Jagtial | కాటేసిన కాంటా! పది నెలల పసిపాప బలి

• చార్జింగ్‌లో ఉన్న ఎలక్ట్రిక్ కాంటాను చిన్నారికి షాక్‌
• జగిత్యాల జిల్లా రాజరాంపల్లెలో విషాదం
• త‌ల్లిదండ్రుల‌కు తీర‌ని గ‌ర్భ‌శోకం

Jagtial | ఆ ఇంట్లో అప్పటివరకు అంతా మామూలుగానే ఉన్న‌ది. పాకుతూ.. బోసినవ్వులు చిందిస్తూ తిరిగే పది నెలల చిన్నారి ఆటపాటలతో ఇల్లంతా సందడిగా ఉన్న‌ది. కానీ అంతలోనే ఊహించని విషాదం ఆ కుటుంబాన్ని కమ్మేసింది. ఎలక్ట్రిక్ కాంటా రూపంలో మృత్యువు ఆ చిన్నారిని కబళించింది. చార్జింగ్ అవుతున్న కాంటాను తాకిన ప‌సిపాప విద్యుత్‌ షాక్‌కు గురైన ప్రాణాలు కోల్పోవడంతో ఆ తల్లిదండ్రులకు తీర‌ని గ‌ర్భ‌శోకాన్ని మిగిల్చింది. జగిత్యాల జిల్లా రాజరాంపల్లెలో చోటుచేసుకున్న ఈ ఘటన స్థానికంగా తీవ్ర విషాదాన్ని నింపింది.

ఆడుకుంటూ వెళ్లి.. అనంతలోకాలకు..

తల్లిదండ్రులు ఎలక్ట్రిక్ కాంటాను చార్జింగ్‌లో పెట్టి తమ పనుల్లో నిమగ్నమయ్యారు. ఈ క్రమంలో ఇంట్లో పాకుతూ ఆడుకుంటున్న చిన్నారి అటువైపు వెళ్లి కాంటాను తాకినట్లు సమాచారం. దీంతో విద్యుదాఘాతానికి గురైన పాప విలవిలలాడి ప్రాణాలు విడిచింది. అప్పటివరకు తమ కళ్లముందే ఆడుకున్న బిడ్డ విగతజీవిగా మారడంతో తల్లిదండ్రులు కన్నీరుమున్నీరయ్యారు. ముఖ్యంగా తల్లి రోదనలు చూపరులను కలచివేశాయి. క్షణకాలం నిర్లక్ష్యం తమకు కడుపుకోత మిగిల్చిందంటూ ఆ తల్లి పడుతున్న వేదన వర్ణనాతీతం.

సౌకర్యాల మాటున ప్రమాదాలు

సాంకేతికత పెరిగేకొద్దీ మన దైనందిన జీవితంలో ఎలక్ట్రానిక్ పరికరాల వినియోగం విపరీతంగా పెరిగింది. పనులను సులభతరం చేసే ఈ పరికరాలే కొన్నిసార్లు ప్రాణాంతకంగా మారుతున్నాయి. ముఖ్యంగా ఇంట్లో చిన్నపిల్లలు ఉన్నప్పుడు అప్రమత్తత మరింత అవసరం. చార్జింగ్‌లో ఉన్న పరికరాలు, విద్యుత్‌ వైర్లు, ప్లగ్‌లు, ఇతర ఎలక్ట్రిక్ పనిముట్లు పిల్లలకు అందుబాటులో లేకుండా చూడాలి.

చిన్న నిర్లక్ష్యం.. కొండంత విషాదం

పిల్లలకు ప్రమాదం ఎక్కడి నుంచి వస్తుందో ఊహించడం కష్టం. పాకడం మొదలుపెట్టిన చిన్నారులు కనిపించిన ప్రతి వస్తువునూ ఆసక్తిగా తాకుతుంటారు. అందుకే వారి చుట్టూ ఉండే పరిసరాలను సురక్షితంగా ఉంచాల్సిన బాధ్యత పెద్దలదే. విద్యుత్‌ పరికరాలను ఉపయోగించిన తర్వాత స్విచ్‌ ఆఫ్‌ చేయడం, అవసరమైనప్పుడు ప్లగ్‌ తొలగించడం, చార్జింగ్‌ పరికరాలను పిల్లలకు దూరంగా ఉంచడం వంటి జాగ్రత్తలు తప్పనిసరి. ఒక చిన్నారి నిండు నూరేళ్లు జీవించాల్సిన జీవితం పది నెలలకే ముగిసిపోయింది.