India AI Impact Summit 2026 | ఇండియా ఏఐ సమ్మిట్ పొడిగింపు.. సందర్శకుల తాకిడితో కీలక నిర్ణయం.. తేదీలు ఇవే..!

• ఇండియా AI ఇంపాక్ట్ సమ్మిట్ 2026ను ఫిబ్రవరి 21 వరకు పొడిగింపు
• సందర్శకుల సౌకర్యార్థం ఎగ్జిబిషన్ సమయం రాత్రి 8 గంటల వరకు పెంపు
• ఫిబ్రవరి 19న (గురువారం) ప్రజలకు అనుమతి లేదు
• ఫిబ్రవరి 20, 21 తేదీల్లో ఎగ్జిబిషన్ తెరిచి ఉంటుంది
• ఇప్పటికే 2.5 లక్షల మందికి పైగా సందర్శకుల హాజరు

India AI Impact Summit 2026 | త్రినేత్ర.న్యూస్ : దేశ రాజధాని న్యూఢిల్లీలో జరుగుతున్న ప్రతిష్టాత్మక 'ఇండియా ఏఐ ఇంపాక్ట్ సమ్మిట్ 2026' (India AI Impact Summit 2026)కు ప్రజల నుంచి అనూహ్య స్పందన లభిస్తోంది. సందర్శకులు, ఎగ్జిబిటర్ల రద్దీ దృష్ట్యా కేంద్ర ప్రభుత్వం ఈ సదస్సును మరో రోజు పొడిగించింది. ముందుగా నిర్ణయించిన షెడ్యూల్ ప్రకారం ఈ సదస్సు ఫిబ్రవరి 20తో ముగియాల్సి ఉండగా, తాజా నిర్ణయంతో ఇది ఫిబ్రవరి 21 (శనివారం) వరకు కొనసాగనుంది.

సమయం పెంపు - ముఖ్యమైన తేదీలు

సందర్శకులకు మరింత సౌకర్యవంతంగా ఉండేలా ఎగ్జిబిషన్ సమయాలను కూడా మార్చారు. ప్రస్తుతం సాయంత్రం 6 గంటల వరకు ఉన్న సమయాన్ని ఇప్పుడు రాత్రి 8 గంటల వరకు పొడిగించారు. పరిమిత ఈవెంట్ల కారణంగా ఫిబ్రవరి 19న గురువారం ప్రజలకు (Public) ప్రవేశం ఉండదు. ఫిబ్రవరి 20, 21న ఈ రెండు రోజులు ఎగ్జిబిషన్ సాధారణ ప్రజల సందర్శనార్థం తెరిచి ఉంటుంది.

మంత్రి అశ్వినీ వైష్ణవ్ వెల్లడి

కేంద్ర ఐటీ శాఖ మంత్రి అశ్వినీ వైష్ణవ్ మాట్లాడుతూ.. ఈ సమ్మిట్‌కు ఇప్పటివరకు 3 లక్షల మందికి పైగా రిజిస్టర్ చేసుకున్నారని తెలిపారు. ఇది ఆర్టిఫిషియల్ ఇంటెలిజెన్స్ (AI) పట్ల ప్రజల్లో పెరుగుతున్న ఆసక్తికి నిదర్శనమని ఆయన అన్నారు. ఇప్పటికే సుమారు 2.5 లక్షల మంది ఎగ్జిబిషన్‌ను సందర్శించారని, అందులో ఎక్కువ మంది 30 ఏళ్ల లోపు యువతేనని పేర్కొన్నారు.

రిజిస్ట్రేషన్ల నిలిపివేత

అంచనాలకు మించిన స్పందన (Overwhelming response) కారణంగా అధికారిక వెబ్‌సైట్‌లో రిజిస్ట్రేషన్లను తాత్కాలికంగా నిలిపివేశారు. రద్దీని దృష్టిలో ఉంచుకుని ఆన్‌లైన్‌లో వర్చువల్‌గా పాల్గొనేందుకు ప్రభుత్వం ఒక లింక్‌ను (https://impact.indiaai.gov.in/sessions) అందుబాటులో ఉంచింది.

సదస్సు విశేషాలు

ప్రధాని నరేంద్ర మోదీ సోమవారం ప్రారంభించిన ఈ సదస్సులో ప్రపంచ దేశాల ప్రతినిధులు, ప్రముఖ టెక్ కంపెనీల అధినేతలు పాల్గొన్నారు. భారత్ మండపంలో 70,000 చదరపు మీటర్ల విస్తీర్ణంలో జరుగుతున్న ఈ ఈవెంట్‌లో 300కు పైగా ఎగ్జిబిషన్ పెవిలియన్లు, 600కు పైగా స్టార్టప్‌లు తమ ఏఐ ఆవిష్కరణలను ప్రదర్శిస్తున్నాయి.