Telangana | 47 మంది మావోలు స‌రెండ‌ర్.. 32 ఆయుధాలు, 515 తూటాలు అప్ప‌గింత‌

Telangana | త్రినేత్ర‌.న్యూస్ : తెలంగాణ‌లో మావోయిస్టుల లొంగుబాటు ప్ర‌క్రియ కొన‌సాగుతూనే ఉంది. ఇప్ప‌టికే అగ్ర నేత‌ల‌తో పాటు వంద‌లాది మంది మావోయిస్టులు అడ‌విని వీడ‌గా, తాజాగా మ‌రో 47 మంది అజ్ఞాత మావోయిస్టులు జ‌న‌జీవన స్ర‌వంతిలో క‌లిశారు. వీరంతా తెలంగాణ డీజీపీ శివ‌ధ‌ర్ రెడ్డి ఎదుట మావోయిస్టులు లొంగిపోయారు. 32 తుపాకుల‌తో పాటు 515 తూటాల‌ను అప్ప‌గించారు.

శ‌నివారం లొంగిపోయిన వారిలో దండ‌కార‌ణ్య స్పెష‌ల్ జోన‌ల్ క‌మిటీ స‌భ్యుడు, ద‌క్షిణ బ‌స్త‌ర్ డివిజ‌న‌ల్ క‌మిటీ ఇంచార్జి హేమ్లా ఇతు అలియాస్ విజ్జా, డివిజ‌న‌ల్ క‌మిటీ స‌భ్యుడు, 9వ ప్లాటూన్ క‌మాండ‌ర్ పోడియం ల‌చ్చు అలియాస్ మ‌నోజ్ వంటి ముఖ్య నేత‌లు ఉన్నారు.

దక్షిణ బస్తర్ డివిసి (DVC) కార్యదర్శితో సహా కీలక నాయకులు, సాయుధ కేడర్లు దాదాపు అందరూ ఈరోజు లొంగిపోవడంతో, ప్రస్తుతం దక్షిణ బస్తర్ డివిసి మొత్తం నిర్వీర్యం అంచుకు చేరింద‌ని డీజీపీ పేర్కొన్నారు.

818 మంది మావోలు లొంగుబాటు

గత రెండేళ్లలో 818 మంది మావోయిస్టులు తెలంగాణ పోలీసుల ఎదుట‌ లొంగిపోయారు. 334 ఆయుధాలను మావోయిస్టుల నుండి స్వాధీనం చేసుకున్నాం.

స‌మ‌ర్పించిన ఆయుధాలివే..

ఎల్ఎంజీ - 1
ఏకే 47 రైఫిల్స్ - 4
ఎస్ఎల్ఆర్ రైఫిల్స్ - 3
ఇన్సాస్ రైఫిల్స్ - 2
410 మ‌స్కెట్ రైఫిల్స్ - 2
8 ఎంఎం రైఫిల్ - 1
సింగిల్ షాట్ గ‌న్స్ - 12
9ఎంఎం పిస్ట‌ల్ - 1
రివాల్వ‌ర్ - 1
బీజీఎల్ గ‌న్స్ - 2
ఎయిర్ గ‌న్స్ - 2
ఎస్‌బీబీఎల్ గ‌న్ - 1

మ‌రో న‌లుగురు అజ్ఞాతంలోనే..

తెలంగాణకి చెందిన నలుగురు మావోయిస్టు ఇంకా అజ్ఞాతంలో ఉన్నార‌ని డీజీపీ తెలిపారు. వారు కూడా తెలంగాణ పోలీసుల ముందు లొంగిపోయి, జ‌న‌జీవ‌న స్ర‌వంతిలో క‌ల‌వాల‌ని అభ్య‌ర్థించారు.

అజ్ఞాతంలో ఉన్న మావోయిస్టులు వీరే..

1. లక్ష్మణరావు అలియాస్ గణపతి, కేంద్ర కమిటీ సభ్యులు
2. పసునూరి నరహరి అలియాస్ సంతోషం, కేంద్ర కమిటీ సభ్యులు
3. జాడి రత్నా భాయ్ అలియాస్ సుజాత ,స్టేట్ కమిటీ మెంబర్
4. వార్త శేఖర్ అలియాస్ మంగు, స్టేట్ కమిటీ మెంబర్