Pavel Durov Reliance | భారత్‌లో టెలిగ్రామ్ బ్యాన్‌పై రిలయన్స్, వాట్సప్ కుట్ర! సీఈఓ సంచలన ఆరోపణలు.. అసలు నిజమేంటి?

Pavel Durov Reliance | టెలిగ్రామ్ (Telegram) వ్యవస్థాపకుడు, సీఈఓ పావెల్ దురోవ్ భారత టెలికాం దిగ్గజం రిలయన్స్ (Reliance), ప్రముఖ మెసేజింగ్ యాప్ వాట్సాప్ (WhatsApp)లపై సంచలన ఆరోపణలు చేశారు. ఇండియాలో టెలిగ్రామ్ యాప్‌పై నిషేధం విధించేలా ఆ రెండు సంస్థలు తెరవెనుక లాబీయింగ్ చేస్తున్నాయని ఆయన అనుమానం వ్యక్తం చేశారు. సోషల్ మీడియా ప్లాట్‌ఫామ్ 'ఎక్స్ (X)' వేదికగా ఆయన చేసిన ఈ వ్యాఖ్యలు టెక్ వర్గాల్లో తీవ్ర చర్చనీయాంశంగా మారాయి.

BGP హైజాకింగ్ ద్వారా కుట్ర!

కేవలం భారత్‌లోనే కాకుండా.. బయట దేశాల్లో (ముఖ్యంగా UAEలో) కూడా టెలిగ్రామ్ సేవలను రిలయన్స్ అడ్డుకుంటోందని దురోవ్ ఆరోపించారు. "BGP హైజాకింగ్ (Border Gateway Protocol hijacking) అనే పద్ధతి ద్వారా లక్షలాది మంది యూజర్లకు టెలిగ్రామ్ యాక్సెస్ లేకుండా చేస్తున్నారు. ఈ సమస్యను రిలయన్స్ దృష్టికి తీసుకెళ్లినా వారు స్పందించడం లేదు. దీన్ని బట్టి చూస్తే ఇదంతా ఉద్దేశపూర్వకంగా చేస్తున్నట్లే అనిపిస్తోంది" అని ఆయన పేర్కొన్నారు.

వాట్సప్ మాతృసంస్థ అయిన మెటాకు (Meta) రిలయన్స్‌లో పెట్టుబడులు ఉన్నాయని, ఆ వ్యాపార పోటీలో భాగంగానే టెలిగ్రామ్‌ను దెబ్బతీయాలని చూస్తున్నారని దురోవ్ విమర్శించారు. గ్లోబల్ ఇంటర్నెట్ రూటింగ్‌ను ఇలా దుర్వినియోగం చేయడం ఆందోళనకరమని, నెట్‌వర్క్ ఆపరేటర్లు రిలయన్స్ యాక్సెస్‌ను రిజెక్ట్ చేయాలని ఆయన సూచించారు.

ఆ ఆరోపణల్లో నిజం లేదు: టెలికాం వర్గాలు

దురోవ్ చేసిన ఆరోపణలను భారత టెలికాం వర్గాలు "ఫేక్ న్యూస్"గా కొట్టిపారేశాయి. దురోవ్ రెండు వేర్వేరు సంస్థలైన రిలయన్స్ కమ్యూనికేషన్స్ (RCom), రిలయన్స్ ఇండస్ట్రీస్‌కి చెందిన 'జియో (Jio)' లను ఒకటే అనుకుని కన్ఫ్యూజ్ అవుతున్నారని ఓ సీనియర్ టెలికాం అధికారి స్పష్టం చేశారు.

"మెటా సంస్థకు కేవలం జియోలో మాత్రమే మైనారిటీ వాటా ఉంది. కానీ, దురోవ్ ప్రస్తావించిన ఇంటర్నెట్ సిస్టమ్ రిలయన్స్ కమ్యూనికేషన్స్‌ (RCom)కు చెందింది. ఆ సంస్థకు రిలయన్స్ ఇండస్ట్రీస్‌ (RIL)కు ఎలాంటి సంబంధం లేదు. ఈ వ్యత్యాసం తెలియకుండా దురోవ్ తప్పుడు సమాచారాన్ని వ్యాప్తి చేస్తున్నారు" అని ఆ అధికారి వివరించారు.

అసలు టెలిగ్రామ్‌ను ఎందుకు బ్యాన్ చేశారు?

జూన్ 21న జరగనున్న నీట్-యూజీ (NEET-UG) రీ-ఎగ్జామ్ నేపథ్యంలో, పరీక్షా పత్రాల లీకేజీలు, వదంతులను అరికట్టడానికి భారత ప్రభుత్వం కఠిన చర్యలు తీసుకుంది. ఇందులో భాగంగా జూన్ 22 వరకు టెలిగ్రామ్ యాప్‌ను యాపిల్, గూగుల్ ప్లే స్టోర్ల నుంచి తొలగించాలని ఆదేశించింది. అలాగే, పాత మెసేజ్‌లను ఎడిట్ చేసే ఆప్షన్‌ను కూడా డిసేబుల్ చేయాలని సూచించింది.

అయితే, కేవలం కొందరు వ్యక్తులు పేపర్లు లీక్ చేసినంత మాత్రాన.. ఇండియాలో ఉన్న 150 మిలియన్లకు పైగా సాధారణ యూజర్లను శిక్షించడం కరెక్ట్ కాదని, యాప్‌ను బ్యాన్ చేయడం అతిపెద్ద పొరపాటని పావెల్ దురోవ్ ప్రభుత్వ నిర్ణయాన్ని తప్పుబట్టారు. ఇప్పటికే ఎగ్జామ్ పేపర్లు షేర్ చేసిన వందలాది చానెళ్లను తాము తొలగించామని ఆయన స్పష్టం చేశారు.

Indian telecom Reliance is sabotaging access to Telegram for millions of users OUTSIDE India (including the UAE) via a rogue method called BGP hijacking.

The sabotage seems intentional, as Reliance has ignored multiple reports.

This may be part of a competitive war, as…

— Pavel Durov (@durov) June 16, 2026