Claude Code | వామ్మో.. ఆ ఏఐ మామూల్ది కాదు, గూగుల్ ఇంజినీర్ల ఉద్యోగాల‌కే ఎస‌రు పెట్టేలా ఉంది..!

Claude Code | ప్ర‌స్తుతం అన్ని రంగాల్లోనూ ఏఐ విప్ల‌వం ఎలా ఉందో అంద‌రికీ తెలిసిందే. అస‌లు సాంకేతిక ప‌రిజ్ఞాన‌మే లేని రోజుల్లో మ‌నిషి జీవితం ఎంతో క‌ష్టంగా ఉండేదో, ఇప్పుడు ఏఐ వ‌ల్ల ఎంత సుల‌భంగా మారిందో అంద‌ర‌మూ చూస్తున్నాం. ఈ క్ర‌మంలోనే సాంకేతిక రంగంలోనే కాదు, ఇత‌ర అనేక రంగాల్లోనూ ఏఐ చేస్తున్న అద్భుతాలు అన్నీ ఇన్నీ కావు. మ‌నిషికి రోజు రోజుకీ క‌ష్టం అనుకున్న ప‌నుల‌ను కూడా ఏఐ చాలా అవ‌లీలగా చేస్తోంది. అయితే అదే ఏఐ సాఫ్ట్‌వేర్ ఉద్యోగుల‌కు క‌ష్టాన్ని తెచ్చి పెట్ట‌నుంద‌ని టెక్ నిపుణులు అంటున్నారు. ఇప్ప‌టికే అనేక మంది పారిశ్రామిక వేత్త‌లు ఇదే అభిప్రాయాన్ని వ్య‌క్తం చేయ‌గా, ఇప్పుడ‌ది నిజ‌మైంద‌ని అర్థ‌మ‌వుతోంది. గూగుల్‌కు చెందిన ఓ సీనియ‌ర్ సాఫ్ట్‌వేర్ ఇంజినీర్ ఏఐ కెపాసిటీ ఎంత ఉందో ప్రాక్టిక‌ల్ గా త‌మ‌కు అర్థ‌మైంద‌ని వెల్ల‌డించారు. తాము 1 ఏడాదిలో చేసే ప‌నిని ఓ ఏఐ ఏకంగా ఒక గంట‌లోనే చేసింద‌ని తెలిపారు.

ఏడాది ప‌ని ఒక్క‌గంట‌లోనే..

గూగుల్‌లో ప్రిన్సిప‌ల్‌ సాఫ్ట్‌వేర్ ఇంజినీర్‌గా ప‌నిచేస్తున్న జానా డోగ‌న్ ఎక్స్ వేదిక‌గా ఓ ఆస‌క్తిక‌ర‌మైన విష‌యాన్ని పంచుకున్నారు. తాము క్లౌడ్ కోడ్‌కు చెందిన ఏఐ టూల్‌ను టెస్ట్ చేయాల‌ని చూశామ‌ని, అందులో ఓ కోడ్ గురించి అడ‌గ్గా అది కేవ‌లం ఒక గంట‌లోనే మొత్తం కోడ్‌ను ఇచ్చింద‌ని, సాధార‌ణంగా గూగుల్‌లో త‌మకు అదే కోడ్ ను రాయాలంటే క‌నీసం ఏడాది ప‌డుతుంద‌ని షాకింగ్ విష‌యాన్ని వెల్ల‌డించారు. డిస్ట్రిబ్యూటెడ్ ఏజెంట్ ఆర్కెస్ట్రేటర్స్ అనే అంశంపై గ‌త ఏడాదిగా తాము ప్రాజెక్టు చేస్తున్నామ‌ని, అయితే అందులో ఉన్న కోడింగ్ గురించి తాము ఏఐ ప్లాట్‌ఫామ్ అయిన క్లౌడ్ కోడ్ ను అడిగామ‌ని, ప‌లు ప్రాంప్టుల‌ను ఇవ్వ‌గా అది త‌మ‌కు కేవ‌లం ఒక గంట‌లోనే కోడ్ మొత్తాన్ని ఇచ్చింద‌ని తెలిపారు. దాన్ని చూసి తాను ఖంగు తిన్నాన‌ని, ఎందుకంటే అదే కోడ్‌ను గ‌త ఏడాది నుంచి తాము డెవ‌ల‌ప్ చేస్తూ వ‌స్తున్నామ‌ని, కానీ క్లౌడ్ కోడ్ ఏఐ కేవ‌లం ఒక గంట‌లోనే ఆ కోడ్ మొత్తాన్ని ఇవ్వ‌డం త‌మ‌ను తీవ్ర ఆశ్చ‌ర్యానికి గురి చేసింద‌ని తెలిపారు. ఇది జోక్ కాద‌ని, ఏఐ వ‌ల్ల ఎంత‌టి ప్ర‌భావం ఉండ‌బోతుందో ఒక చిన్న ఉదాహ‌ర‌ణ‌ను చెప్పే ప్ర‌య‌త్నం చేశాన‌ని జానా డోగ‌న్ ఎక్స్ ద్వారా ఓ పోస్టులో తెలిపారు.

సాధార‌ణ యూజ‌ర్లు కూడా..

కాగా క్లౌడ్ కోడ్ (Claude Code) అనే ఏఐ ప్లాట్‌ఫామ్‌ను Anthropic అనే సంస్థ అభివృద్ధి చేసింది. ఇందులో కోడింగ్‌కు సంబంధించిన అన్ని ప్ర‌శ్న‌ల‌కు ఏఐ స‌మాధానాలు చెబుతుంది. దీని గురించే ఆమె అలా తెలియ‌జేయ‌డం విశేషం. అయితే Anthropic సంస్థ‌ను ఏర్పాటు చేసింది గ‌తంలో ఓపెన్ ఏఐలో ప‌నిచేసిన వారే కావ‌డం విశేషం. ఓపెన్ఏఐ ప్ర‌స్తుతం చాట్ జీపీటీ సేవ‌ల‌ను అందిస్తుండగా, అందులో ప‌నిచేసిన ఇంజినీర్లు డారియో, డానియెలా అమోడెయ్ Anthropic ను ఏర్పాటు చేశారు. ఇందులో అనేక టూల్స్ అందుబాటులో ఉన్నాయి. వాటిల్లో Claude Code కూడా ఒక‌టి. దీని ద్వారా ఏఐ స‌హాయంతో కోడింగ్ స‌మ‌స్య‌ల‌ను ప‌రిష్క‌రించుకోవ‌చ్చు. ఇక Anthropic సంస్థ‌లో గూగుల్‌, అమెజాన్ వంటి ప్ర‌ముఖ టెక్ సంస్థ‌లు కూడా భారీ ఎత్తున పెట్టుబ‌డులు పెట్టాయి. కానీ వారికి Anthropic ను నియంత్రించే అధికారం లేదు. ఆ సంస్థ స్వ‌తంత్రంగా ప‌నిచేస్తుంది. కాగా Claude Code సేవ‌ల‌ను సాధార‌ణ యూజ‌ర్లు కూడా వాడుకోవ‌చ్చు. ఇందులోనూ ఇత‌ర ఏఐ ప్లాట్‌ఫామ్‌ల‌లాగే ఫ్రీ, ప్రొ ప్లాన్‌ల‌ను అందిస్తున్నారు. పెయిడ్ ప్లాన్‌ల ద్వారా మ‌రిన్ని అధునాత‌న స‌దుపాయాల‌ను ఇందులో పొంద‌వచ్చు. అయితే Claude Code సాధించిన ఈ ఘ‌న‌త‌కు ఆ ప్లాట్‌ఫామ్‌ ఏకంగా గూగుల్ ఇంజినీర్ల ఉద్యోగాల‌కే ఎస‌రు పెట్టేలా ఉంద‌ని ప‌లువురు టెక్ నిపుణులు అభిప్రాయం వ్య‌క్తం చేస్తున్నారు. మ‌రి భ‌విష్య‌త్తులో ఐటీ ఉద్యోగుల ప‌రిస్థితి ఎలా ఉంటుందో చూడాలి.