచి సీనియర్ నేత జి. చిన్నారెడ్డి తొలగింపు, అదే సమయంలో బీఆర్‌ఎస్ నుంచి కాంగ్రెస్‌లోకి వచ్చిన మాజీ జీహెచ్‌ఎంసీ మేయర్ గద్వాల విజయలక్ష్మికి ఆ స్థానంలో కేబినెట్ హోదాతో బాధ్యతలు అప్పగించడం — పార్టీలోని పాత, కొత్త సమీకరణాలు చర్చాంశనీయంగా మారాయి . ఈ పరిణామాలు, గతంలో మునుగోడు ఎమ్మెల్యే కోమటిరెడ్డి రాజగోపాల్ రెడ్డి, పీసీసీ వర్కింగ్ ప్రెసిడెంట్ జగ్గారెడ్డి వంటి సీనియర్ నేతలు లేవనెత్తిన అంశాలనే స్ఫురింపజేస్తున్నాయి. "అచ్చ కాంగ్రెస్ వర్సెస్ వలస (టీడీపీ/బీఆర్‌ఎస్) కాంగ్రెస్" అనే అంతర్గత రాజకీయ సమీకరణంపై చర్చకు ఇవి మరింత ఊతమిచ్చాయి.

సొంత పార్టీపై విమర్శలు.. చివరికి ఆయన పదవికే ఎసరు!

గాంధీ భవన్‌లో రాజుకున్న ఈ వివాదానికి మూలాలు ఇటీవలి పరిణామాల్లోనే కనిపిస్తున్నాయి. 1985లో యువజన కాంగ్రెస్ నాయకుడిగా ప్రస్థానం ప్రారంభించిన సీనియర్ నేత జి.చిన్నా రెడ్డి దాదాపు నాలుగు దశాబ్దాలుగా కాంగ్రెస్‌లో కొనసాగుతున్న సీనియర్ నేత. అతన్ని  ప్లానింగ్ బోర్డ్ స్థానం నుంచి తప్పించడం చర్చనీయాంశంగా మారింది. విచిత్రమేమిటంటే, . ఇతర పార్టీల నుంచి వచ్చిన టర్న్‌కోట్‌లకు, బీఆర్‌ఎస్ వలస నేతలకే పార్టీలో ప్రాధాన్యం ఇస్తున్నారని (టీ. జీవన్ రెడ్డి ఉదాహరణను ప్రస్తావిస్తూ) చిన్నారెడ్డి ఇటీవలే తీవ్ర విమర్శలు చేశారు. అలా విమర్శించిన కొద్దిరోజులకే ఆయన పదవి రద్దు కావడం, ఆ స్థానంలో బీఆర్‌ఎస్ నుంచి వచ్చిన గద్వాల విజయలక్ష్మిని నియమించడం రాజకీయంగా ఒక పెద్ద ఐరనీగా మారింది.

విస్తరిస్తున్న అసంతృప్త స్వరాలు: రాజగోపాల్ రెడ్డి, జగ్గారెడ్డి వ్యాఖ్యలు

ఈ వివాదం కేవలం ఒకరిద్దరి ప్రకటనలతో ముగిసిపోలేదు. గతంలోనూ పలువురు సీనియర్లు ఈ అంశంపై భిన్న వేదికలపై స్పందించారు. పలుమార్లు పలు వేదికల నుండి మునుగోడు ఎమ్మెల్యే కోమటిరెడ్డి రాజగోపాల్ రెడ్డి మాట్లాడుతూ.. 'ఒరిజినల్ కాంగ్రెస్' నేతలు పక్కన పడుతున్నారని, ఇతర పార్టీల నుంచి వచ్చిన వలస నేతల ఆధిపత్యం పెరిగిపోతోందని, కష్టపడ్డ నేతలకు పదవుల్లో ప్రాధాన్యం ఇవ్వాలని బహిరంగ వ్యాఖ్యలు చేశారు. అలాగే, గతంలో వర్కింగ్ ప్రెసిడెంట్ జగ్గారెడ్డి సైతం టి. జీవన్ రెడ్డి వంటి సుదీర్ఘ అనుభవం ఉన్న నాయకుల సేవలను గుర్తించాలని అధిష్ఠానాన్ని కోరడం, ఇతర పార్టీల వలస నేతల ప్రాబల్యంపై కాంగ్రెస్ ను వీడి ఇటీవలే బీఆర్ఎస్ లో చేరిన జీవన్ రెడ్డి అసంతృప్తిని వ్యక్తం చేయడం కూడా పాత కాంగ్రెస్ నేతల వేదనను స్పష్టం చేస్తోంది.

వలస నేతలకు అగ్రతాంబూలం? పవర్ మ్యాప్ విశ్లేషణ

2017లో రేవంత్ రెడ్డి టీడీపీని వీడి కాంగ్రెస్‌లోకి వచ్చిన నాటి నుంచి, ఆయన వెంట వచ్చిన వారు, లేదా తర్వాత కాలంలో పార్టీలో చేరినా.. వారికి ప్రాముఖ్యత ఇస్తున్నారన్న చర్చ కాంగ్రెస్ లో సాగుతోంది.
ఇతర పార్టీల మూలాలు ఉన్న నాయకులకు లభించిన రాజకీయ స్థానం ప్రస్తుతం పాత కాపు నేతల్లో చర్చనీయాంశంగా మారింది. ప్రభుత్వ అధికారిక పదవుల సరళిని పరిశీలిస్తే ఒక నమూనా స్పష్టమవుతుంది:

వేం నరేందర్ రెడ్డి: టీడీపీ నేపథ్యం, రేవంత్‌కు సన్నిహిత రాజకీయ సహచరుడిగా గుర్తింపు ఉన్న వేం నరేందర్ రెడ్డికి ముందుగా సీఎం సలహాదారు (పబ్లిక్ అఫైర్స్) పదవి లభించగా, 2026లో కాంగ్రెస్ రాజ్యసభ అభ్యర్థిగా ఏకగ్రీవంగా ఎన్నికయ్యారు.

కే. కేశవరావు (KK): బీఆర్‌ఎస్ నుంచి కాంగ్రెస్‌లో చేరిన అనంతరం ప్రభుత్వ ముఖ్య సలహాదారు (కేబినెట్ హోదా) బాధ్యతలు చేపట్టారు.

పోచారం శ్రీనివాస్ రెడ్డి: బీఆర్‌ఎస్ నుంచి వచ్చిన మాజీ స్పీకర్‌కు తెలంగాణ ప్రభుత్వంలో వ్యవసాయ సలహాదారు పదవి దక్కింది.

ఎ.పి. జితేందర్ రెడ్డి: బీజేపీ నుంచి కాంగ్రెస్‌లోకి వచ్చి ప్రభుత్వ సలహాదారుగా నియమితులయ్యారు.

గద్వాల విజయలక్ష్మి: బీఆర్‌ఎస్ నుంచి కాంగ్రెస్‌లోకి వచ్చిన ఈమెకు తాజా పరిణామాల్లో ప్లానింగ్ బోర్డ్ వైస్ చైర్‌పర్సన్ (కేబినెట్ హోదా) స్థానం కట్టబెట్టారు.

కీలక మంత్రులు: మంత్రులు సీతక్క, తుమ్మల నాగేశ్వరరావు, జూపల్లి కృష్ణారావు, పొంగులేటి శ్రీనివాస్ రెడ్డి — వీరికి టీడీపీ, బీఆర్‌ఎస్ లేదా ఇతర పార్టీలతో గత రాజకీయ అనుబంధాలు ఉన్నప్పటికీ ప్రస్తుతం కాంగ్రెస్ ప్రభుత్వంలో కీలక శాఖలు నిర్వహిస్తున్నారు.

ఏళ్ల తరబడి గాంధీ భవన్ మెట్లు ఎక్కి దిగి, ప్రతిపక్షంలో ఉన్నప్పుడు పోరాడిన తమను కాదని, సరికొత్తగా వచ్చిన నాయకులకు ప్రభుత్వం మరియు బోర్డుల్లో ప్రాధాన్యత ఇస్తున్నారనే విమర్శ ఇక్కడే వ్యక్తమవుతోంది.

క్రమశిక్షణ పేరుతో పాతకాపులపై వేటు?

కేబినెట్ నిర్ణయాలు, పదవుల రద్దు పరిణామాల నేపథ్యంలో పార్టీ క్రమశిక్షణ పేరుతో తీసుకుంటున్న చర్యలపై మూల కాంగ్రెస్ వర్గాల్లో తీవ్ర అసంతృప్తి వ్యక్తమవుతోంది. సుదీర్ఘకాలం పార్టీని నమ్ముకున్న నేతలపై చర్యలు వేగంగా ఉంటున్నాయని, అదే సమయంలో ఇతర పార్టీల నుంచి వచ్చిన వలస నేతలకు మాత్రం రక్షణ కల్పిస్తున్నారనే అభిప్రాయం పాతకాపుల్లో బలపడుతోంది. “క్రమశిక్షణ పేరుతో పాత నాయకత్వాన్ని క్రమంగా పక్కన పెట్టే ప్రయత్నం జరుగుతోందా?” అనే సంశయం గాంధీ భవన్ వర్గాల్లో వ్యక్తమవుతోంది.

రేవంత్ వర్గం కౌంటర్-వ్యూ & కౌంటర్ ఫ్యాక్ట్స్

అయితే, "పాత కాంగ్రెస్ నేతలను పూర్తిగా పక్కన పెట్టారు" అనే విమర్శకు కాంగ్రెస్ లోని రేవంత్ అనుచర వర్గాలు భిన్నమైన వాదనను వినిపిస్తున్నాయి. ప్రభుత్వ అధికారిక సలహాదారులు, ముఖ్య పదవుల జాబితాలోనే దీర్ఘకాల కాంగ్రెస్ నేతలకు తగిన గౌరవం దక్కిందని కౌంటర్ వాదనలు ఉన్నాయి:

సముచిత స్థానం: మహమ్మద్ అలీ షబ్బీర్, హరకర వేణుగోపాల్ రావు, పి. సుదర్శన్ రెడ్డి, వి. హనుమంతరావు, నేరెళ్ల శారద వంటి సుదీర్ఘ కాంగ్రెస్ అనుభవం ఉన్న సీనియర్లకు ప్రభుత్వ సలహాదారులుగా, కమిషన్లు మరియు ఇతర నామినేటెడ్ స్థానాల్లో అవకాశాలు కల్పించారు.

ఎలక్షన్ ఓరియంటెడ్ వ్యూహం: సుదీర్ఘకాలం పార్టీ అధికారంలో ఉండాలంటే పాత కేడర్‌తో పాటు ఇతర పార్టీల నుంచి వచ్చే గెలుపు గుర్రాలను కలుపుకుని పోవడం (Expansion Strategy) రాజకీయ అవసరమని సీఎం రేవంత్ రెడ్డి భావిస్తున్నట్లు ఆయన సన్నిహిత వర్గాలు చెబుతున్నాయి.

కార్యకర్తలకు ప్రాధాన్యం: పీసీసీ అధ్యక్షుడు మహేశ్ కుమార్ గౌడ్‌తో కలిసి చేపడుతున్న నామినేటెడ్ పోస్టుల భర్తీలో మూల కాంగ్రెస్ కార్యకర్తలకు తగిన గుర్తింపు ఇస్తున్నామని, క్రమశిక్షణను కాపాడటం పాలనలో భాగమేనని ఆ వర్గాలు వాదిస్తున్నాయి.

సమన్వయం - సమతుల్యతకు ప్రాధాన్యం ఇస్తారా?

2023లో తెలంగాణలో కాంగ్రెస్‌ను అధికారంలోకి తీసుకురావడంలో రేవంత్ రెడ్డి చూపిన నాయకత్వం, వ్యూహాత్మక చొరవ పార్టీ రాజకీయాల్లో విస్తృతంగా అంగీకరించబడిన అంశమే. అయితే అధికారాన్ని నిలబెట్టుకునేందుకు ఆయన అనుసరిస్తున్న ‘విస్తరణ, సమీకరణ రాజకీయాలు’ మరియు ఇతర పార్టీల నుంచి వచ్చిన నేతలకు లభిస్తున్న కీలక రాజకీయ, ప్రభుత్వ పదవులు దశాబ్దాలుగా పార్టీ సిద్ధాంతాన్ని నమ్ముకున్న పాత కాంగ్రెస్ నాయకత్వంతో ఎంతవరకు సమన్వయమవుతాయి? పాతకాపుల ఆత్మగౌరవాన్ని దెబ్బతీయకుండా సంస్థాగత సమతుల్యతను సాధించడమే ఇప్పుడు తెలంగాణ కాంగ్రెస్ ముందున్న అసలు సవాలు. అచ్చ కాంగ్రెస్ నేతల అసంతృప్తిని చల్లార్చడం — ఇది రేవంత్ రెడ్డి ‘  ఎలక్షన్ విన్నింగ్ పాలిటిక్స్’ ముందున్న అసలు పరీక్ష.