Donald Trump Iran Deal | మళ్లీ బాంబులు వేస్తాం.. ఇరాన్‌తో డీల్ ఇంకా ఫైనల్ కాలేదు: జీ7 సమ్మిట్‌లో డొనాల్డ్ ట్రంప్ స్ట్రాంగ్ వార్నింగ్

Donald Trump Iran Deal | త్రినేత్ర.న్యూస్ : ఫ్రాన్స్ వేదికగా జరుగుతున్న జీ7 (G7) సమ్మిట్‌లో అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. అమెరికా, ఇరాన్ మధ్య గత కొన్ని నెలలుగా జరుగుతున్న యుద్ధానికి ముగింపు పలికేలా మరో రెండు రోజుల్లో స్విట్జర్లాండ్‌లో కీలక ఒప్పందం జరగనున్న వేళ ఆయన ఈ కామెంట్స్ చేయడం హాట్ టాపిక్‌గా మారింది. ఒప్పందంలోని అంశాలు తనకు నచ్చకపోయినా, ఇరాన్ తన పద్ధతి మార్చుకోకపోయినా మళ్లీ బాంబుల వర్షం కురిపిస్తామని ఆయన తీవ్ర స్థాయిలో హెచ్చరించారు.

ఇరాన్‌కు స్ట్రాంగ్ వార్నింగ్..

ఈజిప్ట్ అధ్యక్షుడు అబ్దెల్ ఫత్తా ఎల్-సిసితో కలిసి మీడియాతో మాట్లాడిన ట్రంప్.. ఇరాన్‌తో చేసుకోబోయే డీల్ ఇంకా ఫైనల్ కాలేదని స్పష్టం చేశారు. ఈ ఒప్పందం చాలా సున్నితమైనదని ఆయన మాటల ద్వారా అర్థమవుతోంది.

"ఇది కేవలం ఒక అవగాహన ఒప్పందం (MoU) మాత్రమే. ఒకవేళ నాకు ఈ డీల్ నచ్చకపోతే.. లేదా వాళ్లు (ఇరాన్) తమ పద్ధతి మార్చుకోకపోతే మళ్లీ వారి తలల మీద బాంబులు వేస్తాం. ఎందుకంటే వారు 47 ఏళ్లుగా తప్పు చేస్తూనే ఉన్నారు" అని ట్రంప్ వార్నింగ్ ఇచ్చారు. తాను ప్రపంచవ్యాప్తంగా రాబోయే ఒక పెద్ద ఆర్థిక మాంద్యాన్ని అడ్డుకున్నానని, కొందరు 'మూర్ఖులు' మాత్రమే ఇలాంటి పరిస్థితిని కోరుకుంటున్నారని ఆయన వ్యాఖ్యానించారు.

మార్కెట్లలో జోష్.. త్వరలోనే హార్ముజ్ ఓపెన్

ఈ అమెరికా-ఇరాన్ ఒప్పందం ముసాయిదా చాలా బలంగా ఉందని ట్రంప్ పేర్కొన్నారు. ఈ డీల్ ప్రకటనతో మార్కెట్లు కళకళలాడుతున్నాయని, ఆయిల్ ధరలు భారీగా పతనమయ్యాయని ఆయన గుర్తుచేశారు. "మా మాటల కంటే కూడా మార్కెట్లే ఎక్కువ విషయాలు చెబుతున్నాయి" అంటూ ఆయన హర్షం వ్యక్తం చేశారు.

అలాగే, గ్లోబల్ ఎనర్జీ సప్లైకి అత్యంత కీలకమైన 'స్ట్రెయిట్ ఆఫ్ హార్ముజ్' (Strait of Hormuz) మార్గాన్ని కూడా ఒప్పందం జరిగిన ఒకట్రెండు రోజుల్లోనే పూర్తిగా తెరుస్తామని, ఇప్పటికే పాక్షికంగా ఓపెన్ చేశామని ట్రంప్ వెల్లడించారు.

ఆర్థిక సాయం వార్తలు అవాస్తవం..

మధ్యప్రాచ్యంలో (Middle East) నెలకొన్న ఉద్రిక్తతలను తగ్గించేలా అమెరికా-ఇరాన్ మధ్య ఈ డీల్ కుదిరింది. ఇందులో భాగంగా 60 రోజుల పాటు దాడులను నిలిపివేస్తారు. ఇరాన్‌పై ఉన్న అమెరికా ఆంక్షలను సైతం ఎత్తివేస్తారు.

అయితే, ఇరాన్ పునర్నిర్మాణం, ఆర్థికాభివృద్ధి కోసం అమెరికా దాదాపు $300 బిలియన్ల ఫండ్‌ను ఇవ్వబోతోందంటూ లీకైన కొన్ని నివేదికలు చెబుతున్నాయి. ఈ వార్తలను ట్రంప్ తీవ్రంగా ఖండించారు. "మేము వారికి పది పైసలు కూడా ఇవ్వడం లేదు. ఎలాంటి పెట్టుబడులు పెట్టడం లేదు, మా దగ్గర వాళ్లకోసం ప్రత్యేకంగా ఫండ్ ఏదీ లేదు" అని ఆయన కుండబద్దలు కొట్టారు.