Madhusudan Chari | తెలంగాణ తల్లి కన్న ఆణిముత్యాల్లో ఒక‌రు దొడ్డి కొమరయ్య: మధుసూదనా చారి

Madhusudan Chari | త్రినేత్ర‌.న్యూస్‌: తెలంగాణ తల్లి కన్న ఆణిముత్యాల్లో దొడ్డి కొమరయ్య (Doddi Komuraiah) ఒకరని మండ‌లిలో బీఆర్ఎస్ ఎల్పీ నేత మ‌ధుసూద‌నాచారి (Madhusudan Chari) అన్నారు. ఆత్మగౌరవం కోసం ఉమ్మడి వరంగల్ జిల్లాలో విసునూరి రామచంద్రారెడ్డిని ఎదిరించిన గొప్ప నాయకుడ‌ని చెప్పారు. బీఆర్ఎస్ పార్టీ ఆఫీస్‌లో దొడ్డి కొమ‌ర‌య్య జ‌యంతి వేడుక‌ల‌ను ఘ‌నంగా నిర్వ‌హించారు. ఆయ‌న చిత్ర‌ప‌టానికి పూల‌మాల వేసి నివాళుల‌ర్పించారు. అనంత‌రం మాట్లాడుతూ.. విసునూరి రామచంద్రారెడ్డి నాయకత్వంలో నిరంతరం పీడనకు గురవుతున్న సమయంలో ఆయన చేస్తున్న అరాచకాలను చూడలేక దొడ్డి కొమరయ్య పోరాట పటిమ మరవలేనిద‌న్నారు.

ఆత్మ గౌరవం కోసం ప్రాణాలను సైతం తెగించి పోరాటం చేసిన గొప్ప యోధుడ‌ని చెప్పారు. సమ్మక్క సారక్క, చాకలి ఐలమ్మ , దొడ్డి కొమరయ్య ప్రజలకు స్వేచ్ఛ వాయువులను అందించారు. సమైక్య ఆంధ్రప్రదేశ్‌లో అన్యాయానికి గురవుతున్న తెలంగాణను చూడలేక 2001లో కేసీఆర్ తెలంగాణ కోసం పోరాడి ఆదర్శప్రాయంగా నిలిచారు. పోరాడి తెచ్చుకున్న తెలంగాణను ప‌దేండ్ల పాటు సుస్థిరంగా ఉంచారు. అధికారంలోకి వచ్చిన కాంగ్రెస్ ప్రభుత్వం గత దుర్ధినాలను కొనసాగిస్తుంది. అనేక హామీలు ప్రజలకు ఇచ్చి , గ్యారంటీల పేరుతో కాంగ్రెస్ పార్టీ తెలంగాణ ప్రజలను మోసం చేసింది. ఆత్మ గౌరవంపై దెబ్బ కొడితే ఊరుకునేది లేదని తెలంగాణ ప్రజలు మరోసారి కేసీఆర్ కోసం ఎదురుచూస్తున్నారు. ఈరోజు ఒక స్ఫూర్తి దినం మహానుభావుడు దొడ్డి కొమరయ్య చూపించిన మార్గంలో మనమందరం నడుచుకోవాలి. దొడ్డి కొమరయ్య నుంచి మనమందరం స్ఫూర్తి పొంది ప్రజలను చైతన్యవంతులు చేయాల‌న్నారు.