ICICI Lombard E20 Fuel | E20 పెట్రోల్ కొట్టిస్తే ఇన్సూరెన్స్ ఇవ్వరా? నాలుక్కర్చుకున్న ఐసీఐసీఐ లాంబార్డ్

• E20 ఇంధనం వాడటం వల్ల మోటార్ ఇన్సూరెన్స్ పాలసీలు రద్దు కావని ఐసీఐసీఐ లాంబార్డ్ (ICICI Lombard) స్పష్టం
• పాత వాహనాల్లో E20 పెట్రోల్ వాడటాన్ని కస్టమర్ నిర్లక్ష్యంగా పరిగణించబోమని, క్లెయిమ్ తిరస్కరించబోమని వెల్లడి
• ప్రమాదాలు, దొంగతనాల వంటి బీమా కవర్ అయ్యే ఈవెంట్స్ ఆధారంగానే క్లెయిమ్స్ అంచనా వేస్తామని ప్రకటన
• సోషల్ మీడియాలో వైరల్ అవుతున్న ప్రచారానికి చెక్ పెడుతూ 'X' వేదికగా కంపెనీ అధికారిక ట్వీట్

త్రినేత్ర.న్యూస్ : దేశవ్యాప్తంగా E20 (ఇథనాల్ బ్లెండెడ్) పెట్రోల్ వాడకం వేగంగా పెరుగుతున్న నేపథ్యంలో వాహనదారుల్లో ఒక పెద్ద కన్ఫ్యూజన్ మొదలైంది. ఈ ఇంధనానికి సరిపడని పాత బండ్లలో E20 పెట్రోల్ వాడితే ఇంజిన్ పాడవుతుందని, దాన్ని నిర్లక్ష్యంగా భావించి ఇన్సూరెన్స్ కంపెనీలు క్లెయిమ్స్ (Insurance Claims) ఇవ్వవంటూ సోషల్ మీడియాలో విపరీతమైన చర్చ నడుస్తోంది. దీనివల్ల వాహన యజమానుల్లో ఆందోళన మొదలైంది. ఈ వైరల్ ప్రచారంపై ప్రముఖ బీమా సంస్థ ఐసీఐసీఐ లాంబార్డ్ (ICICI Lombard) అధికారికంగా స్పందిస్తూ ఓ కీలక ప్రకటన చేసింది.

అసలు వివాదం ఎక్కడ మొదలైంది?

ఇటీవల ఇథనాల్ బ్లెండెడ్ ఇంధనాలకు (E20) మారుతున్న క్రమంలో, ఒక పాత బ్లాగ్ పోస్ట్‌ను బేస్ చేసుకుని నెటిజన్లు ఆందోళన వ్యక్తం చేశారు. "మీ వాహనానికి సరిపడని ఇంధనం వాడితే దాన్ని సరికాని వినియోగం లేదా నిర్లక్ష్యం (Negligence) కింద పరిగణిస్తారు. అలాంటప్పుడు ఇన్సూరెన్స్ సంస్థలు క్లెయిమ్‌ను రిజెక్ట్ చేసే చాన్స్ ఉంది" అంటూ ఆన్‌లైన్‌లో వార్తలు చక్కర్లు కొట్టాయి. దీంతో చాలామంది E20 పెట్రోల్ కొట్టించాలంటేనే భయపడిపోయారు.

ఐసీఐసీఐ లాంబార్డ్ అఫీషియల్ రెస్పాన్స్

ఈ గందరగోళానికి చెక్ పెడుతూ ఐసీఐసీఐ లాంబార్డ్ 'X' వేదికగా ఒక అధికారిక ప్రకటన విడుదల చేసింది. "E20 ఇంధనాన్ని వాడటం వల్ల మోటార్ ఇన్సూరెన్స్ పాలసీల వాలిడిటీ (Validity) ఏమాత్రం పోదు. పాత వాహనాల్లో E20 వాడటాన్ని మేం ఎట్టి పరిస్థితుల్లోనూ కస్టమర్ నిర్లక్ష్యంగా భావించము. పైగా ఈ E20 ఇంధన ప్రోగ్రామ్ అనేది పర్యావరణానికి మేలు చేసే గొప్ప అడుగుగా మేం భావిస్తున్నాం" అని స్పష్టం చేసింది.

ఇన్సూరెన్స్ క్లెయిమ్స్ ఎలా అప్రూవ్ అవుతాయి?

బీమా క్లెయిమ్ అనేది మీ వాహనంలో వాడే ఇంధనం (పెట్రోల్, డీజిల్, CNG, లేదా E20) మీద అస్సలు ఆధారపడి ఉండదని కంపెనీ తేల్చి చెప్పింది. ఇన్సూరెన్స్ అనేది ప్రధానంగా కింద పేర్కొన్న అంశాలకు కవర్ అవుతుంది:

• ప్రమాదాలు (Accidental damages)
• దొంగతనాలు (Theft)
• థర్డ్-పార్టీ లయబిలిటీస్ (Third-party liabilities)
• పర్సనల్ యాక్సిడెంట్ కవరేజ్ (పాలసీని బట్టి)

సాధారణ పెట్రోల్ వాడితే యాక్సిడెంట్ అయినప్పుడు క్లెయిమ్ ఎలా వస్తుందో, E20 పెట్రోల్ వాడినా అలాగే వస్తుందని, కేవలం ఇంధనం కారణం చూపి ఎలాంటి క్లెయిమ్ రిజెక్ట్ చేయబోమని కంపెనీ హామీ ఇచ్చింది.

వాహనదారులకు ఇది ఎందుకు రిలీఫ్?

ముడి చమురు దిగుమతులను తగ్గించి, కాలుష్యాన్ని అరికట్టేందుకు ప్రభుత్వం ఇథనాల్ బ్లెండింగ్‌ను (Ethanol blending) భారీగా ప్రోత్సహిస్తోంది. ఈ తరుణంలో ఇన్సూరెన్స్ రాదేమో అని సామాన్యులు ఆందోళన పడుతున్న వేళ, ఐసీఐసీఐ లాంబార్డ్ ఇచ్చిన ఈ క్లారిటీ లక్షలాది మందికి పెద్ద రిలీఫ్. ఇకపై బంకుల్లో E20 పెట్రోల్ వాడుతూ మోటార్ ఇన్సూరెన్స్ గురించి ఎలాంటి భయాలు పెట్టుకోవాల్సిన అవసరం లేదు.

ICICI Lombard Clarifies Motor Insurance Coverage with E-20 Fuel Usage

ICICI Lombard General Insurance reaffirms that motor insurance policies remain fully valid by the use of E-20 fuel. We clarify that we do not treat usage of E-20 fuel in older vehicles as a negligence and we… pic.twitter.com/21OOvj1mPF

— ICICI Lombard GIC (@ICICILombard) June 15, 2026