Fake Death | హ‌త్య కేసు నుంచి త‌ప్పించుకోవ‌డానికి.. ఏఐ స‌హాయంతో చ‌నిపోయిన‌ట్లు డ్రామా..

Fake Death | త్రినేత్ర న్యూస్‌: మేక మొండెం.. త‌న త‌ల‌.. రెండిటినీ ఆర్టిఫిషియ‌ల్ ఇంటెలిజెన్స్ (AI) స‌హాయంతో క‌లిపాడు. తాను చ‌నిపోయిన‌ట్లు, అంత్య‌క్రియ‌ల తంతుకు సంబంధించిన ఫొటోను (Fake Death) సృష్టించాడు. ఆ త‌ప్పుడు ఆధారాల‌తో మ‌ర‌ణ ధృవీక‌ర‌ణ ప‌త్రం (Death Certificate) కూడా తీసుకున్నాడు. దానిని కోర్టులో స‌ర్పించాడు. ఇందంతా ఎందుకు చేశాడ‌ని అనుకుంటున్నారా.. హ‌త్య కేసు విచార‌ణ‌ (Murder Trial) నుంచి త‌ప్పించుకోవ‌డానికి. అయితే అబ‌ద్ధం ఎక్కువ రోజులు దాగ‌దు క‌దా.. ఏడాదిగా త‌ప్పించుకు తిరుగుతున్న అత‌డు చివ‌ర‌కు పోలీసుల‌కు చిక్కాడు. ఈ ఘ‌ట‌న ఉత్త‌ర‌ప్ర‌దేశ్‌లోని మౌ (Mau) జిల్లాలో చోటుచేసుకుంది.

రాజ్‌కుమార్ రాజ్‌భ‌ర్ (38) అనే వ్య‌క్తి ఓ హ‌త్య కేసులో (Murder Case) నిందితుడిగా ఉన్నాడు. అదేవిధంగా స్టాక్ మార్కెట్‌లో పెట్టుబడుల పేరుతో ప్రజల నుంచి పెద్ద ఎత్తున డబ్బులు వసూలు చేసి మోసం చేసిన ఆరోపణలు కూడా అతనిపై ఉన్నాయి. 2016 డిసెంబ‌ర్ 19న మున్షీపురా రైల్వే లైన్ సమీపంలో యోగేష్ సింగ్ అనే వ్యక్తి హ‌త్య‌కు గుర‌య్యాడు. ఈఘ‌ట‌న‌లో రాజ్‌కుమార్, అతని స్నేహితుడు సుదర్శన్ రాజ్‌భర్‌పై (Rajkumar Rajbhar) హ‌త్య‌ కేసు నమోదైంది. దీంతో ఇద్దరు అప్ప‌టి నుంచి కోర్టు చుట్టూ తిరుగుతున్నారు. వీట‌న్నిటి నుంచి త‌ప్పించుకోవ‌డానికి రాజ్‌భ‌ర్ ఓ ప్లాన్ వేశాడు.

2025 మే 30న ఒక చ‌నిపోయిన‌ మేకకు ఘాజీపూర్‌లో అంత్యక్రియలు ఏర్పాటు చేశాడు. ఆ చితిపై ఉన్న మేక శరీరానికి బదులుగా.. ఏఐ హాయంతో తన శవం ఉన్నట్లుగా ఒక నకిలీ ఫొటోను (AI-Generated Funeral) సృష్టించాడు. ఏఐతో సృష్టించిన ఫోటోలు, అంత్యక్రియల (Funeral) తంతుకు సంబంధించిన తప్పుడు ఆధారాలను చూపించి మున్సిపల్ ఆఫీస్ నుంచి మరణ ధృవీకరణ పత్రాన్ని కూడా పొందాడు. తాను చనిపోయినట్లు నమ్మించడానికి ఆ సర్టిఫికెట్‌ను కోర్టుకు సమర్పించాడు. తాను బ‌తికి లేక‌పోవ‌డంతో త‌న‌పై విచార‌ణ నిలిపివేయాల‌ని న్యాయ‌స్థానానికి ప‌త్రాలు కూడా స‌మ‌ర్పించాడు. ఏడాదిన్న‌ర‌గా త‌ప్పించుకు తిరుగుతున్నాడు.

అయితే ఆదివారం (అక్టోబర్ 25) ఉదయం 9 గంటల స‌మ‌యంలో ఖ్వాజాజహాన్‌పూర్ ప్రాంతంలో కొత్వాలి నగర్ పోలీసులు, స్పెషల్ ఆపరేషన్స్ గ్రూప్ (SOG) రాజ్‌కుమార్‌ను అరెస్ట్ చేశారు. ఇంటర్మీడియట్ కూడా పాస్‌కాని రాజ్‌కుమార్ రాజ్‌భర్.. స్టాక్ మార్కెట్ ట్రేడర్‌గా పని చేసేవాడ‌ని అదనపు పోలీస్ సూపరింటెండెంట్ అనూప్ కుమార్ తెలిపారు. మార్కెట్‌లో పెట్టుబడి పెడతానని చెప్పి పలు నగరాల్లో ప్రముఖుల నుంచి భారీగా డబ్బు వసూలు చేశాడ‌ని వెల్ల‌డారు. హత్య కేసు నుంచి తప్పించుకోవడంతో పాటు, ఆ డబ్బును తిరిగి చెల్లించకుండా ఉండటానికే అతడు చ‌నిపోయిన‌ట్లు డ్రామా ఆడాడ‌ని చెప్పారు. ప్రస్తుతానికి అతను మళ్లీ బతికి రావడంతో హత్య కేసు విచారణతో పాటు, ఫోర్జరీ (నకిలీ పత్రాల సృష్టి) కింద అతనిపై మరో కొత్త కేసు కూడా నమోదుచేసిన‌ట్లు తెలిపారు.