Tech Industry Layoffs | “బాత్‌రూమ్‌లో ఒంటరిగా ఏడుస్తున్నాం”.. లేఆఫ్స్ భయంతో వణికిపోతున్న Meta, LinkedIn టెకీలు!

Tech Industry Layoffs | త్రినేత్ర.న్యూస్ : నిన్న మొన్నటి వరకు మెటా (Meta) లేదా లింక్డ్‌ఇన్‌ (LinkedIn) లాంటి దిగ్గజ కంపెనీల్లో పనిచేస్తున్నామని చెప్పుకోవడం ఎంతో గర్వకారణంగా ఉండేది. భారీ ప్యాకేజీలు, ఎన్నో సౌకర్యాలతో ఇవి 'డ్రీమ్ జాబ్స్'గా నిలిచాయి. కానీ, ఇప్పుడు పరిస్థితి మారిపోయింది. ఆయా కంపెనీల ఉద్యోగులు నిత్యం కడుపులో భయంతో నిద్రలేస్తున్నారు. ఇటీవల మెటా ఏకంగా 8,000 మందిని, లింక్డ్‌ఇన్ 600 మందిని విధుల నుంచి తొలగించాయి. ఇది కేవలం ఉద్యోగాల కోత కాదు.. తీవ్రమైన అనిశ్చితి టెక్కీల జీవితాలను ఎలా నాశనం చేస్తుందో చెప్పే చేదు నిజం.

కంపెనీల లోపల పరిస్థితి దారుణంగా ఉంది. ఎప్పుడు ఎవరి వంతు వస్తుందోనన్న భయం, అపనమ్మకం, ఆందోళన (Anxiety) వారిని పట్టిపీడిస్తున్నాయి.

"ప్రతిరోజూ ఉదయం ఆఫీస్‌కి వెళ్లే ముందు.. అసలు నాకు ఇంకా ఉద్యోగం ఉందా లేదా అని తెలుసుకోవడానికి నా ఈమెయిల్ చెక్ చేసుకుంటున్నాను" అని ఓ మెటా ఉద్యోగి తన గోడు వెళ్లబోసుకున్నారు. తమను రీప్లేస్ చేయబోయే ఏఐ (AI) సిస్టమ్స్‌కు తామే స్వయంగా ట్రైనింగ్ ఇస్తున్నామని, దీన్ని భరించలేక ఆఫీస్ గ్రూప్ చాట్స్‌లో డార్క్ హ్యూమర్, మీమ్స్ (Memes) షేర్ చేసుకుంటున్నామని కొందరు టెక్కీలు వాపోయారు.

ఉద్యోగులపై తీవ్ర మానసిక ప్రభావం

"నేను ఎవరికీ కనిపించకుండా బాత్‌రూమ్‌లో (Shower) షవర్ కింద ఏడుస్తుంటాను. కానీ ఆఫీస్‌లో మాత్రం చాలా ధైర్యంగా ఉన్నట్లు నటిస్తాను" అని మరో ఉద్యోగి ఆవేదన వ్యక్తం చేశారు.

ఈ అనిశ్చితి వల్ల ఉద్యోగుల వ్యక్తిగత జీవితాలు స్తంభించిపోయాయి. ఇల్లు మారడం, పిల్లల్ని కనడం, లోన్లు తీసుకోవడం, హాలిడే ట్రిప్స్ లాంటి నిర్ణయాలను వారు వాయిదా వేసుకుంటున్నారు. వచ్చే నెల తమకు జీతం వస్తుందో రాదో తెలియని పరిస్థితుల్లో భవిష్యత్తును ప్లాన్ చేసుకోలేకపోతున్నారు.

దీనిపై ఇండియన్ మెంటల్ హెల్త్ అండ్ రీసెర్చ్ సెంటర్ డైరెక్టర్ డాక్టర్ సాజిద్ కజ్మీ మాట్లాడుతూ.. "అకస్మాత్తుగా ఉద్యోగం కోల్పోవడం లేదా ఆ భయంతో బతకడం అనేది తీవ్రమైన మానసిక గాయం. ముఖ్యంగా కుటుంబానికి ప్రధానంగా సంపాదించే వ్యక్తుల్లో ఇది డిప్రెషన్ (Depression), తక్కువ ఆత్మగౌరవానికి దారితీస్తుంది" అని వివరించారు. ఈ దీర్ఘకాలిక ఒత్తిడి వల్ల శరీరంలో కార్టిసాల్ (Cortisol) స్థాయిలు పెరిగిపోయి నిద్రలేమి సమస్యలు వస్తాయని, ఆయుర్వేదంలో దీన్ని 'వాత వైషమ్యం' అంటారని మరో వైద్యురాలు డాక్టర్ అజయిత తెలిపారు.

ఉద్యోగాలను కబళిస్తున్న ఏఐ (AI)

ఐటీ కంపెనీలన్నీ ఇప్పుడు ఏఐ (AI) జపం చేస్తున్నాయి. మెటాతో కలిసి పనిచేస్తున్న సైబర్ సెక్యూరిటీ రీసెర్చర్ శుభమ్ భమారే మాట్లాడుతూ.. "మెటా తన పూర్తి దృష్టిని ఏఐ పైనే పెట్టింది. సైబర్ సెక్యూరిటీ టీమ్ స్పందించడానికి ఎక్కువ సమయం తీసుకుంటోంది. ఆటోమేటెడ్ రిప్లై సిస్టమ్స్ వచ్చేసాయి. మనుషుల స్థానాన్ని ఏఐ భర్తీ చేస్తోందనడానికి ఇదే నిదర్శనం" అని పేర్కొన్నారు.

అయితే, భవిష్యత్తులో ఉద్యోగులు ఏఐతో కలిసి పనిచేయాల్సి ఉంటుందని, ఏఐని పూర్తిగా వ్యతిరేకించలేమని నిపుణులు అభిప్రాయపడుతున్నారు. టెక్నాలజీ ఎంత పెరిగినా మనుషుల్లో ఉండే సృజనాత్మకత, సానుభూతిని అది భర్తీ చేయలేదనే వాదన కూడా వినిపిస్తోంది.

కలల ఉద్యోగాల భ్రమలు బద్దలు

ఉద్యోగాల కోసం వెతుక్కునే లింక్డ్‌ఇన్ (LinkedIn) ప్లాట్‌ఫామ్‌లో పనిచేసే ఉద్యోగులకూ ఈ భయం తప్పడం లేదు. కంపెనీకి రెండంకెల లాభాలు వస్తున్నప్పటికీ కాలిఫోర్నియాలో 600 మందిని తొలగిస్తున్నట్లు ప్రకటించారు. కారణం ఏఐ అని స్పష్టంగా చెప్పకపోయినా, భవిష్యత్తు అవసరాల కోసమే ఈ మార్పులు చేస్తున్నామని సీఈవో తెలిపారు.

ఏళ్ల తరబడి సిలికాన్ వ్యాలీలోని బడా కంపెనీలు ఉద్యోగులకు ఒక 'డ్రీమ్ లైఫ్'ను చూపించాయి. కానీ ఇప్పుడు ఆ భద్రత లేదు. "ఇంకా ఏఐ మా ఉద్యోగాలను లాక్కోకపోయినా, మమ్మల్ని ఒక వస్తువులా చూస్తున్నారు" అని టెక్కీలు ఫీల్ అవుతున్నారు. లేఆఫ్స్ రాకపోయినా సరే.. ఈ టెన్షన్ భరించలేక తామే వేరే ఉద్యోగాలు వెతుక్కోవాల్సిన పరిస్థితి వస్తోందని వారు చెబుతున్నారు.

జీతాలు ఇంకా ఎక్కువగానే ఉన్నాయి.. క్యాంపస్‌లు ఇంకా మెరుస్తూనే ఉన్నాయి.. కానీ ఒకప్పుడు ఆ ఉద్యోగాలతో పాటు వచ్చిన 'మానసిక ప్రశాంతత' మాత్రం ఇప్పుడు శాశ్వతంగా దూరమైంది.