Asian Games | 36 ఏళ్ల నిరీక్షణకు తెర.. షూటింగ్‌లో నీరూ ధండాకు గోల్డ్‌

Asian Games | ఆసియా క్రీడల్లో భారత మహిళా షూటర్‌ చరిత్ర సృష్టించింది. 36 ఏళ్ల తర్వాత మహిళల ట్రాప్‌ వ్యక్తిగత విభాగంలో భారత్ తొలి పతకం గెలిచింది. అది కూడా స్వర్ణం. ఆ ప‌త‌కాన్ని అందించింది ఎవ‌రో కాదు నీరూ ధండా. ఫైనల్లో 30 షాట్లకు 28 టార్గెట్స్ కొట్టి ఆసియా రికార్డుతో పసిడి ప‌త‌కాన్ని సొంతం చేసుకుంది. చైనాకు చెందిన సన్‌ యునోంగ్‌ 26 పాయింట్లతో రజతం సాధించింది. 1990 ఆసియా క్రీడల్లో మహిళల ట్రాప్‌ వ్యక్తిగత విభాగం ప్రవేశపెట్టినప్పటి నుంచి 2022 హాంగ్‌జౌ వరకు భారత్‌కు ఈ ఈవెంట్‌లో ఒక్క పతకం కూడా దక్కలేదు. 36 ఏళ్ల నిరీక్షణకు నీరూ తెరదించింది. ఈ ఈవెంట్‌లో భారత్‌కు ఇదే తొలి పతకం కాగా.. తొలి ప్రయత్నంలోనే గోల్డ్‌ సాధించడం విశేషం.

తొలి వ్యక్తిగత స్వర్ణం

ఐచి-నగోయా ఆసియా క్రీడల్లో భారత్‌కు వ్యక్తిగత విభాగంలో ఇదే తొలి స్వర్ణం. నీరూకు ఈ క్రీడల్లో ఇది రెండో పతకం. ఇప్పటికే మహిళల ట్రాప్‌ టీమ్‌ ఈవెంట్‌లో అశిమా అహ్లావత్‌, మనీషా కీర్‌లతో కలిసి రజతం సాధించింది. ఫైనల్లో 28 టార్గెట్స్ ఛేదించిన నీరూ.. మహిళల ట్రాప్‌ వ్యక్తిగత విభాగంలో ఆసియా రికార్డును కూడా తన ఖాతాలో వేసుకుంది. గతంలో 24 పాయింట్లుగా ఉన్న రికార్డును ఏకంగా నాలుగు పాయింట్లు మెరుగుపరిచింది.

రాష్ట్రపతి ద్రౌపది ముర్ము అభినందన

నీరూ ధండా చారిత్రాత్మక విజయంపై రాష్ట్రపతి ద్రౌపది ముర్ము అభినందనలు తెలిపారు. ఐచి-నగోయాలో త్రివర్ణ పతాకం రెపరెపలాడటం గర్వకారణమని పేర్కొంటూ.. మహిళల ట్రాప్‌ వ్యక్తిగత విభాగంలో ఆసియా రికార్డుతో స్వర్ణం సాధించిన నీరూను అభినందించారు. ఆమె విజయం మరెంతో మంది యువ భారతీయులను షూటింగ్‌ వైపు ప్రోత్సహిస్తుందని ఆకాంక్షించారు.